ქართველმა ფეხბურთელმა ხვიჩა კვარაცხელიამ ყაზანის „რუბინი“ უკვე დატოვა და ამჟამად საქართველოს ნაკრების საწვრთნელ შეკრებაზე იმყოფება. დიდი ალბათობით ხვიჩა კარიერას დროებით ბათუმის „დინამოში“ გააგრძელებს, მიმდინარე წლის შემოდგომაზე კი იტალიურ „ნაპოლიში“ ჩაირიცხება.
გუშინ რუსულ მასმედიაში საინტერესო ცნობა გავრცელდა, რომელიც თუ „ფეიქი“ არ გახლავთ, კვარაცხელიას იტალიურ პერსპექტივებს ეჭვის ქვეშ აყენებს.
გამოცემა „Championat.com“-ის ინფორმაციით, იტალიის „სერია A“-ს კლუბებმა, თურმე, მიაღწიეს „ჯენტლმენურ შეთანხმებას“, არ დაიმატონ რუსეთის პრემიერლიგიდან წასული ფეხბურთელები. საუბარია იმ ლეგიონერებზე, რომელთაც 10 მარტის შემდეგ, ფიფას გადაწყვეტილებით, რუსულ კლუბებთან კონტრაქტის ცალმხრივად გაწყვეტა შეუძლიათ.
„Championat.com“ ამგვარი გადაწყვეტილების მოტივსაც ასახელებს – თითქოსდა, იტალიურ კლუბებს სურთ „სერია A“-ს მთლიანობის შენარჩუნება და სეზონის დასკვნით ნაწილში სატრანსფერო ქაოსის თავიდან აცილება.
რაც შეეხება იტალიურ მედიას. გუშინ გამოცემამ „Napolipiu” დაწერა, რომ ქართველი შემტევის გარდა, ნეაპოლური კლუბი კიდევ ორ ფეხბურთელს აკვირდება, გადაწყვეტილების მიღება კი უმოკლეს დროში მოუწევს.
ამ ეტაპზე, უფრო აქტიური საუბრები „ფეიენოორდის“ 22 წლის კოლუმბიელ შემტევ ლუის სინისტერაზეა, რომელსაც მიმდინარე სეზონში 10 გოლი და 5 საგოლე პასი აქვს. მას ეროვნულ ნაკრებშიც იწვევენ. „ნაპოლის“ ხელმძღვანელობის მიერ კიდევ ერთი მონიშნული ფეხბურთელი 22 წლის ბელგიელი ჩარლს დე კატელაერია, რომელიც „ბრიუგეში“ ასპარეზობს და ბელგიის ჩემპიონატში 13 გოლი აქვს.
გუშინ უკრაინის ფეხბურთის კავშირის პირველმა ვიცე-პრეზიდენტმა ანატოლი დემიანენკომ განაცხადა, რომ რუსეთსა და უკრაინას შორის ომის დაწყების შემდეგ, ეროვნული ნაკრების ყოფილმა მწვრთნელმა მიხაილ ფომენკომ მშობლიური სუმის დატოვებაზე უარი თქვა. დემიანენკოს მტკიცებით, 73 წლის მწვრთნელს, რომელიც 1987-89 წლებში ლანჩხუთის „გურიას“ თავკაცობდა, უკრაინის ფეხბურთის ფედერაციიდან საკვები და საჭირო ნივთები გადაეცა – ის ახლა ტერიტორიის დატოვებას ვეღარ ახერხებს:
„გუშინ ვესაუბრე. არსებულ ვითარებაში შეძლებისდაგვარად განწყობა ხალისიანია, თავი კარგად უჭირავს. თავის დროზე, ევაკუაციაზე უარი განაცხადა, რადგან საკუთარ მიწაზე თავს უკეთ გრძნობს.“
უკრაინის ნაკრების ყოფილმა მწვრთნელმა იოჟეფ საბომ კი „Футбол NEWS“-თან უკრაინაში რუსეთის ინტერვენციაზე ისაუბრა:
„ურდო და არამზადა, რომელიც ჩვენს სახელმწიფოს თავს დაესხა – ეს მტარვალები. ჩვენს ხალხს ცარიელი ხელებით შეუძლია ტანკებზე წავიდეს, მათ კი ამ არანორმალური პუტინის შეჩერება არ შეეძლოთ? შეეძლოთ! ჩემი მიზანი – ჩვენი სახელმწიფოდან ყველა რუსის გაყრაა და დაე, ისინი იქ საკუთარ წვენში მოიხარშონ. მე ჩემს შვილებს მოვუყვები, ვინ არიან რუსები და თქვენ ყველამ ეს უნდა გააკეთოთ. მათთან მეგობრობა შეუძლებელია, ისინი მატყუარები არიან. დღეს ამბობენ, რომ ეს ჩვენ დავესხით თავს. რაც ჩვენს სახელმწიფოში ხდება, ამის გამო ყოველ საღამოს ვტირი. ბუდაპეშტიდან და სხვა ქვეყნებიდან დამირეკეს, მიმიპატიჟეს, მაგრამ უარი ვუთხარი, არსად წასვლა არ მინდა. როდესაც საავადმყოფოდან გამოვალ, აუცილებლად ხალხს დავეხმარები, რომლებიც ამას საჭიროებენ. სხვანაირად არ შემიძლია. შესაძლოა, მეც ავიღო ხელში ავტომატი. ძალიან მინდა, მათთან ერთად საზღვრამდე მივიდე და ის ჩავკეტო, რათა არასოდეს ვიმეგობრო რუსებთან.
პუტინი საძაგელია. ვფიქრობ, მასთან მოლაპარაკება შეუძლებელია, მისი მხოლოდ მოკვლა შეიძლება ან თავად მოიკლას თავი. თუ ნორმალური კაცია, უნდა ესმოდეს, რაც უნდა მოხდეს, მაინც მოუწევს ჰააგაში წასვლა, მაინც დახვრეტენ. ასეთი ადამიანები დიდხანს არ ცოცხლობენ,“ – განაცხადა იოჟეფ საბომ.
ფრანგული „პსჟ“-სა და ესპანეთის ნაკრების მცველი სერხიო რამოსი საქველმოქმედო აქციაში ჩაერთო, რომელიც რუსეთთან ომში მყოფი უკრაინელი ხალხის მხარდაჭერას ისახავს მიზნად.
35 წლის რამოსი იმ ჰუდების რეკლამირებას ეწევა, რომლებიც 100 ევრო ღირს და სპეციალური მისიითაა გამოშვებული. ჰუდის წინა მხარეს მშვიდობის სიმბოლო მტრედებია გამოსახული, უკან კი წარწერაა: „ჩვენ ყველანი უკრაინელები ვართ“. აქციიდან მიღებული თანხა სრულად უკრაინელების დასახმარებლად გადაირიცხება.
„სან ანტონიოს სპურსის“ ლეგენდარული მთავარი მწვრთნელი გრეგ პოპოვიჩი უკრაინაში მიმდინარე ომს გამოეხმაურა და ის ვიეტნამის მოვლენებს შეადარა.
„მართალი გითხრათ, ასეთ რთულ პერიოდში კალათბურთზე ფიქრიც კი მიჭირს. ტელევიზორში ვხედავთ ამ საშინელებას – დანგრეულ ქალაქებს, სახლებსა და დახოცილ მოსახლეობას. ეს სიტუაცია გარკვეულწილად 60-70-იან წლებში ვიეტნამის ომს მაგონებს. მახსოვს, იმ ამბებმა ჩემზე რა შთაბეჭდილება მოახდინა. საომარი ამბები ნებისმიერი ნორმალური ადამიანის ცნობიერებაზე დიდ ზეგავლენას ახდენს. წარმოიდგინეთ, როგორია, როდესაც მეუღლე და შვილი საზღვარზე მიგყავს, შენ კი უკან ბრუნდები და აშკარა სიკვდილზე მიდიხარ. მხოლოდ იმიტომ, რომ რუსები ამ სისაძაგლის შეჩერებას არ აპირებენ“.
