ლანჩხუთის საკრებულოს თანამდებობის პირებისთვის სახელფასო ანაზღაურების მატება ფაქტობრივად, უკვე გადაწყვეტილი საქმეა. ადგილობრივ წარმომადგენლობით ორგანოში ადმინისტრაციული წარმოება უკვე დაწყებულია და საკითხი დარგობრივ კომისიებსა თუ ფრაქციებში განხილვას გადის. აღნიშნული ინფორმაციის გაჟღერებას კი მოქალაქეთა მხრიდან მკვეთრად კრიტიკული შეფასებები მოჰყვა.
განსაკუთრებულ უკმაყოფილებას კულტურის სფეროსა და საბავშვო ბაღის თანამშრომლები გამოხატავენ.
“ეს ფაქტი საქართველოს მასშტაბით დაამტკიცა “ოცნების” ხელისუფლებამ. მიმაჩნია, რომ ეს არის დაქცეული და წაქცეული ქვეყნის ბიუჯეტის დატაცება, გაღატაკებული ხალხის ხარჯზე. სირცხვილი! რას აკეთებენ, უსაქმურად სხედან და ირთობენ თავს. გაკეთებული საქმე მე არ მინახავს. ყველამ საკუთარი თავისთვის იბრძოლა და არა ხალხისთვის.
ჩემმა თანამშრომლებმა ადგილობრივ ხელისუფლებას ხელფასის მომატება რომ თხოვეს, მუქარით უპასუხეს, თქვენ ხელისუფლების მხარდამჭერი და ერთგული არ ყოფილხართო. დააკვირდით, სოციალურ ქსელში ვინც სიმართლეს ამბობს, ხელისუფლების წარმომადგენლები ჩაქოლვასა და დამცირებაზე გადადიან. ამიტომაც “ქართულმა ოცნებამ” ეს ხალხი დიდი ხელფასებით დააჯილდოვა. შედეგიც სახეზეა”, _ ასეთ შეფასებას აძლევს თანამდებობის პირებისთვის ანაზღაურების მატებას თემურ ფირცხალაიშვილის სახელობის შემოქმედთა მუზეუმის ხელმძღვანელი დარეჯან ბიწაძე.
კულტურის სფეროს მუშაკის ია ჯიჯიეშვილის პოზიცია ასეთია: “ნეტავ, ვიცოდე კულტურის სფეროს არსებობა თუ არის ვინმესთვის ცნობილი… ახლა ჩვენს თვიურ სარგოს გადახედეთ… იქნებ ჩვენზეც იფიქროთ… ჩვენი საქმეც არანაკლებ საპასუხისმგებლოა და ბევრ შრომასაც მოითხოვს და კიდევ ამდენი მოადგილე არ გეზედმეტებათ?!”
“როგორ დავიჯერო, რომ კულტურას არანაირი წვლილი არ მიუძღვის არანაირ წინსვლაში?! გაიხსენეთ ისტორია, ომის დროს ლაშქარი სიმღერით მიდიოდა საომრად. განა სულ ახლახან არ იყო, საშინელ ავდარში, ღია ცის ქვეშ ვიდექით, რომ თქვენთვის კალანდობა მოგველოცა და ქალაქი გაგველამაზებინა. იცით, ხელფასი რამდენი გვაქვს?! 120 ლარი, რომელიც წამლისთვის არ გვეყო. ჩვენც გვაქვს ოჯახი. ის მაინც არ შეიძლებოდა, თუნდაც 2 ცალი კანფეტით მოგელოცათ კულტურის მუშაკებისთვის ახალი წელი?! რატომ ამოგვშალეთ სიიდან?! ჩვენი წარმატება განა რაიონის სახელი არ არის?! თუ მერიის თანამშრომლებს შეიძლება 5000, 3000 და ასე შემდეგ გქონდეთ ხელფასი, რა დავაშავეთ ჩვენ კულტურის მუშაკებმა, სულ მცირე 500 ლარი რომ გვქონდეს?! 5000 ლარს რომ აიღებთ და არ გყოფნით, ნუთუ, ფიქრადაც არ მოგივათ, 120 ლარად როგორ უნდა არჩინო 5-სულიანი ოჯახი დღევანდელ პირობებში, როცა ყველაფერს ცეცხლის ფასი აქვს. გული კინაღამ გამისკდა, ჩემი შვილიშვილი სკოლიდან სველი ფეხით რომ მოვიდა, იმიტომ რომ, უბრალოდ “ვალინკები” არ ჰქონდა. განა ჩვენ, კულტურის მუშაკები ყველა თქვენს დაძახილზე თქვენ გვერდით არ ვდგავართ?! იქნებ, იფიქროთ ინტრიგანიაო. არა, ჩემო კარგებო, სულაც არა ვარ ინტრიგანი, უბრალოდ, ნერვებმა მიმტყუნა იმის მოლოდინში, იქნებ ხელფასები მოგვიმატონ-მეთქი. სიმღერასაც შრომა უნდა, რომელიც ზოგიერთებს ასე იოლი გგონიათ. ზოგჯერ ჩვენც საჭირო ხალხი ვართ!” _ გულისტკივილით წერს სოციალურ ქსელში ტრიო “ცის იერის” ერთ-ერთი წევრი ლამარა აბშილავა-ხუხუნი.
“ბაღის თანამშრომლები მინიმალურ ხელფასს ვიღებთ და ესენი 2, 3, 4 ათასებს არ ჯერდებიან. კარგი იქნება, რომ ბაღის თანამშრომლებსაც მოუმატონ, ყველაზე დაბალი ანაზღაურება აქვთ. იქნებ ვინმეს მაინც გაახსენდეს, ან პოზიციას, ან ოპოზიციას. არსებობა უკვე წარმოუდგენელია ამ ფასების ფონზე. არანაკლებ საპასუხისმგებლო საქმეს ვემსახურებით.
სამწუხარო ისაა, რომ გაურკვევლობაში ვართ, საერთოდ ხალხის სიაში თუ ვართ ნეტა? არსებობა ხომ გვჭირდება? ჩვენ არაფერს გასაოცარს არ ვითხოვთ, მხოლოდ მინიმალურს არსებობისთვის.
მთელი თვე 280 ლარს ველოდებით ,როგორ არ შემრცხვეს ამ რიცხვის თქმაც კი”, _ უკმაყოფილებას აფიქსირებენ საბავშვო ბაღებში დასაქმებულები.
ლანჩხუთის საკრებულოს თანამდებობის პირებისთვის სახელფასო ანაზღაურების მატებას მხარს არ უჭერს ადგილობრივი ოპოზიცია. საკრებულოს ოპოზიციონერმა წევრებმა საკითხთან დაკავშირებით ადმინისტრაციული წარმოებასაც არ მისცეს ხმა. მათი შეფასებით, მაშინ, როცა, მუნიციპალიტეტის მერიებსა და საკრებულოებში ხელფასების ზრდის პროცესია დაწყებული მთელი საქართველოს მასშტაბით და ისედაც შედარებით ნორმალურ ანაზღაურებებს კიდევ უფრო ზრდიან თვითმმართველობებში, მხოლოდ 10%-ით გაუზარდა ხელფასები საბავშვო ბაღის თანამშრომლებსა თუ მეეზოვეებს, რაც, დაახლოებით, 30 ლარით ზრდას ნიშნავს, ეს, უბრალოდ, დაცინვაა ამ ადამიანების მიმართ.
“ოპოზიციის წარმომადგენლებმა საკრებულოში არაერთხელ დავსვით ბაღის და სხვა აიპი-ების თანამშრომელთა ხელფასების გაზრდის საკითხი. გვპირდებიან, რომ 10 პროცენტით გაეზრდება ყველას ხელფასიო, თუმცა, მიგვაჩნია, რომ ეს საკმარისი არაა და ვითხოვთ, მინიმუმ 30-პროცენტიან ზრდას. თუმცა, იმდენად გაბერილია ამ სამსახურების შტატები, ძალიან ძნელია, რაიმეს პროგნოზირება. მერწმუნეთ, აუცილებლად დავიცავთ ბაღების და სხვა სამსახურების თანამშრომელთა უფლებებს, მაგრამ ვინაიდან უმცირესობაში ვართ, რამდენად გავიტანთ ამ მოთხოვნებს, ვერ გეტყვით. ცდას ნაღდად არ დავაკლებთ, ამის იმედი გქონდეთ”, _ პირობას იძლევიან საკრებულოს ოპოზიციონერი წევრები.
ცნობისთვის, მერებისა და საჯარო სექტორში დასაქმებულთათვის ანაზღაურების გაორმაგება მთავრობამ ჯერ კიდევ გასული წლის აგვისტოში, თვითმმართველობის არჩევნებამდე დააანონსა. ლანჩხუთის საკრებულოს თავმჯდომარის ხელფასი, რომელიც 2 650 ლარით განისაზღვრებოდა, 4 510 ლარამდე იზრდება. თავმჯდომარის პირველი მოადგილის ხელფასი 3 410 ლარი იქნება, ხოლო კიდევ ორი მოადგილის _ 2 970 ლარი.
თუ აქამდე დარგობრივი კომისიებისა და ფრაქციათა ხელმძღვანელთა ანაზღაურება 1 700-1 700 ლარით განისაზღვრებოდა, ცვლილების დამტკიცების შემდეგ კომისიის თავმჯდომარის ხელფასი 2 420 ლარამდე იზრდება, ფრაქციის თავმჯდომარის კი 2 200 ლარი იქნება. ლანჩხუთის საკრებულოში კი ხუთი დარგობრივი კომისია და სამი ფრაქციაა. 1 250 ლარის ნაცვლად 1 760 ლარი იქნება ფრაქციის თავმჯდომარის მოადგილის ხელფასი. ასეთი კი რვა თანამდებობის პირია ლანჩხუთის საკრებულოში, აქედან ექვსი “ოცნების” ფრაქციაში იკავებს მოადგილის პოსტს.
[sexy_author_bio]
