აივ ინფიცირების შემთხვევები გურიაში- რა უნდა ვიცოდეთ

გურიაში აივ ინფიცირების 190 შემთხვევაა დაფიქსირებული.  რეგიონის მცხოვრებლების მაღალი ინტერესიდან გამომდინარე, “გურია ნიუსი” ინფექციური პათოლოგიისა და შიდსის ცენტრს დაუკავშირდა. ჩვენ ვცადეთ უფრო კონკრეტული ინფორმაცია მოგვეპოვებინა რეგიონში არსებული მდგომარეობის შესახებ.

როგორც ინფექციური პათოლოგიისა და შიდსის ცენტრში გვითხრეს, 190 შემთხვევა  1989 წლიდან 16 აგვისტომდე პერიოდშია გამოვლენილი.

ინფექციური პათოლოგიისა და შიდსის ცენტრიდან „გურია ნიუსისთვის“ მოწოდებული ინფორმაციის თანახმად, 190 ინფიცირებულს შორის ყველაზე მეტი კაცია. კაცებს შორის აივ ინფიცირების 145 შემთხვევაა დაფიქსირებული. დაინფიცირებულები არიან ქალებიც და გამოვლენილია 4 ბავშვის დაავადების შემთხვევაც. გარდაცვლილია 48 პაციენტი.

რაც შეეხება შიდსის გადაცემის გზებს, 95 დაინფიცირდა ჰეტეროსექსუალური კონტაქტით, 4 დედიდან შვილზე გადაცემის გზით, 20 ჰომოსექსუალური კონტაქტით, 71 ნარკოტიკების ინტრავენური მოხმარების გზით.

ჩვენ ვცადეთ გურიაში მდებარე ჯანდაცვის ცენტრებიდან მოგვეპოვებინა ინფორმაცია მუნიციპალიტეტებში არსებული მდგომარეობის შესახებ.

ლანჩხუთის ჯანდაცვის ცენტრის ხელმძღვანელმა ნატო მენაღარიშვილმა გვითხრა, რომ წელს აივ ინფიცირების 1 შემთხვევა დაფიქსირდა.

„წელს არის მხოლოდ 1 დადებითი და პაციენტი უკვე ჩართულია მკურნალობაში. შარშანაც 1 შემთხვევა დაფიქსირდა, 1 შემთხვევა დადასტურდა იმის წინა წელსაც. დანარჩენი ინფორმაცია კონფიდენციალურია. ინფიცირების შესახებ იცის მხოლოდ პაციენტმა და მისმა ექიმმა. ზოგადი ღონისძიებები კი ტარდება იმ ადგილებში, სადაც  აივ ინფიცირების გადაცემის მაღალი რისკია“,_ გვითხრა მენაღარიშვილმა.

ინფორმაციის მიღება ოზურგეთის საზოგადოებრივი ჯანდაცვის ცენტრიდანაც ვცადეთ, მაგრამ უშედეგოდ.

ოზურგეთის საზოგადოებრივი ჯანდაცვის ცენტრის ხელმძღვანელი, მაია ქუტიძე სატელეფონო საუბრის დროს გვეუბნება, რომ ინფორმაციას არ ფლობს.

„შიდსთან დაკავშირებით არანაირი ინფორმაცია არ მაქვს. ვერ გეტყვით“,_ გვითხრა ქუტიძემ და აღნიშნა, რომ სოფლებში მოსახლეობის ინტეგრირებული კვლევები ტარდება შიდსზე და ცე ჰეპატიტზე, მაგრამ ინფორმაცია, რომ ვინმე დადებითია, არ აქვს.

რაც შეეხება ჩოხატაურში არსებულ ვითარებას, ჩოხატაურის საზოგადოებრივი ჯანდაცვის ცენტრის ხელმძღვანელი, ნატო ჯიბუტი გვეუბნება, რომ ინფიცირების შემთხვევები არის, მაგრამ ინფორმაცია კონფიდენციალურია.

ცნობისთვის, აივ  ვირუსი როგორც კი ორგანიზმში შეიჭრება, ადამიანი უკვე აივ-ინფიცირებულია. დაავადება ანუ შიდსი მაშინ ვითარდება, როცა მისი ნიშნები იჩენს თავს. შესაძლოა, გარეგნულად შიდსის კვალიც არ ჩანდეს, მაგრამ ლაბორატორიულმა კვლევებმა მნიშვნელოვანი ცვლილებები გამოავლინოს.

მარტივად რომ ვთქვათ, უსიმპტომო სტადია აივ-ინფიცირებაა, სიმპტომების გაჩენა კი შიდსზე მიგვანიშნებს.

შიდსის ცენტრის ინფორმაციით, მართალია, აივ ინფექციას პათოგნომური კლინიკური ნიშნები არ გააჩნია, მაგრამ მაინც შეიძლება გამოიყოს სიმპტომებისა და დაავადებების ჯგუფი, რომელთა დროს პირველ რიგში ეჭვი უნდა იქნას მიტანილი აივ ინფექცია/შიდსზე. ესენია:

არამოტივირებული ცხელება;

ძლიერი საერთო სისუსტე;

წონაში კლება სხეულის მასის 10%-ით და მეტად;

ოფლიანობა;

ლიმფური კვანძების გადიდება;

ფაღარათი;

სხვადასხვა სახის გამონაყარი კანსა და ლორწოვან გარსებზე;

თეთრი ფერის ნადები ენაზე;

გახანგრძლივებული ფილტვების ანთება, რომელიც ცუდად ექვემდებარება ჩვეულებრივ ანტიბაქტერიულ თერაპიას;

ნერვული სისტემის სხვადასხვა სახის დაზიანება (დემენცია, მენინგიტი, ენცეფალიტი, მიელოპათია, პერიფერიული ნეიროპათია) და სხვა.

ამასთან, აუცილებლად უნდა იქნეს გათვალისწინებული ეპიდემიოლოგიური მონაცემები (მაღალი რისკის ჯგუფი, აივ ინფიცირებულთან კონტაქტი და სხვა), გარდა ამისა, აივ ინფექციაზე გამოკვლეულ უნდა იყვნენ სგგდ ავადმყოფები, B და C ჰეპატიტის ვირუსით ინფიცირებულნი, ტუბერკულოზით დაავადებულნი.

ადამიანის იმუნოდეფიციტის ვირუსი ინფიცირებულისგან ჯანმრთელს გადაეცემა: სქესობრივი გზით, ნარკოტიკების ინტრავენური მოხმარებით (ინფიცირება საერთო შპრიცით), მედმუშაკებში შპრიცით მანიპულაციის დროს, ვერტიკალური გზით ანუ ინფიცირებული დედისგან ნაყოფზე, შეუმოწმებელი სისხლის გადასხმით.

ვირუსი არ გადადის:  კოცნით. მწერების ნაკბენით, სტომატოლოგიური მანიპულაციების დროს, მანიკიურ-პედიკიურით, თმის შეკრეჭითა და გაპარსვით; ანალიზების ჩაბარების დროს; აუზზე, აბანოსა და საუნაში; ხელის ჩამორთმევით;

მიუხედავად არაერთი მცდელობისა, აივ-ინფექციისგან დამცავი ვაქცინა ჯერჯერობით არ აღმოუჩენიათ, ამიტომ, გადავურჩებით თუ არა ვირუსს, მხოლოდ და მხოლოდ ჩვენზეა დამოკიდებული.

იმუნოდეფიციტის ვირუსისგან თავი რომ დაიცვათ:

უთუოდ იმკურნალეთ, თუკი სქესობრივი გზით გადამდები რომელიმე დაავადება გაწუხებთ. ვენერული დაავადება ხომ აივ-ინფიცირების რისკს ერთიორად ზრდის.

ნურასოდეს გამოიყენებთ სხვის ნემსს, სამართებელსა თუ ჯაგრისს. მართალია, ამ ორი უკანასკნელის მეშვეობით დაინფიცირების ალბათობა ძალზე დაბალია, მაგრამ სიფრთხილეს თავი არ სტკივა.

თუკი სისხლთან შეხება მოგიწევთ, სასურველია, რეზინის ხელთათმანებით იმოქმედოთ. თუ ხელები მაინც დაგესვარათ, საპნით გულდასმით დაიბანეთ.

სამედიცინო (მაგალითად, სტომატოლოგიური) მანიპულაციის ან კოსმეტოლოგთან ვიზიტისას დარწმუნდით, რომ ყველა ინსტრუმენტი სათანადო წესით არის გასტერილებული.

და, რაც მთავარია: სქესობრივი კავშირის, მით უფრო – შემთხვევითი კონტაქტის დროს უთუოდ გამოიყენეთ ბარიერული დაცვის საშუალება.

[sexy_author_bio]