უარი საწვავის ფასებს! – ფეისბუქზე შეიქმნა ჯგუფი, რომელშიც 43.000-ზე მეტი ადამიანია გაწევრიანებული ერთი მიზნით – უარი უთხრან საწვავის მაღალ ფასს. მოგეხსენებათ, ბოლო დროს საწვავის ფასმა საგრძნობლად იმატა და დღეს 1 ლიტრის ფასი 3.10-დან 3.35 ლარამდე მერყეობს.
ჯგუფში გაჟღერდა უამრავი იდეა, თუმცა, ბევრმა მათგანმა შედეგი არ გამოიღო. ახლა კი წევრებმა გადაწყვიტეს ბოიკოტი გამოუცხადონ ბენზინგასამართ სადგურებს, ამ რიგში პირველი ადგილი “ვისოლმა” დაიკავა. მას შემდეგ მოჰყვება სხვა კომპანიები, როგორებიცაა: “ლუკოილი”, “რომპეტროლი”, “სოკარი” და ა.შ.
ყურადსაღებია ის ფაქტი, რომ “ვისოლის” სადგურები სრულად დაცარიელდა, ხალხის ერთობა ნამდვილად შედგა და უკვე ძალიან ცოტა ადამიანი ასხამს “ვისოლში” ბენზინს. ამის დასტურად სოციალურ ქსელებში უამრავი ვიდეო ვრცელდება.
ამავე ჯგუფის ერთ-ერთი წევრი აქვეყნებს პოსტს, თუ როგორ უნდა მოხდეს ფასდაკლება. გთავაზობთ ამონარიდს ამ პოსტიდან:
“მეგობრებო, საწვავის ფასის დაწევის მოთხოვნა უნდა იყოს არგუმენტირებული და რეალური. შესაბამისად დავწერ ყველა იმ პუნქტს თუ როგორ უნდა მოხდეს საწვავის ფასის დაწევა.
უნდა მოვითხოვოთ საწვავზე აქციზის გადასახადის გაუქმება. აქციზის გადასახადის გაუქმებით საწვავი საშუალოდ გაიაფდება 1 ლიტრი 80-90 თეთრით.
აქციზის გადასახადის გაუქმებით ბიუჯეტში შეიქმნება, საშუალოდ, 800 მილიონი ლარის დეფიციტი.
ამ ლუფტის ამოვსება უნდა მოხდეს ადმინისტრაციული ხარჯის შემცირებით. ჩვენ, გადასახადის გადამხდელები ყოველწლიურად ვქირაობთ მთავრობას, რომლის შენახვა გვიჯდება 4.2 მილიარდი ლარი საშუალოდ.
გაბერილი შტატების შემცირებით (380 000 საჯარო მოხელე გვყავს), სამთავრობო ავტოპარკის შემცირებით (წლიურად 140 მილიონი ჯდება შენახვა) და არამიზნობრივი ხარჯების შემცირებით სავსებით რეალურია ადმინისტრაციული ხარჯი დავიდეს 3 მილიარდ ლარზე და ამით ჩვენ უკან დაგვიბრუნდეს ჩვენი გადახდილი გადასახადი აქციზის გადასახადის გაუქმების სახით.
ქამრების მოჭერის პოლიტიკის ფარგლებში (რაზეც ხშირად საუბრობენ, ეს სავსებით რეალურია)
ჩვენ უნდა მოვითხოვოთ საწვავზე აქციზის გადასახადის სრულად გაუქმება.”
გუგა ლომაძე
