„ადგილობრივი თვითმმართველობის კოდექსში“ ცვლილებების განხორციელება იგეგმება. კერძოდ, დაზუსტდება საკრებულოს თავმჯდომარის მოვალეობის შესრულებისა და ფრაქციის დაკომპლექტების წესები. პროექტი ფრაქცია “ქართული ოცნების“ დეპუტატებმა სოზარ სუბარმა, ირაკლი ქადაგიშვილმა, ირაკლი ჩიქოვანმა, გურამ მაჭარაშვილმა, დავით მათიკაშვილმა და დიმიტრი სამხარაძემ მოამზადეს.
ჯერ კიდევ მოქმედი “ადგილობრივი თვითმმართველობის კოდექსით“ საკრებულოში ფრაქცია შეიძლება ორი ან მეტი პარტიის წევრებმა შექმნან. ახალი დოკუმენტის მიხედვით, ერთიდაიგივე პარტიის მიერ წარდგენილ საკრებულოს წევრებს მხოლოდ ერთი ფრაქციის შექმნა შეუძლიათ. საკრებულოებში ფრაქციების ფორმირების ეს წესი პარლამენტის რეგლამენტის ანალოგიურია.
ცვლილებების ინიციატორთა განმარტებით, საკრებულოში ფრაქციების შექმნის წესის ცვლილებით მცირე ფრაქციების ხელოვნურად შექმნა გამოირიცხება.
“ადგილობრივი თვითმმართველობის კოდექსში“ დაგეგმილი ცვლილებების მიხედვით, იზრდება საკრებულოებში თანამდებობის პირთა რაოდენობა. ინიციატივის მიხედვით, მუნიციპალიტეტების საკრებულოების თავმჯდომარეებს სამი მოადგილე, მათ შორის პირველი მოადგილე ეყოლებათ.
“ადგილობრივი თვითმმართველობის კოდექსში“ დაგეგმილი ცვლილებების ამ პროექტით, ასევე იგეგმება ფრაქციის თავმჯდომარის მოადგილეების არჩევის პრინციპის შეცვლაც. საკრებულოს ფრაქციის თავმჯდომარეს ერთი მოადგილე ეყოლება, ხოლო ფრაქციის ყოველ ხუთ წევრზე იგი უფლებამოსილი იქნება დამატებით ერთი მოადგილე ჰყავდეს.
“ადგილობრივი თვითმმართველობის კოდექსის“ ჯერ კიდევ მოქმედი ნორმის მიხედვით, მუნიციპალიტეტის საკრებულოს თავმჯდომარეს, გარდა თბილისისა, ერთი მოადგილე ჰყავს და თუ მუნიციპალიტეტში 100 000 ამომრჩეველზე მეტი ცხოვრობს, მაშინ საკრებულოს თავმჯდომარეს შეიძლება ორი მოადგილე ჰყავდეს, ხოლო თბილისის მუნიციპალიტეტის საკრებულოში თავმჯდომარეს შეიძლება ჰყავდეს პირველი მოადგილე და მოადგილეები (მოადგილეთა რაოდენობა დაკონკრეტებული არ არის).
ამასთანავე, მუნიციპალიტეტის (გარდა თბილისისა) საკრებულოს ფრაქციის თავმჯდომარეს ერთი მოადგილე ჰყავს და თუ ფრაქციაში ცხრა წევრზე მეტია გაწევრებული, შესაძლებელია ჰყავდეს დამატებით ერთი მოადგილე. რაც შეეხება თბილისის საკრებულოს, ფრაქციის თავმჯდომარეს ჰყავს ერთი მოადგილე, ხოლო ფრაქციის ყოველ ცხრა წევრზე იგი უფლებამოსილია ჰყავდეს დამატებით ერთი მოადგილე. ამასთანავე, ქალაქ თბილისის მუნიციპალიტეტის საკრებულოს ფრაქციის თავმჯდომარეს შეუძლია ჰყავდეს არაუმეტეს სამი მოადგილისა.
საკანონმდებლო ინიციატივის ავტორტა განმარტებით, –“იმისათვის, რომ მუნიციპალიტეტების საკრებულოებში, როგორც საკრებულოს თავმჯდომარის მოადგილეებს, ისე ფრაქციის თავმჯდომარის მოადგილეებს შორის, ფუნქცია-მოვალეობათა განაწილება გამარტივდეს, შესაბამისად დაიხვეწოს მენეჯმენტი და საქმიანობა გახდეს უფრო ეფექტური, მიზანშეწონილია ორგანულ კანონში ცვლილება განხორციელდეს და აღნიშნული მოადგილეების არჩევის პრინციპი შეიცვალოს“.
[sexy_author_bio]
