“მეგობრებო! ვიყოთ რეალისტები“ – ეპიდემიოლოგი ელზა სიმონიშვილი

ოზურგეთის ჯანდაცვის ცენტრის ეპიდემიოლოგი ელზა სიმონიშვილი სოციალურ ქსელში სტატუსს აქვეყნებს, რომელსაც “გურია ნიუსი“ უცვლელად გთავაზობთ.

“საინტერესო დროში ცხოვრება გვარგუნა უზენაესმა: დღემდე უცნობი ვირუსული პანდემიის ეპოქაში.

თუმცა, კაცობრიობის ისტორიაში ყოფილა ,,ჟამიანობის” ბევრი მძიმე პერიოდი, როცა მილიონობით სიცოცხლე შეუწირავს ვერაგ ვირუსს.

ამჟამინდელი რეალობაც დამაფიქრებელია:

,,ომიკრონის” აღზევებაა საქართველოსა და დანარჩენ მსოფლიოში.

წინასწარი პროგნოზირებით, თებერვლის პირველი ნახევრისთვის ჩვენს ქვეყანაში 60-ათას ინფიცირებულს ველოდებით დღიურად.

ამ დროს საქართველოში:

-პირბადის ტარების მაჩვენებელი-35%;

-სრულად აცრილთა პროცენტული მოცვა–40%;

-კოვიდ-კლინიკებში სავარაუდო ნოზოკომიური ინფიცირების დამძიმებული შემთხვევები;

-ბავშვთა ასაკობრივ კონტიგენტში დაფიქსირებული კოვიდ-ინფიცირების შემთხვევები და ჯერ-ჯერობით ერთეული, მაგრამ სერიოზული გართულებები;

-სხვადასხვა ტიპის პოსტკოვიდული გამოვლინებები, რომელთა პირისპირ მოსახლეობა ფაქტიურად მარტო აღმოჩნდა;

-მწირი, ჯერ-ჯერობით მხოლოდ პრაქტიკულ -კლინიკურ დაკვირვებებზე დაფუძნებული ვირუსთან ბრძოლის გამოცდილება;

-გადაღლილი სამედიცინო პერსონალი…

არა გვაქვს:

-ვირუსის საწინააღმდეგო პრეპარატი- სპეციფიური მკურნალობისათვის;

-სამეცნიერო მტკიცებულებებზე დაფუძნებული ამომწურავი ინფორმაცია პანდემიის გამომწვევი ვირუსისა და მისი მუტანტების, ან მოსალოდნელი მუტაციების შესახებ;

-მონაცემები დაავადების ყველა სპეციფიური სიმპტომის, მიმდინარეობის,კლინიკური გართულების შესახებ;

-პოსტკოვიდური სინდრომის კლასიკური მიმდინარეობის მეცნიერულად დასაბუთებული სრული სამედიცინო აღწერილობა;

თუმცა, გვაქვს:

-ავტორიზებული -ანუ საგანგებო სიტუაციებში, პანდემიისას გამოსაყენებელი სხვადასხვა ტიპის ვაქცინა, რომელთა ეფექტურობამ ომიკრონამდელი შტამების შემთხვევაში, ყველანაირი სამედიცინო სტატისტიკით ძალიან შთამბეჭდავი დადებითი შედეგები გამოიღო;

-ბუსტერ, ანუ მასტიმულირებელი დოზირების შესაძლებლობა, რომლის ეფექტურობა ომიკრონის შემთხვევაში 70-75%-მდეა.

-ჯანმოს მიერ შემუშავებული კოვიდ-რეგულაციები, რომელთა ზედმიწევნით დაცვა რეალურად გვიცავს ინფიცირების რისკისაგან.

მაშ ასე, არჩევანი ჩვენზეა!

-რეალურად შევაფასოთ ჩვენს ირგვლივ არსებული რისკები;

-ავწონ-დავწონოთ დღევანდელ საქართველოსა და მსოფლიოში არსებული სიტუაცია; ინფიცირების შანსები და შემდგომი კლინიკური გართულებები;

-გადავხედოთ მძიმე სტატისტიკას;

ვიაზროვნოთ რეალურად და სწორედ ამ რისკების გათვალისწინებით გადავწყვიტოთ, რომ

-ავიცრათ და ჩვენს ორგანიზმს ჰქონდეს სპეციფიური ანტისხეულები მოსალოდნელი ახალი ტალღის შემოტევამდე;

-დავიცვათ კოვიდ-რეგულაციები:

-ვატაროთ ნიღაბი (თავშეყრის ადგილებში უკვე სასურველია-ორმაგი!)

-დავიცვათ დისტანცია;

-დავიცვათ პირადი ჰიგიენა(განსაკუთრებით ხელების!);

-სიმპტომების გამოვლენისას მივმართოთ ექიმს;

– ჩავიტაროთ ტესტირება კოვიდ-სტატუსის დასადგენად;

-ნეგატიური პასუხის შემთხვევაში თუ სიმპტომები გვიგრძელდება, მოვერიდოთ გარშემომყოფებს და სიმპტომების ალაგებამდე ვეცადოთ ვიყოთ სახლში;

მეგობრებო! ვიყოთ რეალისტები, გვახსოვდეს, რომ უმძიმესი ინფექციური დაავადების შემოტევები მხოლოდ ვაქცინაციის დახმარებითა და სამედიცინო რეკომენდაციების გათვალისწინებით დაამარცხა კაცობრიობამ.

გაითვალისწინეთ მედიკოსების რჩევები და რეკომენდაციები და გჯეროდეთ:

ეს განსაცდელიც დასრულდება, _ წერს ეპიდემიოლოგი.