ომიკრონის ახალი ქვევარიანტი მეცნიერთა ყურადღების ცენტრში ექცევა
კოვიდ-19-ის ახალი შტამი, ომიკრონი, უკვე დომინანტ შტამად ითვლება მთელ მსოფლიოში და სპეციალისტთა შეფასებით, მცირე დროში გაცილებით უფრო მეტ ადამიანს აინფიცირებს, ვიდრე კორონავირუსის სხვა შტამები. პირველად ის სამხრეთ აფრიკის ერთ-ერთ პროვინციაში გამოვლინდა და შემდეგ მთელი მსოფლიო მოიცვა. ჯანდაცვის მსოფლიო ორგანიზაციამ ვირუსს, როგორც B.1.1.529-ს, ბერძნული ანბანის მე-15 ასოს სახელი, ომიკრონი მიანიჭა.
ინფექციური საავადმყოფოს დირექტორის, თენგიზ ცერცვაძის განმარტებით, ომიკრონის შემთხვევაში იშვიათია გემოსა და ყნოსვის დაკარგვა და ვირუსის ამ ვარიანტს ის სიმპტომები ახასიათებს, რაც სხვა წინამორბედ შტამებთან ნაკლებად გვხვდებოდა:
„ომიკრონი უფრო ხშირად იწყება ისეთი სიმპტომებით, როგორებიცაა სურდო, ყელში ჩაკაწვრის გრძნობა და ყელის ტკივილი, თავის ტკივილი, სისუსტე. ეს არის პირველი ძირითადი სიმპტომები, როდესაც „დელტა“ და სხვა შტამების დროს განსხვავებული სიმპტომები იყო“ – აცხადებს თენგიზ ცერცვაძე.
მიუხედავად იმისა, რომ კოვიდ-19-ის ეს ვარიანტი გავრცელების თვალსაზრისით ყველაზე აქტიურია და მისი დადებითობის დღიური მაჩვენებელი საქართველოში 30%-იან ზღვარს სცდება, არსებული მონაცემებით მოსახლეობის უდიდეს ნაწილს ძალიან მსუბუქად გადააქვს.
როდესაც ვირუსები მუტაციას განიცდიან, ისინი იყოფიან ახალ ვარიანტებად და ვარიანტების ქვევარიანტებად. იგივე მოხდა Omicron-თან დაკავშირებით, რომელიც მოიცავს BA.1, BA.2, BA.3 და B.1.1.529 ქვევარიანტებს.
ჯანდაცვის მსოფლიო ორგანიზაციის (WHO) მონაცემებით, 25 იანვრის მდგომარეობით GISAID-ის გლობალურ მონაცემთა ბაზაში წარმოდგენილი ვირუსული დნმ-ის თითქმის 99% იდენტიფიცირებული იყო BA.1 ქვევარიანტად. მიუხედავად იმისა, რომ BA.1 და BA.2 მსგავსია, ისინი ერთმანეთისგან 20 მუტაციით არიან დაშორებული.
მეცნიერთა ყურადღების ცენტრში სწორედ ომიკრონის ეს უკანასკნელი ქვევარიანტი მოექცა, რადგან მათი განმარტებით, ის გაცილებით მარტივად ვრცელდება და ასევე მარტივად აღწევს თავს ვაქცინებს.
დანიის SSI-ს მიერ 18000 ინდივიდზე ჩატარებულმა კვლევამ აჩვენა, რომ BA.2 იყო “არსებითად” უფრო გადამდები ვიდრე BA.1.
გაერთიანებული სამეფოს კვლევამ ასევე დაადგინა BA.2-ის უფრო მაღალი გადაცემადობა BA.1-თან შედარებით.
მიუხედავად ამისა, ბევრი ექსპერტი ამბობს, რომ ჯერჯერობით არ არსებობს საკმარისი არგუმენტები იმის დასამტკიცებლად, იწვევს თუ არა ომიკონის ეს ქვევარიანტი უფრო მძიმე ავადობას, ვიდრე სხვა ქვევარიანტები.
„ჩვენ ვერ ვხედავთ ჰოსპიტალიზაციაში მოსალოდნელზე უფრო მაღალ დარტყმებს“ – ამბობს ჯანმო-ს დოქტორი ბორის პავლინიც.
როგორც წინა ვარიანტების შემთხვევაში, ექსპერტები თვლიან, რომ ვაქცინები კვლავაც ეფექტური იქნება მძიმე ავადმყოფობის, ჰოსპიტალიზაციისა და სიკვდილის წინააღმდეგ და მოსახლეობას აცრისკენ მოუწოდებენ.
