გუშინ, ლანჩხუთში, პოლიტიკურმა მოძრაობა “ტრიბუნამ” მერობის კანდიდატი და საარჩევნო სია წარადგინა. აღმოჩნდა, რომ პარტიული სიის მედიასაშუალებებში გაჟღერებას გარკვეული გაუგებრობები მოჰყვა.
საქმე ისაა, რომ “ტრიბუნას” ლიდერმა დავით ჭიჭინაძემ, ქალაქის ცენტრალურ სკვერში, თანაგუნდელი ლია მუხაშავრია, რომელიც გაერთიანებული ოპოზიციის მერობის კანდიდატია, ოფიციალურად წარადგინა. აქვე პარტიული სიის რამდენიმე წევრის სახელი და გვარიც გაჟღერდა, სიაში ლია მუხაშავრიაც მოხვდა. არადა, მოქმედი კანონმდებლობის შესაბამისად ეს დაუშვებელია.
როგორც “გურია ნიუსთან” საუბარში ლია მუხაშავრია განმარტავს, სამწუხაროდ, გარკვეულ გაუგებრობას ჰქონდა ადგილი და ის პარტიულ სიაშია არ არის:
“გუშინ გაკეთდა განცხადება პოლიტიკური მოძრაობა “ტრიბუნას” მხრიდან, ჩემი, როგორც გაერთიანებული მერობის კანდიდატის წარდგენასთან დაკავშირებით, სადაც ასევე ნათქვამი იყო, პარტიული სიის რამდენიმე წევრის თაობაზე, რამაც საზოგადოებაში გარკვეული გაუგებრობა გამოიწვია, რადგან ერთი და იგივე სახელის და გვარის რამდენიმე ადამიანი ცხოვრობს ლანჩხუთში.
გეტყვით, რომ ჩვენს მიერ პარტიულ სიაში დასახელებული თითოეული პირი ინფორმირებულია სიაში ჩაწერის თაობაზე, ხოლო სხვა, ვინც იგივე სახელით და გვარითაა, რა თქმა უნდა, არ მოიაზრება.
გარკვეული გაუგებრობების გამო, წარდგენისას მოხდა ისე, რომ პარტიულ სიაში აღმოჩნდა ჩემი სახელი და გვარიც, რაც, მოქმედი კანონმდებლობიდან გამომდინარე, ასე ვერ იქნება, რადგან მე გახლავართ მერობის კანდიდატი”, _ განმარტავს ლია მუხასავრია “გურია ნიუსთან” საუბარში.
[sexy_author_bio]
