„ახალგაზრდა თვითმმართველობა საფრთხეშია“: ხმაური ოზურგეთის საკრებულოს სხდომაზე

28  დეკემბერს, ოზურგეთის მუნიციპალიტეტის საკრებულოს რიგგარეშე, ხმაურიან სხდომაზე, საკრებულოს თავმჯდომარის მიერ,  დღის წესრიგის წაკითვის შემდეგ, სიტყვით გამოსვლა ითხოვა ნაციონალმა დეპუტატა დავით  მჟავანაძემ.

_ბატონო დავით, ერთ წუთში ჩავეტევი, გთხოვთ მომცეთ სიტყვა. ეს ეხება ჩვენს საკრებულოს, მუნიციპალიტეტს, ჩვენს მომავალ მუშაობას. წინააღმდეგ შემთხვევაში მომიწევს რეგლამენტის დარღვევა, – მიმართა დავით მჟავანაძემ საკრებულოს თავმჯდომარეს, დავით დარჩიას.

თავმჯდომარემ უპასუხა, რომ იქნება ბიუჯეტის პროექტის მოსმენა, კითხვებიც , დებატებიც და გააფრთხილა, საკრებულოს დღის წესრიგის რეჟიმს დამორჩილებოდა.

_გამაფრთხილე, კარგი… მაშინ მომიწევს  რეგლამენტის დარღვევა. მინდა,  გამოვეხმაურო 3 დეკემბრის  ოზურგეთის საკრებულოს გადაწყვეტილებას,  (აღნიშნულ სხდომაზე გამოიძახეს პოლიცია და მჟავანაძე ფოთის იზოლატორში აღმოჩნდა. ავტ.)   როცა ადგილი არ ჰქონდა არც სისხლის სამართლის დანაშაულის ნიშნებს, არც ადმინისტრაციულ დარღვევას. საკრებულოს თავმჯდომარის მოვალეობის შემსრულებელმა კი შენობაში პოლიციის შემადგენლობა გამოიძახა და შემდეგ მისცა  ცრუ ჩვენება, საკრებულოს წევრის მიმართ. ამის შემდეგ კი მე მომიწია ფოთის იზოლატორში ერთი ღამის გათევა. ეს თქვენთვის შეიძლება პრობლემა არ იყოს, მაგრამ პრობლემა არის ის, რომ საფრთხის ქვეშაა ახალგაზრდა თვითმმართველობა და დემოკრატია. რამდენიც უნდა იუაროთ, აქ არის სასამართლოს გადაწყვეტილება, რომელმაც უარყო ეს ყველაფერი _ ამ სიტყვებით და ხელში სასამართლოს გადაწყვეტილებით, მჟავანაძე  მივიდა ლავრენტი ბიგვავასთან, რომელიც დავით დარჩიას გვერდით იჯდა.

_ახლა ნუ მიმაღებინებთ ზომებს, _უთხრა მას დავით დარჩიამ.

_ცრუ ჩვენება თუ დაგჭირდეთ, აგერ არის ბატონი ლავრენტი. საქმე იმაშია, რომ შეიქმნა პრეცედენტი, რომ ოზურგეთის საკრებულოდან გააძევეს წევრი, რომლის სიტყვაც არ მოეწონათ. ვიმეორებ ამით საფრთხე ექმნება ახალგაზრდა თვითმმართველობას…თქვენ  შეგიძლიათ,  ყველაფერი დამაბრალოთ!  _ არ ცხრებოდა მჟავანაძე.

პასუხად კი დარბაზში „ქართული ოცნების“  დეპუტატების ხმა ისმოდა: „დაჯექი ახლა, ხელს ნუ უშლი საკრებულოს მუშაობას“, „გვაცალე მუშაობა“, „კმარა მასხარაობა“…

საკრებულოს თავმჯდომარის პირველ მოადგილეს, ლავრენტი ბიგვავას მჟავანაძისთვის და  ასევე ნაციონალი დეპუტატების რეპლიკებზე  პასუხი არ გაუცია, გარდა ერთი შემთხვევისა.  როცა   ნაციონალმა  დეპუტატმა  შალვა თავდიშვილია მისი მისამართით თქვა: „შენ დეიღუპე,  ლავრენტი,  საცხა“,  ბიგვავამ პასუხად მიაგება: „დეიღუპე და გადაშენდი შენ“.

[sexy_author_bio]