ორიოდე დღის წინ, ცხოველთა თავშესაფრის მეპატრონე თამაზ ელიზბარაშვილი გუჩის შესახებ წერდა. ძაღლი პატრონმა თავშესაფარში მიიყვანა და დატოვა იმ მიზეზით, რომ თითონ პოლონეთში მიდიოდა სამუშაოდ.
როგორც მაშინ თამაზ ელიზბარაშვილი წერდა, პატრონის წასვლის შემდეგ გუჩი დაწვა და თვალები დახუჭა.
ელიზბარაშვილმა გუჩის შესახებ პოსტი ისევ გაავრცელა.
“ორი დღეა რაც ცისარტყელიდან გვიყურებს.
იქ ალბათ არ იციან რა არის ღალატი, ბოღმა, სიძულვილი…
იქ ალბათ მხოლოდ სიყვარულია….
აქ კი….. რამდენი უმადური ადამიანი ყოფილა ჩემ ლამაზ საქართველოში, რამ გაგაბოროტათ ასე, ერთხელ მაინც ყოფილხართ თავშესაფარში ?
რატომ დაკარგეთ სიყვარულის და ერთგულების გრძნობა?
რატომ ტოვებთ გაჭირვებაში ოჯახის წევრებს და მეგობრებს მარტო?
რატო აქცევთ ზურგს გაჭირვებულს?
რატომ ხართ ლაჩრები?
სად გასწავლეს, რომ ამ ქვეყანაში ღალატი მოსულა?
რომ ღირსება ჩალის ფასი ღირს?
მე პოსტში დავინდე და ძაღლის პატრონის სახელი არ დავწერე, არც ის დავწერე, რამდენი ვეხვეწე არ დატოვო თავშესაფარში, ვერ გადაიტანს სიმარტოვეს სამი წლის ძაღლი მოკვდება თქო. ძაღლს ავადმყოფობის არაფერი ეტყობოდა, არც ჩემი თავშესაფარიდან ყავდა წაყვანილი. თუ ავად იყო, მით უარესი, თავშესაფარში კი არა ექიმთან უნდა მიეყვანა. თან წერს რომ არაფერი მიჭირსო, ფინანსურად მყარად ვარო. მისაბაძი ადამიანი ყოფილხარ შენ, რ.ხ-ა, აფერუმ შენ ვაჟკაცობას.
მიბაძეთ ქართველებო ამ კაცს, მიატოვეთ ავადმყოფი მშობლები, შვილები, მეგობრები, ოჯახის ოთხფეხა წევრები, წაქცეულს რომ ნახავთ ხელი არ გაუწოდოთ, წიხლი ჩააზილეთ, ღალატი და ორგულობა ცხოვრების წესად გაიხადეთ ………..
ჩემი მოდგმისაგან ნაღალატებო და განწირულო, მაგრამ მაინც მისი ერთგულო ,,გუჩი” , ბოდიშს გიხდი”, _ წერს თამაზ ელიზბარაშვილი.
