თალიბანმა ავღანელ ქალებს შორ მანძილზე თანმხლები მამაკაცის – ოჯახის წევრის ან ახლო ნათესავის – გარეშე გადაადგილება აუკრძალა. ამის შესახებ ინფორმაციას France24 წერს.
როგორც გამოცემა წერს, ახალი განკარგულება ზნეობრიობის დაცვის და ცოდვის აღმოფხვრის სამინისტრომ – თალიბანის „მორალის პოლიციამ“ გამოსცა.
გამოცემის ინფორმაციით, მარტო გადაადგილებას ქალები მხოლოდ 72 კილომეტრის მანძილზე შეძლებენ, უფრო დიდ მანძილზე მოგზაურობა კი მათთვის მხოლოდ მამრობითი სქესის ახლო ნათესავის თანხლებით იქნება ნებადართული.
„ქალები, რომლებიც 72 კილომეტრზე უფრო შორს მოგზაურობას აპირებენ, თან აუცილებლად მამაკაცი უნდა ახლდეთ“ – განაცხადა სამინისტრომ პრეს-სპიკერმა სადიყ მუჰაჯირმა.
ცნობითვის, სამინისტრომ ავღანურ ტელეარხებზე ფილმების და სერიალების ჩვენება აკრძალა, რომლებშიც ქალი მსახიობები თამაშობენ. ამასთან, „ზნეობრიობის“ უწყებამ ქალ ტელეწამყვანებს ჰიჯაბის ტარების ვალდებულება დააკისრა.
ასევე „თალიბანის“ რეგულაციის მიხედვით, მანქანების მფლობელებს ეკრძალებათ ქალების ტრანსპორტით უზრუნველყოფა თუ მათ არ აცვიათ ჰიჯაბი.
უფლებადამცველები აცხადებენ, რომ ეს მორიგი ნაბიჯია ქალების ტყვეებად გადაქცევის გზაზე. ძალაუფლების მოპოვების შემდეგ „თალიბანმა“ ავღანეთში ქალებს მუშაობა და სწავლა აუკრძალა. ამასთან, აკრძალულია ქალების ტელესერიალებში გამოჩენა. თალიბები აცხადებენ, რომ აკრძალვები დროებითია და იქამდე იმოქმედებს, სანამ ქალებისთვის სამუშაო ადგილები და სკოლები უსაფრთხო არ გახდება.
ტერორისტული ორგანიზაცია ავღანეთის ხელისუფლებაში 2021 წლის აგვისტოში, ქვეყნის დასავლური სამხედრო მისიის დატოვების შემდეგ მოვიდა.
თალიბანის ლიდერები აცხადებდნენ, რომ მათი მმართველობის წინა პერიოდისგან განსხვავებით, ამჯერად ქალთა უფლებებს პრიორიტეტს მიანიჭებდნენ – „შარიათის ფარგლებში“. საერთაშორისო უფლებადამცველი ორგანიზაციები აცხადებენ, რომ, დაპირების მიუხედავად, თალიბანი ქალების უფლებებს სისტემატურად ზღუდავს.
