ცოტა ხნის წინ, მსოფლიოს კორონავირუსის ახალმა შტამმა, ე. წ. “ომიკრონმა” შეუტია. თითქოს “ჩაწყნარებულმა” პანდემიამ ახალი ძალით იფეთქა და პლანეტის რიგ ქვეყნებში კარგად ნაცნობი “ლოკდაუნებისა” და შეზღუდვების დრო კვლავ დააბრუნა.
კოვიდ-19 სპორტსაც აქტიურად შეეხო. ალბათ, მიაქციეთ ყურადღება რომ რიგ ევროპულ ქვეყნებში სპორტული ასპარეზობები ცარიელი ტრიბუნების წინ მიმდინარეობს.
უმაყურებლო შეხვედრებს კიდევ აიტანდა ადამიანი, მაგრამ საქმეს ისეთი პირი უჩანს, რომ დიდი ალბათობით დროებით სპორტული შეჯიბრებების გარეშე დავრჩებით. იმედია, ამ რადიკალურ ზომებამდე საქმე არ მივა, მაგრამ რა იცი…
გუშინ ცნობილი გახდა, რომ აფრიკის ფეხბურთის კონფედერაცია განიხილავს აფრიკის “ერთა თასის” კიდევ ერთხელ გადადების საკითხს, რომელიც მომავალ წელს, კამერუნში, 9 იანვრიდან 6 თებერვლის ჩათვლით უნდა ჩატარდეს. ტურნირის ორგანიზატორები შეშფოთებულები არიან COVID-19-თან დაკავშირებით შექმნილი ვითარების, უფრო კონკრეტულად კი, კორონავირუსის ახალი შტამის _ “ომიკრონის” გამოჩენის გამო.
აფრიკის ფეხბურთის კონფედერაციაში ფიქრობენ, რომ მოთამაშეებისა და გულშემატკივრების კონტინენტზე ჩასვლა კიდევ უფრო დაამძიმებს ეპიდემიოლოგიურ სიტუაციას. ამჟამად მიმდინარეობს აფრიკის “ერთა თასის” უსაფრთხოდ ჩატარების საკითხის განხილვა. იმ შემთხვევაში, თუკი კამერუნში დაგეგმილი აფრიკის ერთა თასი არ ჩატარდება, ტურნირს 2023 წლის ზაფხულში კოტ დ’ივუარი უმასპინძლებს, რათა თანხვედრა არ მოხდეს მსოფლიოს 2022 წლის ჩემპიონატთან.
გუშინ, მადრიდის “რეალმა” დაადასტურა, რომ ლუკა მოდრიჩს და მარსელოს კორონავირუსი აქვთ. ორივე ფეხბურთელი იზოლაციაშია გადასული და დროებით გუნდს ჩამოშორებული.
ფეხბურთელებს კოვიდ-19-ის ტესტზე დადებითი პასუხი 15 დეკემბერს მოუვიდათ. ჯერჯერობით, მადრიდულ კლუბში ინფიცირების სხვა შემთხვევები არ გამოვლენილა.
NBA-ში კი კორონავირუსის ახალი შემთხვევების გამო მდგომარეობა უფრო და უფრო რთულდება _ მას შემდეგ, რაც “ჩიკაგო ბულსის” მატჩების სახით NBA-ს მიმდინარე სეზონში პირველი თამაშები გადაიდო, “ბრუკლინ ნეტსის” სიტუაციაც დამძიმდა, “მილუოკი ბაქსს” კი თავისი მთავარი ვარსკვლავი, იანის ანტეტოკუნმპო აკლდება.
პოლ მილსეპი ე. წ. “პროტოკოლ-ლისტში” ორშაბათს შეიყვანეს. სამშაბათს იგივე ბედი ელოდათ ჯეიმს ჰარდენს, ბრიუს ბრაუნს, ლამარკუს ოლდრიჯს, დეანდრე ბემბრის, ჯეივონ კარტერსა და ჯეიმს ჯონსონს. შესაბამისად, “ბრუკლინმა” “ტორონტოსთან” საშინაო მატჩი მხოლოდ რვა მოთამაშით ჩაატარა. კიდევ ერთი კალათბურთელის გამოკლება და თამაში არ შედგებოდა.
“მილუოკი ბაქსი” თავისი საუკეთესო კალათბურთელის გარეშე ითამაშებს. იანის ანტეტოკუნმპო და ვეს მეტიუზიც პროტოკოლ-ლისტში არიან.
“ლოს ანჯელეს ლეიკერსში” პოზიტიური კოვიდ-ტესტის გამო ვარჯიში აღარ ჩატარდა. მოგვიანებით გუნდმა დაადასტურა, რომ კოვიდ-19 ტეილენ ჰორტონ-ტაკერს დაუდასტურდა. ცოტა ხნის შემდეგ, დუაიტ ჰოვარდი და მალიკ მონკიც იმ სიაში აღმოჩნდნენ და დიდი შანსია, რამდენიმე მატჩი გამოტოვონ.
რამდენიმე დღის წინ “ბარსელონას” პრეზიდენტი ჟოან ლაპორტა საფეხბურთო აგენტ მინო რაიოლას შეხვდა და ერლინგ ჰაალანდის ტრანსფერის შესახებ ისაუბრეს.
გუშინ გამოცემამ “მუნდო დეპორტივო” გაავრცელა ინფორმაცია რომ “ბარსელონას” პრეზიდენტმა რაიოლას სთხოვა, რომ საკომისიოს ოდენობა შეამციროს, რომელსაც ტრანსფერის სანაცვლოდ ითხოვს. ლაპორტა რაიოლას დაჰპირდა, რომ ნორვეგიელი თავდამსხმელი “ბარსელონაში” ჩავის ხელმძღვანელობით პროექტის უმნიშვნელოვანესი ნაწილი იქნება. ერლინგ ჰაალანდის ტრანსფერი 2022 წლის ზაფხულშია მოსალოდნელი.
ახლო წარსულში ცნობილი ინგლისელი ფეხბურთელი უეინ რუნი შესაძლოა დაბრუნდეს იქ, სადაც კარიერის პირველი ნაბიჯები გადადგა _ საუბარია კლუბ “ევერტონზე”.
გამოცემა “SunSport”-ის მტკიცებით, “ევერტონის” ხელმძღვანელობასა და რუნის შორის კონტაქტი უკვე შედგა და შესაძლოა, ინგლისელმა კლუბის ამჟამინდელი მთავარი მწვრთნელი რაფა ბენიტესი უახლოეს მომავალში შეცვალოს.
კარლო ანჩელოტის შემცვლელად მისული ესპანელის “ევერტონი” პრემიერლიგაში ჩატარებული 16 ტურის შემდეგ 18 ქულით სატურნირო ცხრილში მე-14 ადგილზეა.
უეინ რუნი ამ დროისთვის “დერბი ქაუნთის” მთავარი მწვრთნელია, რომელიც ასევე ძალიან მძიმე მდგომარეობაშია. გუნდს “ჩემპიონშიპში” 4 ქულა აქვს (21 ქულა ფინანსური დარღვევების გამო ჩამოაკლეს) და ცხრილის ბოლო, 24-ე ადგილზე იმყოფება. მიუხედავად ასეთი მძიმე სიტუაციისა, რუნიმ ინტერვიუებში არაერთხელ აღნიშნა, რომ “დერბის” მიტოვებას არ აპირებს, თუმცა “ევერტონი” მის მიმართ განსაკუთრებულ ინტერესს იჩენს.
[sexy_author_bio]
