ახლახან „გურია ნიუსი“ წერდა, ოზურგეთში, სახოკიას ქუჩაზე არსებული მძიმე მდგომარეობის შესახებ. აქ ყოველი წვიმის დროს, არსებული წყალგამტარი ჭებიდან გადმოდის ბინძური მასა. მათ შორის, ფეკალიები და ქუჩის დატბორვის შემდეგ, იქვე, მოსახლეობის ეზოში გადადის, საიდანაც უერთდება მდინარეს.
_აუტანელ მდგომარეობაში ვართ. რაც შეგვიძლია, ვასუფთავებთ აქაურობას. არაერთხელ ალერგია მომცა, ცუდად გავხდი. ორი საკანალიზაციო ჭა არის გზის ამ მონაკვეთზე და გაწვიმების დროს, ორივეგან ისე გადმოდის წყალი, მანქანებსაც უჭირთ გავლა. იქნებ, რაიმე იღონონ. არ მგონია, ეს მხოლოდ წვიმის ბრალი იყოს. სადღაც რაღაც ან გაჭედილია მიწისქვეშა საკანალიზაციო ქსელში, ან ახალია გასაკეთებელი, თუ ეს არხები მართლა ვერ აუდის წყლის და ფეკაალური მასის გატარებას, _ გვითხრა იქვე მცხოვრებმა, ქართულ-უკრაინული სასწავლებლის ხელმძღვანელმა, მაკა ბრეგვაძემ. იგივე თქვეს იქვე მცხოვრებმა და მომუშავე ადამიანებმაც.
ჩვენ მივმართეთ წყალმომარაგების ოზურგეთის კომპანიის ხელმძღვანელს შალვა კონჯარიას.
_სახოკიას ქუჩაზე არსებული მდგომარეობა არ არის მიწისქვეშა ქსელის გაჭედვის ან მწყობრიდან გამოსვლის ბრალი. ასე რომ იყოს კარგ ამინდშიც გადმოვიდოდა წყალი. ამ მხარეს ყველაზე მეტი დატვირთვა უწევს, რადგან ბოლო წერტილია. ვერ ატარებს სრულად არხი წყალს, როცა წვიმაც არის. მით უფრო თუ თოვს. გაიზარდა ქალაქი, მოსახლეობაც მოემატა და არხებსაც მეტი დატვირთვა უწევს. შესაცვლელია და ახალია გასაკეთებელი. უფრო უნდა გაფართოვდეს მიწისქვეშა არხები და გამტარუნარიანობაც მეტი იქნება. ეს საკითხი დღის წესრიგში დგას. ჩვენ გამოძახებული გვყავს საპროექტო ჯგუფი თბილისიდან და მალე მოხდება შეცვლა. თუმცა, უახლოეს დღეებში ეს შეუძლებელია. ვიცით, პანდემიაა, ხელისშემშლელი სხვა ფაქტორებიც არსებობს – იყო ძალიან ცუდი ამინდები. გავაკეთებთ აუცილებლად. ცოტა ხანს კი, წვიმების დროს, როგორმე უნდა გავუძლოთ ასეთ მდგომარეობას, _ თქვა „გურია ნიუსთან“ შალვა კონჯარიამ.
იმედია, სახოკიას ქუჩის პრობლემა მოგვარდება. თუმცა, წვიმები(მით უფრო, წელიწადის ამ დროს) ხშირად არის მოსალოდნელი და როგორი ასატანია ყოველ გაწვიმებისას, ფეკალიებით ავსებული ქუჩის და ეზოს ატანა, არაა ძნელი მისახვედრი.
ამავე თემაზე:
ოზურგეთში სახოკიას ქუჩა იტბორება
[sexy_author_bio]
