ოზურგეთში, სამოქალაქო აქტივისტმა შოთა გოგიბერიძემ (ის პროფესიით იურისტია და წარსულში არაერთ თანამდებობაზე მუშაობდა. ბოლოს კი „პატრიოტთა ალიანსის“ რაიონული ორგანიზაციის თავმჯდომარე და წინა მოწვევის საკრებულოს წევრი იყო) ბრიფინგი გამართა.
ჟურნალისტებთან მან ისაუბრა, რუსეთის მიერ უკრაინის წინააღმდეგ დაწყებულ ომზე. მისი განცხადებით, მსოფლიო შეძრა ოკუპანტის მიერ უკრაინაში დატრიალებულმა ტრაგედიამ და აღნიშნა, რომ ამ ომის საქართველოში გადმოტანის საშიშროება არსებობს.
_უპირობოა, სრულიად ნათელია ჩვენი მხარდაჭერა და სოლიდარობა უკრაინელი ხალხისადმი. ჩვენ, ორ საუკუნეზე მეტი ხნის მანძილზე, არაერთხელ დავუპირისპირდით რუსეთს. ხოლო 30 წლის განმავლობაში, ორჯერ დავღვარეთ უამრავი სისხლი მათთან ბრძოლაში. ახლა, როცა ოკუპაციის რეჟიმში ვიმყოფებით, კარგად უნდა გვესმოდეს, რომ უკრაინაში დაწყებული ომის საქართველოში გადმოტანის დიდი საშიშროება არსებობს. ყველაფერი უნდაგავაკეთოთ ყველამ, რომ ამ გლობალური კრიზისიდან ქვეყანა მშვიდობიანად გამოვიყვანოთ, – თქვა მან.
შოთა გოგიბერიძემ საკუთარი თვალსაზრისი გამოთქვა სხვა მიმდინარე მოვლენებზე და კრიზისზე:
-ასევე მიუღებელია ჩემთვის ჩვენი ქვეყნის არაკეთილმოსურნეების ორკესტრირებული შეტევა ქართული სახელმწიფოს წინააღმდეგ, ზოგის მიერ, რეგიონში შექმნილი უმძიმესი კრიზისის საკუთარი ინტერესებისთვის გამოყენების მცდელობა. ამიტომ ვთავაზობ და მოვუწოდებ ოპოზიციურ ძალებს, გამოცხადდეს სრული მორატორიუმი რადიკალურ დაპირისპირებებსა და რადიკალურ ოპოზიციურ ქმედებებზე. ყველამ ერთად ვიზრუნოთ, მშვიდობისა და სტაბილურობის შენარჩუნებისთვის.
„გურია ნიუსის“ კითხვაზე, ერთგვარად დაუზავდა თუ არა ამ განცხადებით საქართველოს მთავრობას, მან ასეთი კომენტარი გააკეთა:
„პირადად მე ვიზიარებ საქართველოს მთავრობის და „ქართული ოცნების“ სამშვიდობო პოლიტიკას. მოვუწოდებ ყველა სახელმწიფოებრივად მოაზროვნე პატრიოტს, გადავდგათ კონკრეტული ნაბიჯები ერის ერთიანობისა და კონსოლიდაციისკენ. ახლა არ არის შიდა დაპირისპირების დრო. ძალა ერთობაშია“ -განაცხადა მან.
ავტორი: მარინა ჩიხლაძე
