ჩოხატაურის მუნიციპალიტეტის საკრებულოს წევრი გოგი ბოლქვაძე ფეისბუქის საკუთარ გვერდზე უკრაინისადმი სოლიდარობის გამოსახატავად ჩოხატაურელებს შაბათს, 26 თებერვალს, 13 საათზე ხელოვნების სასახლის მოედანზე შეკრებისკენ მოუწოდებს.
“მეგობრებო ამ წუთებში იბომბება ხერსონის ოლქი, ეს ის ხერსონის ოლქია სადაც ხელი მოეწერა ურთიერთთანამშრომლობისა და მეგობრობის მემორანდუმს.
კახოვკა-ჩოხატაური. ჩემო ძვირფასო მეგობრებო, ჩოხატაურელებო, ქართველებო! ჩემი, როგორც ერთი რიგითი მოქალაქის, თხოვნაა ჩოხატაურის სახელით გამოვხატოთ მხარდაჭერა და ერთობლივად დავაანონსოთ სოლიდარობის აქცია. თითოეული თქვენგანის აქციაზე დასწრება ხელს შეუწყობს ჩვენი და ჩვენი ქვეყნის გულწრფელი მხარდაჭერის დემონსტრირებას და გაუგზავნის მსოფლიოს მკაფიო მესიჯს, რომ უკრაინა და საქართველო ერთად დგანან თავიანთი მშვიდობისა და უსაფრთხოების სადარაჯოზე. ეს ომი არ არის მხოლოდ უკრაინის. ეს არის საქართველოს და მთელი რეგიონის ომი. ამიტომ დღეს ეს არის არა მხოლოდ სოლიდარობის გამოხატვა, არამედ მსოფლიო გადანაწილების პროცესში თქმაა იმისა – თუ სად ვართ ჩვენ?! – დიახ, ჩვენ ვართ იქ, სადაც არის საერთაშორისო სამართალი, სამართლიანობა, თავისუფლება და კეთილდღეობა.
მიუხედავად სხვადასხვა პოლიტიკური შეხედულებისა და ყოველგვარი პოლიტიკური სპეკულაციის გარეშე მოვუწოდებ ყველას _ ხვალ ერთად დავდგეთ უკრაინელი ხალხის გვერდით და სოლიდარობა გამოუცხადოთ მათ ამ მძიმე განსაცდელის ჟამს”, _ წერს გოგი ბოლქვაძე.
