პეკინისკენ მიმავალი პოლონეთის პრეზიდენტი საქართველოში შეჩერდა. ანჟეი დუდას ტრანზიტული რეისი თბილისის აეროპორტში სალომე ზურაბიშვილთან შეხვედრით გაგრძელდა. შეხვედრა უკრაინის შესახებ ორი ქვეყნის პრეზიდენტის განცხადებით დასრულდა.
სალომე ზურაბიშვილმა თავის გამოსვლაში თქვა, რომ რუსეთის პოლიტიკა პროვოკაციულია, რასაც დასავლეთი მოლაპარაკებების მცდელობებით პასუხობს, თუმცა დეესკალაცია ორივე მხარის მზადყოფნას მოითხოვს:
„ამ ძალიან დაძაბულ ვითარებაში მე მინდა, რომ საქართველოს სახელით გამოვხატო ჩვენი სრული სოლიდარობა მეგობარი უკრაინის მიმართ და არა მხოლოდ უკრაინის მიმართ, რამეთუ ის საფრთხეები, რაც არსებობს, რეალურად არის საფრთხეები, რომელიც ემუქრება მთლიანად ევროპის უსაფრთხოებას და თუ ვლაპარაკობთ ევროპის უსაფრთხოებაზე, ეს ასევე არის ჩვენი უსაფრთხოება.
ჩვენი სოლიდარობა, სხვათა შორის, არ არის მხოლოდ სიტყვიერი სოლიდარობა, ეს არის სოლიდარობა იმ ქვეყნიდან, რომელმაც უკვე განიცადა და განიცდის დღემდე ოკუპაციას და ამიტომ, ჩვენ კარგად გვესმის, თუ რას გრძნობს დღეს უკრაინელი ხალხი და ჩვენ ამას მთლიანად ვიზიარებთ“, _ განაცხადა ზურაბიშვილმა.
პოლონეთის პრეზიდენტმა ანჟეი დუდამ განაცხადა, რომ მისთვის მნიშვნელოვანია, საქართველოს გაუზიაროს ის ინფორმაცია უკრაინასთან დაკავშირებით, რაც ევროკავშირს ამ ეტაპზე აქვს. გარდა ამისა, მან ხაზი გაუსვა ორი ქვეყნის მეგობრობას და გაიხსენა 2008 წლის ომის დროს პოლონეთის იმჟამინდელი პრეზიდენტის, ლეხ კაჩინსკის ვიზიტი საქართველოში:
„საქართველოს აქვს ტრაგიკული გამოცდილება რუსეთთან დაკავშირებით. ჩემთვის ძალიან მნიშვნელოვანია, ვინაიდან, ქალბატოaნმა პრეზიდენტმა თავისი მოსაზრება ამ საკითხთან დაკავშირებით ძალიან მკაფიოდ აღნიშნა. ჩემთვის ძალიან მნიშვნელოვანია ერთობლივი კონსულტაციები და მეტი ძალისხმევა, რასაც დიდი მნიშვნელობა აქვს უკრაინის უსაფრთხოებისთვის. ჩვენ გამოვხატავთ სოლიდარობას და ჩვენთვის მნიშვნელოვანია უსაფრთხოებასთან დაკავშირებული საკითხები“, _ თქვა პოლონეთის პრეზიდენტმა.
შეგახსენებთ, რომ პოლონეთის პრეზიდენტი ანჟეი დუდა პეკინისკენ ტრანზიტით მგზავრობისას რამდენიმე საათით შეჩერდა თბილისში.
[sexy_author_bio]
