ჩოხატაურში, ბოლო 2 დღის განმავლობაში, ეპიდვითარება შედარებით გაუმჯობესებულია. ამის შესახებ „გურია ნიუსს“ ჩოხატაურის საზოგადოებრივი ჯანდაცვის ცენტრის ხელმძღვანელმა ნატო ჯიბუტმა განუცხადა.
„ეპიდვითარება შედარებით გაუმჯობესებულია. ბოლო 24 საათის განმავლობაში დადასტურდა ინფიცირების 27 შემთხვევა. სულ დადატურებულია 3687, საიდანაც 3331 პაციენტი გამოჯანმრთელდა, 39 პაციენტი კი გარდაიცვალა. ამ დროისთვის აქტიურია ინფიცირების 300-ზე მეტი შემთხვევა, საიდანაც 42 პაციენტი კოვიდკლინიკაში მკურნალობს“,_ ამბობს ნატო ჯიბუტი.
ადგილობრივ კოვიდკლინიკაში ადგილი 39 პაციენტზეა გათვლილი. რაც ნიშნავს, რომ კლინიკა სავსეა და რამდენიმე პაციენტი სხვა მუნიციპალიტეტშია სამკურნალოდ წაყვანილი.
კლინიკაში თავისუფალი ადგილების არ ქონას ადასტურებს ჩოხატაურის საზოგადოებრივი ჯანდაცვის ცენტრის ხელმძღვანელიც.
„ადგილები არ არის. ვინმეს თუ გამოწერენ ახალი პაციენტი შეჰყავთ“,_ ამბობს ნატო ჯიბუტი.
ჩვენ ვესაუბრეთ სამედიცონო ცენტრ „მედალფას“ ხელმძღვანელ ანტონ ხუნდაძესაც.
„კლინიკა სულ სავსეა, დატვირთულია 100%-ით. არის 39 საწოლი. გაეწერება პაციენტი, შემოვა ახალი. როცა ადგილი არ არის ჩვენთან, სხვაგან გადაჰყავთ, ოზურგეთში ან ბათუმში“,_ ამბობს ხუნდაძე.
სამედიცინო კლინიკის ხელმძღვანელი ამბობს, რომ მოქალაქეები არც კოვიდვაქცინას იკეთებენ აქტიურად და არც კოვიდრეგულაციებს იცავენ. ანტონ ხუნდაძე ხალხს საკუთარი სიცოცხლისა და სამედიცინო პერსონალის გაფრთხილებისკენ მოუწოდებს.
„აცრები არ არის ბევრი. ქუჩაში, ბაზარში უნიღბოდ დადიან. წესებს არ იცავენ. გაიკეთეთ ყველამ ნიღაბი. გაუფრთხილდით თავს და სამედიცინო პერსონალს, თორემ გადაიღლებიან ექიმები და ვეღარ მოუვლიან. ვისაც არ სჯერავს კოვიდის და მძიმე პაციენტების, მოვიდეს, ჩავაცმევ ხალათს, შევფუთავ და ვანახებ რა ხდება“,_ ამბობს ხუნდაძე.
