#62 ჩოხატაურის საარჩევნო ოლქის #14 ზემოხეთის საარჩევნო უბანზე დამკვირვებლის მიერ, დაფიქსირდა კენჭისყრის ფარულობის დარღვევის არაერთი შემთხვევა. ამ ინფორმაციას დამკვირვებელი ორანიზაცია ISFED-ი თავის სადამკვირვებლო პრეს რელიზში აქვეყნებს. პრეს რელიზში ნათქვამია: “ამომრჩევლები საარჩევნო კაბინიდან ხმის მიცემის შემდგომ, გახსნილი ბიულეტენებით გამოდიან; აღნიშნულ პროცესში კი, უბანზე მყოფი პირებისთვის ცნობილი ხდება ამომრჩეველთა მიერ დაფიქსირებული ნება; კომისიის თავმჯდომარე დამკვირვებლის შენიშვნის მიუხედავად, არ ახდენს რეაგირებას“.
აღნიშნულ ფაქტთან დაკავშირებით, ჩვენ #62 საოლქო კომისიის თავმჯდომარეს, თემურ კუტუბიძეს დავუკავშირდით.
კუტუბიძე ამბობს, რომ დარღვევის შესახებ ინფორმირებული არ არის, რადგან ოლქში საჩივარი არ შესულა.
„ჩვენთან, ოლქში საჩივარი არ შემოსულა საერთოდ, და უბანზე დარღვევის ფაქტს მე საიდან გეტყვით თუ არ შემოვიდა ჩვენთან?! მე-14 უბნის შესახებ არაფერი გამიგია. ტყუილი არ მიყვარს“,_ გვეუბნება კუტუბიძე.
იდენტიფიცირებულები არიან თუ არა დამრღვევი პირები და რა სანქციაა ასეთ შემთვევაში კანონმდებლობით გათვალისწინებული, ამის გასარკვევად სამართლიანი არჩევნებისა და დემოკრატიის საერთაშორისო საზოგადოებას (ISFED) დავუკავშირდით.
ორგანიზაციაში ამბობენ, რომ კენჭისყრის ფარულობის დარღვევის არაერთი შემთხვევა მართლაც დააფიქსირეს, მაგრამ დამრღვევთა სახელ-გვარების დასახელება არ შეუძლიათ და დამკვირვებელს დამრღვევებისთვის ფოტოც არ გადაუღია.
„ჩვენს ერთ-ერთ პრესრელიზში მოხვდა ეგ ფაქტი, როცა გამოდიოდნენ კაბინიდან და ღია ბიულეტენები ეჭირათ. კონკრეტულად ვისი დავალებით მოქმედებდნენ, ამ შემთხვევაში, არ ვიცით. დამრღვევი პირები ამომრჩევლები არიან. დაფიქსირებული არის დარღვევა, ჩვენს დამკვირვებელს ფოტო არც გადაუღია. ჩვენ, ცოტა სხვანაირად ვაკვირდებით პროცესებს _ აღვწერთ რა მოხდა. არაერთმა ამომრჩეველმა რომ ეს გააკეთა, გვიწერია რეპორტში“,_ ამბობენ ISFED-ში.
ითვალისწინებს თუ არა აღნიშნული დარღვევა სანქციას, – ამ კითხვაზე ორგანიზაციაში შემდეგ განმარტებას აკეთებენ:
„თუ ადამიანი თავის ნებით იძახის ვის მისცა ხმა, ეს სამართალდარღვევად არ ითვლება, შეიძლება ჩაითვალოს უბანზე აგიტაციად. თუ ადამიანი თავის ნებით იძახის ვის მისცა ხმა, ეს სამართალდარღვევა არ არის, მაგრამ თუ გამოდის საარჩევნო უბნიდან და იძახის, რომ მე ამას მივეცი ხმა და თქვენც მიეცით, ამ შემთხვევაში, საოლქოს აქვს უფლება, რომ 2000 ლარით დააჯარიმოს. როცა ადამიანები ღია ბიულეტენებით გამოდიან, ამაზე სანქცია არ არის“.
[sexy_author_bio]
