რუსეთის პრეზიდენტმა ვლადიმერ პუტინმა ხელი მოაწერა განკარგულებას, რომლითაც რეზერვში მყოფი რუსეთის მოქალაქეები სამხედრო წვრთნებზე 2022 წელს გამოიძახეს, _ ამის შესახებ ინფორმაციას TACC ავრცელებს.
ბრძანების თანახმად, აღმასრულებელი ხელისუფლების შესაბამის ორგანოებს დაევალა უზრუნველყოს სამხედრო წვრთნაზე მოქალაქეების გაწვევასთან და წვრთნების ჩატარებასთან დაკავშირებული ღონისძიებების გახორციელება.
“რეზერვში მყოფი რუსეთის ფედერაციის მოქალაქეები გამოძახებული არიან სამხედრო წვრთნების გასავლელად შეიარაღებულ ძალებში, ეროვნული გვარდიის ჯარებში, სახელმწიფო უსაფრთხოების უწყებებსა და უსაფრთხოების ფედერალურ სამსახურში”, – ნათქვამია დოკუმენტში.
Tass-ის ცნობით, შეიარაღებული ძალების რეზერვში მყოფი რუსეთის ფედერაციის მოქალაქეების შეკრება არის დაგეგმილი ღონისძიება რეზერვისტების საბრძოლო უნარების გასაუმჯობესებლად და ყოველწლიურად იმართება. რუსეთის ფედერაციის პრეზიდენტი ხელს აწერს განკარგულებას საწვრთნელ ბანაკებში სარეზერვო სამხედროების გამოძახების შესახებ. სახელმწიფოს მეთაურის განკარგულების საფუძველზე, თავდაცვის სამინისტროს სამობილიზაციო დეპარტამენტი ამზადებს შესაბამის დირექტივას, რომელიც ეგზავნება რეგიონების სამხედრო აღრიცხვისა და გაწვევის სამსახურს. მხოლოდ ამის შემდეგ იწყება რეზერვში მყოფი მოქალაქეებისთვის გამოძახების გაგზავნა.
სააგნეტო, ასევე წერს, რომ რეზერვში მყოფი მოქალაქეების სამხედრო მომზადების ჯამური ხანგრძლივობა არ შეიძლება აღემატებოდეს ორ თვეს. სამხედრო წვრთნების ჯამური ხანგრძლივობა, რომელშიც მოქალაქე ჩართულია რეზერვში ყოფნისას, არ შეიძლება აღემატებოდეს 12 თვეს. გარდა ამისა, რეზერვში მყოფი მოქალაქეები შეიძლება გამოიძახონ სამხედრო მომზადებაზე არა უმეტეს სამ წელიწადში ერთხელ. სამხედრო წვრთნას არ ექვემდებარებიან ძალოვანი სტრუქტურების, სახანძრო სამსახურის, საბაჟოების და „სახელმწიფო ხელისუფლებისთვის დაჯავშნილი“ მოქალაქეების თანამშრომლები და საჯარო მოსამსახურეები. ასევე გაწვევისაგან თავისუფლდებიან საავიაციო და სარკინიგზო ტრანსპორტის თანამშრომლები, საზღვაო და მდინარის ფლოტის გემების მცურავი შემადგენლობა.
ცნობისთვის, რეზერვის სამხედრო წვრთნები ყოველწლიურად იმართება. პუტინმა წინა განკარგულებას ხელი 2021 წლის აპრილში მოაწერა.
