“ხელებს ნუ გვიშლი, დაწყნარდი და ეგ თვალები შოთაძეს უბრიალე”, _ ამ სიტყვებით გიგი უგულავამ, რომელიც თბილისის საქალაქო სასამართლოში 7 ნოემბრის საქმეზე გამართულ სხდომას ესწრებოდა, პროკურორს მიმართა.
აღნიშნულ საქმეზე ბრალდებულები არიან მიხეილ სააკაშვილი, გიგი უგულავა და ვანო მერაბიშვილი. სხდომის დაწყებამდე ცოტა ხნით ადრე ცნობილი გახდა, რომ პენიტენციურმა სამსახურმა სხდომათა დარბაზში მიხეილ სააკაშვილის გადაყანაზე უარი თქვა, ის სასამართლო პროცესს ვერ ესწრება.
უგულავა სხდომათა დარბაზში მიხეილ სააკაშვილის მიყვანას ითხოვდა.
პროკურორმა გიგი უგულავას მიმართა, რომ სასამართლოში ქცევის წესები დაიცვას და ნუ აყენებს შეურაცხყოფას სასამართლოს.
„მოქცევა არ იცით სასამართლოში, ნუ გვაყენებთ შეურაცხყოფას, სასამართლოს და პროკურორს რომ შნირი უწოდოთ, ეს არ არის წესი“, – მიმართა პროკურორმა გიგი უგულავას.
ამასთან, უგულავამ პროკურორს ქცევა დაუწუნა: „ხელებს ნუ გვიშლი, დაწყნარდი და ეგ თვალები შოთაძეს უბრიალე. მოსამართლეებს მე არ გიცნობთ, წესით უნდა ვიცნობდე ვინც მასამართლებდნენ“.
საქმის მოსამართლემ სასამართლო სხდომის გაშუქების წესები კიდევ ერთხელ განმარტა. „გადაწყვეტილება ვთქვით და ასე იქნება“, – აღნიშნა მოსამართლემ.
ამასთან, გიგი უგულავამ აღნიშნა, რომ ინფორმაცია სწრაფად გადაიცემა და გაუგებარია, რატომ არის მოსამართლე სხდომის გამჭვირვალედ გაშუქების წინააღმდეგი.
„საჯაროობა უზრუნველყოფილი არ არის, რაც თქვენი მოვალეობაა“, – მიმართა გიგი უგულავამ მოსამართლეს.
ამასთან, სხდომაზე კამათი მოხდა მიხეილ სააკაშვილის არყოფნის საკითხთან დაკავშირებით.
პროკურორმა განმარტა, თუ რაიმე მიზეზით ვერ ხდება პატიმრის ბადრაგირება, შესაძლებელია, სასამართლო პროცესი ბრალდებულის უშუალო მონაწილეობით ჩატარდეს დაკავების მოთავსების ადგილზე.
„მიხეილ სააკაშვილის ბადრაგირება ვერ მოხდა. ბრალდებულ მიხეილ სააკაშვილს რომ მიეცეს პროცესში მონაწილეობის საშუალება, საპროცესო კოდექსი ითვალისწინებს – თუ ობიექტური გარემოების გამო, ვერ ხდება ბადრაგირება, შესაძლებელია, ბრალდებულის უშუალო მონაწილეობით სასამართლო პროცესი ჩატარდეს დაკავების მოთავსების ადგილზე. მზაობას გამოვთქვამთ, მივიღოთ მონაწილეობა. სისხლის სამართლის კოდექსის 38-ე მუხლი ბრალდებულს ანიჭებს უფლებას და შესაძლებლობას ალტერნატივის სახით, დისტანციური ჩართვისას, რათა ამ ფორმით ჰქონდეს ბრალდებულს შესაძლებლობა, უშუალოდ მიიღოს მონაწილეობა სასამართლო პროცესში“, – განაცხადა პროკურორმა.
