გუშინ, ბათუმში, ეროვნული ლიგის 30-ე ტურის ცენტრალური მატჩი გაიმართა, რომელსაც თურქ მსაჯთა ბრიგადა მოემსახურა _ ამ შეხვედრაში ბათუმის “დინამო” და თბილისის “დინამო” დაზავდნენ (1:1).
თამაშამდე ბათუმური გუნდი “დინამოს” 7 ქულით უსწრებდა და გამარჯვების შემთხვევაში პრაქტიკულად ჩემპიონობას ინაღდებდა. თამაში ფრედ დასრულდა, რომელმაც გეგუჩაძის შეგირდებს სოლიდური უპირატესობა შეუნარჩუნა და ტურნირის დასრულებამდე 6 ტურით ადრე ოქროს მედლებს კიდევ უფრო მიუახლოვა.
გიორგი მამარდაშვილის შემდეგ ესპანეთში მეორე ქართველი კარის დარაჯი იასპარეზებს _ თბილისის “დინამოს” აკადემიის აღზრდილი ლუკა ხარშილაძე კარიერას მესამე ლიგის “საბადელში” გააგრძელებს. მხარეებს შორის ორწლიანი კონტრაქტი გაფორმდა. ეს გუნდი გასულ სეზონში ესპანეთის რანგით მეორე ლიგაში ასპარეზობდა, თუმცა, მესამე ლიგაში დაქვეითდა.
ლუკა ხარშილაძე საქართველოს 17 და 18-წლამდე ნაკრებებში ასპარეზობდა. თბილისის “დინამოს” სამატჩო განაცხადში ორჯერ მოხვდა, თუმცა, არ უთამაშია.
ამასობაში, “ვალენსიას” გულშემატკივართა ერთი ჯგუფი იესპერ სილესენის ნაცვლად კარში გიორგი მამარდაშვილის დაბრუნებას ითხოვს.
“მომწონს მამარდაშვილი და თითქმის ყველაფერში მირჩევნია ის სილესენს. მესმის, რომ მისი შეცვლა თავიდან ბიჭის დასაწყნარებლად იყო საჭირო. ახლა კი სილესენის ზამთარში გაყიდვაზე ვმუშაობთ. კარში უნდა იდგეს საუკეთესო და ეს ქართველია”, _ წერს ტვიტერზე “ვალენსიას” ფანი drakulVCF.
“მესმის, რითაც ეს ცვლილება იყო გამოწვეული, მაგრამ მამარდაშვილი უკეთესი იყო”, _ ეს უკვე MAGascon-ის მოსაზრებაა.
“VCF_Blog”-ის გამოთვლით, ამ ორ მეკარეს შორის მამარდაშვილს უკეთესი სტატისტიკა გააჩნია _ სილესენის კარში გოლი ყოველ 0.29 ზუსტი დარტყმის დროს გადის, მამარდაშვილის შემთხვევაში კი ეს მაჩვენებელი 0.22-ია. იასპერ სილესენი ვალენსიაში ყველაზე მაღალანაზღაურებადი ფეხბურთელია. “ტრანსფერმარკეტის” მიხედვით, 32 წლის მოთამაშის საბაზრო ფასი 5 მილიონი ევროა (მამარდაშვილის _ 3 მილიონი). ზამთარში “ვალენსია” კიდევ ერთხელ შეეცდება მის გაყიდვას, რადგან 2022 წლის ზაფხულში ის თავისუფალი აგენტი ხდება.
ქართველი ჩოგბურთელი ნიკოლოზ ბასილაშვილი კი წარმატებული ასპარეზობის გაგრძელებას ავსტრიის დედაქალაქ ვენაში დაგეგმილ ტურნირზე შეეცდება. ქართველი “ERSTE BANK OPEN”-ზე დარეგისტრირდა, რომლის საპრიზო ფონდიც 1 550 950 ევროა და 25-31 ოქტომბერს ჩატარდება.
ბასილაშვილი თამაშს ძირითადი ბადიდან დაიწყებს, სადაც მის გარდა არაერთი სახელოვანი ჩოგბურთელია. სავარაუდოა, რომ პირველი განთესვით ბერძენი სტეფანოს ციციპასი ითამაშებს, რომელსაც ბასილაშვილმა ინდიან ველსის მასტერსის მეოთხედფინალში სძლია. კორტზე, ასევე ვიხილავთ ალექსანდერ ზვერევს (გერმანია), მატეო ბერეტინის (იტალია), კასპერ რუუდს (ნორვეგია), ფელიქს ოჟიე-ალიასიმს (კანადა), ჰუბერტ ჰურკაჩს (პოლონეთი), იანიკ სინერს (იტალია), დიეგო შვარცმანს (არგენტინა), პაბლო კარენო ბუსტას (ესპანეთი), გაელ მონფილსს (საფრანგეთი), გრიგორ დიმიტროვს (ბულგარეთი), ენდი მარის (დიდი ბრიტანეთი) და სხვებს. ვენაში ელიან “ინდიან უელსის” ტრიუმფატორ კამერონ ნორისაც (დიდი ბრიტანეთი), რომელმაც ფინალში სწორედ ბასილაშვილს აჯობა.
ინგლისურმა “ნიუკასლმა” მთავარი მწვრთნელი სტივ ბრიუსი გაათავისუფლა და უახლოეს პერიოდში დაასახელებს ახალი თავკაცის ვინაობას რომელიც გაცილებით სახელოვანი იქნება. ინგლისის პრემიერლიგის მიმდინარე სეზონში გუნდს 8 ტურში 3 ქულა აქვს და სატურნირო ცხრილში ბოლოსწინა პოზიცია უკავია.
“ნიუკასლი” ახალი მწვრთნელის ძიებაში აქტიურადაა ჩართული და რამდენიმე რეალური კანდიდატიც სახელდება. ესენი არიან: ბელგიის ნაკრების თავკაცი რობერტო მარტინესი, “რომასა” და “შახტარის” ყოფილი დამრიგებელი პაულო ფონსეკა, “გლაზგო რეინჯერსის” ამჟამინდელი მწვრთნელი სტივენ ჯერარდი, მოსკოვის “ლოკომოტივის” სამწვრთნელო შტაბში დასაქმებული რალფ რანგნიკი და უნაი ემერი, რომელიც “ვილიარეალში” მუშაობს.
აი, “მანჩესტერ იუნაიტედი” კი შესაძლოა ლეგენდარულმა ზინედინ ზიდანმა ჩაიბაროს. გამოცემა ” Chiringuito”-ს მტკიცებით, მანჩესტერულ გუნდში ფრანგი სპეციალისტის მიწვევით დაინტერესებულნი არიან.
გამოცემის თანახმად, “იუნაიტედის” ხელმძღვანელობა ზიდანს კრიშტიანუ რონალდუს რეკომენდაციით დაუკავშირდა. როგორც ცნობილი ხდება, ინგლისელები მწვრთნელის ცვლილებას ნოემბრის სანაკრებო პაუზის დროს გეგმავენ.
გუშინ გაიმართა ჩემპიონთა ლიგის ჯგუფური ეტაპის მესამე ტურის მორიგი შეხვედრები.
E ჯგუფი: “ბარსელონა” _ “დინამო”(კიევი) 1:0, “ბენფიკა” _ “ბაიერნი” (მიუნჰენი) 0:4;
F ჯგუფი: “მანჩესტერ იუნაიტედი” _ “ატალანტა” 3:2, “იანგ ბოისი” _ “ვილიარეალი” 1:4;
G ჯგუფი: “ზალცბურგი” _ “ვოლფსბურგი” 3:1, “ლილი” _ “სევილია” 0:0;
H ჯგუფი: “ჩელსი” _ “მალმიო” 4:0, “ზენიტი” _ “იუვენტუსი” 0:1.
[sexy_author_bio]
