გუშინ იტალიურ მასმედიაში გავრცელდა ინფორმაცია რომ დიდი ალბათობით ხვიჩა კვარაცხელია კარიერას მაინც იტალიურ „ნაპოლიში“ გააგრძელებს. ცნობა გამოცემა „Sportitalia“-ს ჟურნალისტებმა ალფრედო პედულამ და ჯანლუიჯი ლონგარიმ გამოაქვეყნეს.
„ნაპოლიმ“ უკვე შეათანხმა „ხეტაფეს“ მცველი მატიას ოლივერას ტრანსფერი და იგივე ეხება ხვიჩა კვარაცხელიასაც. რა თქმა უნდა, კონტრაქტზე ხელის მოწერა საჭიროა, თუმცა, იქამდე მოკლე გზა რჩება“, – დაწერა ალფრედო პედულამ, რომლის ინფორმაცია ასევე ჯანლუიჯი ლონგარიმაც დაადასტურა.
21 წლის ქართველი ფეხბურთელი დაახლოებით 15 მილიონი ევრო ღირს, მაგრამ იტალიური მედიის მტკიცებით, შექმნილი სიტუაციიდან გამომდინარე, „ნაპოლის“ მისი გაფორმება უფრო დაბალ ფასშიც შეუძლია. ხვიჩა ნეაპოლში ლორენცო ინსინიეს შემცვლელად ესახებათ, რომელიც სეზონის ბოლოს გუნდს ტოვებს და კარიერას „ტორონტოში“ გააგრძელებს. კვარაცხელია „ნაპოლის“ მხოლოდ ზაფხულიდან შეუერთდება, მანამდე კი ბათუმის „დინამოში“ ითამაშებს.
გუშინ მოსკოვის „ლოკომოტივის“ ყოფილმა მთავარმა მწვრთნელმა იური სიომინმა ხვიჩა კვარაცხელიას იტალიურ „ნაპოლიში“ შესაძლო ტრანსფერზე ისაუბრა. მისი აზრით, ქართველ ფეხბურთელს არ უნდა გაუჭირდეს ლორენცო ინსინიეს შეცვლა, რომელიც ნეაპოლური კლუბის დატოვებას აპირებს.
„ის „ნაპოლის“ კარგად მოერგება. იტალიაში უყვართ ისეთი ფეხბურთელები, რომლებიც ინდივიდუალიზმით გამოირჩევიან. „ნაპოლიდან“ ხომ ახლა ინსინიე მიდის, ხვიჩა კი ზუსტად მისი ყაიდის მოთამაშეა. ის სწორედ მის ადგილას მიჰყავთ. ხვიჩას „სერია A“-ში სრულფასოვანი ადაპტაცია არ გაუჭირდება. მისთვის ეს, მაგარი გამოწვევაა“.
გუშინ ფიფა-ს რიგით 72-ე კონგრესზე, რომელიც დოჰაში გაიმართა, რუსეთის ფეხბურთის ფედერაციის გარიცხვის საკითხი არც კი განუხილავთ. მართალია, ფიფა-ს პრეზიდენტ ჯანი ინფანტინოს გამოსვლაში მშვიდობისკენ და დიალოგისკენ მოწოდებებმა გაიჟღერა, მაგრამ რუსეთის ფიფადან გარიცხვაზე კენჭისყრა არც შემდგარა.
დღის წესრიგის მეოთხე პუნქტის (ფიფას წევრი ქვეყნისთვის წევრობის შეჩერება ან მისი გარიცხვა) განხილვის დროს რუსეთზე არც უსაუბრიათ – ამ დროს განიხილეს პაკისტანის, ზიმბაბვესა და კენიის საკითხები. ამ ქვეყნებს ფიფა-ს წევრობა შეჩერებული ჰქონდათ და ეს ძალაში დარჩა.
ცნობილი რუსული არხის „Match TV“ წამყვანმა ანტონ ანისიმოვმა პირდაპირ ეთერში პოლონეთის ნაკრების ფეხბურთელები უცენზურო სიტყვებით მოიხსენია და მომავალ მსოფლიოს ჩემპიონატზე ჩავარდნა უსურვა.
„მინდა პირადი მოსაზრება მოგახსენოთ. პოლონეთის ნაკრებს მსოფლიოს ჩემპიონატზე სრულ ჩავარდნას ვუსურვებ. მათ შორის, ლევანდოვსკის. საზიზღარო პირუტყვებო“, – განაცხადა ანისიმოვმა, რომელიც წყობიდან უკრაინის საკითხთან დაკავშირებით პოლონელების პოზიციამ გამოიყვანა.
მსოფლიო ჩემპიონატის ფლეი-ოფში რუსებს სწორედ პოლონელებთან უნდა ეთამაშათ, თუმცა, სანქციების გამო, გათამაშებიდან მოიხსნენ. საბოლოო ჯამში, პოლონეთი დასკვნით ეტაპზე უბრძოლველად გავიდა, სადაც შვედეთს სძლია და მსოფლიოს ჩემპიონატზე თამაშის უფლება მოიპოვა.
აღნიშნულ „ინციდენტს“ სოციალურ ქსელში ცნობილი რუსი კომენტატორი ალექსეი ანდრონოვი გამოეხმაურა: – „ფლეი-ოფში შვედეთის მხარეს ვიყავი და არა – პოლონეთის, რადგან ვთვლი, რომ მათ უპირატესობა დაუმსახურებლად მიიღეს, თუმცა მიმაჩნია, რომ „საზიზღარი პირუტყვი“ სწორედ ანისიმოვია და არა – ლევანდოვსკი“.
გუშინ ცნობილი გახდა რომ დევიდ და ვიქტორია ბექჰემების ლონდონის სახლი გაქურდეს. მძარცველები ინგლისელის სახლში მაშინ შეიჭრნენ, როდესაც ბექჰემი, ვიქტორია და მათი 10 წლის ქალიშვილთან შინ იმყოფებოდნენ.
აღნიშნული ფაქტი დევიდის 17 წლის შვილმა კრუზ ბექჰემმა აღმოაჩინა მაშინ, როდესაც სახლში დაბრუნდა და შენიშნა, რომ საძინებლის ფანჯარა ჩამსხვრეული იყო. 46 წლის ყოფილმა ფეხბურთელმა ქურდების ძებნა მალევე დაიწყო, თუმცა თავდამსხმელებს სახლი უკვე დატოვებული ჰქონდათ.
47 მილიონ ევროდ შეფასებული სახლიდან ბექჰემებს ათასობით ფუნტის ღირებულების ნივთები მოპარეს. აღნიშნულ ფაქტზე გამოძიება დაწყებულია, თუმცა ჯერჯერობით არავინაა დაკავებული. გავრცელებული ინფორმაციით, იმავე საღამოს იმ ადგილზე კიდევ რამდენიმე ქურდობა მოხდა.
საინტერესოა, რომ ბექჰემების სახლის გაძარცვა 2018 წელსაც სცადეს. მძარცველები სახლში მოხვედრას მაშინაც ფანჯრიდან ცდილობდნენ, თუმცა დაცვის სისტემამ კარგად იმუშავა და თავდამსხმელები იძულებულები გახდნენ, პოლიციის მისვლამდე გაქცეულიყვნენ.
