დღეს, დილით, ოზურგეთის მუნიციპალიტეტის მერიასთან ოზურგეთის უპოვართა სასადილოს ბენეფიციარები მივიდნენ და მერთან, ავთანდილ თალაკვაძესთან შეხვედრა მოითხოვეს.
_ჩვენ არ ვაწყობთ საპროტესტო ან სხვა სახის აქციას. მხოლოდ თხოვნით ვართ მოსული. მალე ტენდერი გამოცხადდება, რაც ყოველ წელს ხდება და ვშიშობთ, ისევ ისე არ მოხდეს, როგორც წლების წინ. დამპალ კომბოსტოს რომ გვაჭმევდნენ. არაჩვეულებრივ გარემოში ვართ ახლა, რასაც ძლივს მივაღწიეთ. გრიბოედოვის ქუჩაზე განთავსებულ სასადილოში , ჩვენ უმაღლეს დონეზე გვემსახურებიან. მერთან თხოვნა გვაქვს, დაგვეხმარონ, რომ ეს პირობები იქნეს შენარჩუნებული. ტენდერის მეშვეობით, კიდევ ისეთი არ მოვიდეს ვინმე, როგორებისგანაც წლების მანძილზე ძლივს დავიხსენით თავი _ გვითხრეს ბადრი გოგოტიშვილმა, მაია იაკობიძემ, გულადი მარგველაშვილმა და ნელი სულაბერიძემ.
ძიგრაშვილი თეოფილე, ბენეფიციარი: რაზე ვეჭვობ, იცით? ტენდერი რომ ჩატარდება, შესაძლოა, ვიღაც კიდევ ისეთი მოვიდეს, ადამიანებად რომ არ გვთვლიდა და ბალანდასავით საჭმელს გვიკეთებდნენ დამპალი კომბოსტოთი. ეს საქმე გამოსაწორებულია და ვთხოვთ ახალ ხელმძღვანელს, გაითვალისწინოს ჩვენი აზრი. დაგვიჯეროს, რომ სამართლიანი მოთხოვნა გვაქვს.
ოზურგეთის მუნიციპალიტეტის მერთან, ავთანდილ თალაკვაძესთან ხუთი ბენეფიციარი მიიწვიეს. დანარჩენები კი მერიის შესასვლელში ელოდებოდნენ.
მალე უკან დაბრუნდნენ მარინა ზაზაძე და სხვები, რომლებმაც კმაყოფილება გამოთქვეს მერთან შეხვედრის გამო. მათ დეტალებზე არ უსაუბერიათ, თქვეს მხოლოდ ის , რომ საკითხის განხილვას დაპირდნენ.
_ძალიან კარგად მიგვიღო. კმაყოფილი ვართ. გვითხრა, რომ ერთ კვირაში განიხილავენ ამ საკითხს და პასუხს გვეტყვიან. იმედით წამოვედით, – გვითხრა მარინა ზაზაძემ.
ოზურგეთის ბენეფიციართა სასადილოში, რომელიც დარბაზში ( „ნატალი“) არის განთავსებული, ახლა 180 წევრია. ასევე არიან მომლოდინეები.
მერიაში მოსულმა ბენეფიციარებმა „გურია ნიუსთან“ თქვეს, რომ 180-ივე ბენეფიციარი კმაყოფილია და მუნიციპალიტეტის ხელმძღვანელთან აქვთ იგივე თხოვნა _ დაეხმარონ არსებული საუკეთესო პირობების შენარჩუნებაში.
