საქართველოს ეროვნული გუნდისა და „ვალენსიას“ კარის დარაჯი გიორგი მამარდაშვილი საფეხბურთო ესპანეთის გაკვირვებას განაგრძობს.
ესპანეთის „ლა ლიგის“ 30-ე ტურში „ვალენსია“ „კადისს“ დაუპირისპირდა და უგოლოდ დაშორდა – 0:0. ქართველი მეკარე მატჩის საუკეთესო ფეხბურთელად დასახელდა.
გუშინ ცნობილმა გამოცემამ „AS“ მამარდაშვილს არაერთი საქებარი სიტყვა მიუძღვნა.
„ქართული კედელი სულ უფრო გაუვალი ხდება. სილესენის დაბრუნების მიუხედავად, ძირითად შემადგენლობაში მამარდაშვილის დაყენება ნამდვილად მოწმობს იმ ნდობაზე, რომელიც ბორდალასმა მას გამოუცხადა. გიორგიმ ნეგრედოს მძლავრი თავური მოიგერია. ამას გარდა, მან კარგად ითამაშა გამოსვლებისას და საიმედო იყო გრძელ გადაცემებშიც“.
მატჩის შემდეგ კომენტარი „ვალენსიას“ მთავარმა მწვრთნელმა ხოსე ბორდალასმაც გააკეთა:
„დაცვაში კარგი თამაში თავდაჯერებას გვმატებს. ბოლო მატჩებში მხოლოდ ერთი გოლი გავუშვით, როდესაც გუნდის კარს ხაუმე იცავდა და ეს ყველაზე კარგად მეტყველებს დაცვაში გაუმჯობესებულ ვითარებაზე. ცუდია, რომ გამარჯვება ვერ მოვახერხეთ. დაცვაში მეტოქემაც მაგრად ითამაშა და ბევრი მომენტის შექმნის შესაძლებლობა არ მოგვცა“.
გიორგი მამარდაშვილმა მიმდინარე სეზონში ყველა ტურნირზე მე-15 მატჩი ჩაატარა (13 „ლა ლიგაში“, 2 „სამეფო თასზე“), კარი მშრალად მერვედ შეინახა და 477 წუთია გოლი არ გაუშვია. იასპერ სილესენმა 15 მატჩიდან მხოლოდ 3-ჯერ შეინახა კარი მშრალად, ხაუმე დომენეკმა – 8-დან ორჯერ.
გუშინ გამოცემა „footballfancast“ ხვიჩა კვარაცხელიასა და ინგლისური „ლიდსის“ თემას კიდევ ერთხელ დაუბრუნდა.
„თითქოს გუნდიდან რაფინია უნდა წავიდეს და კვარაცხელიამ მისი ადგილი დაიკავოს, თუმცა, თუკი ხვიჩა „ლიდსში“ გადავა, მაშინ შესაძლოა, „მანჩესტერ იუნაიტედიდან“ 30 მილიონ ევროდ შეძენილ დენ ჯეიმსს სერიოზული პრობლემები შეუქმნას.
ქართველი შემტევის შეძენის მთავარი პრეტენდენტები მაინც „ნაპოლი“ და „ვესტ ჰემი“ არიან. კვარაცხელია რუსეთის ჩემპიონატში ერთ-ერთი ყველაზე სახიფათო თავდამსხმელი იყო, ახლა კი „რუბინთან“ ხელშეკრულება გაწყვიტა და ბათუმის „დინამოში“ გადაბარგდა. ქართველის სავარაუდო სატრანსფერო ფასად 14.4 მილიონი ევრო სახელდება.“
გუშინ ცნობილი გახდა რომ ბათუმის „დინამოში“ კარიერას დროებით გააგრძელებს ზურიკო დავითაშვილიც. ამის შესახებ აჭარული გუნდის პრეზიდენტმა არჩილ ბერიძემ განაცხადა.
„ზურიკო უკვე ჩვენთანაა და გუნდთან ერთად ვარჯიშობს. უეფას მიერ მიღებული ახალი კანონი რუსეთის პრემიერ ლიგაში მოასპარეზე ლეგიონერების შესახებ, ძალაში 7 აპრილამდეა. ამიტომ, ამ ეტაპზე ან კანონს სასწრაფო წესით გამოვიყენებთ და ვფიქრობ, უახლოეს დღეებში ზურიკო ოფიციალურად გახდება ჩვენი წევრი“.
კიევის მახლობლად მდებარე პატარაქალაქ ბუჩაში დატრიალებული ტრაგედიის შესახებ დღეს ყველამ იცის. მთელი მსოფლიო შეძრა რუსეთის არმიის მიერ ჩადენილმა დანაშაულმა. ბუჩასა და კიევის ოლქის სხვა ქალაქებში ნაპოვნია 410 მშვიდობიანი მოქალაქის ცხედარი, რომელთა ნაწილს ხელები შეკრული ჰქონდა.
ბუჩას რაიონ სოფელ მოტიჟინში აღმოაჩინეს „კოლოსისა“ და „ჩაიკას“ ყოფილი ნახევარმცველის, ალეკსანდრ სუხენკოსა და მისი მშობლების – იგორ სუხენკოსა და ოლგა სუხენკოს ცხედრები. ისინი 10 დღის წინ რუსებმა გაიტაცეს და დახვრიტეს. სუხენკოების ცხედრები ტყეში, საძმო საფლავში აღმოაჩინეს, სადაც კიდევ 27 მოკლული ადამიანი იყო ჩასვენებული.
იგორ სუხენკო „კოლოსის“ პრეზიდენტი იყო, კლუბს აფინანსებდა. რუსული ინტერვენციის დაწყების შემდეგ თავის ოჯახთან ერთად თანასოფლელებს ევაკუაციაში და რითაც შეეძლო, ყველაფრით ეხმარებოდა.
უკრაინის რაგბის ასოციაციამ კი კავშირის ყოფილი პრეზიდენტის, ოლექსი ცობკოს დაღუპვის შესახებ გამოაცხადა, რომელიც კიევის რეგიონში ქალაქ ბუჩას იცავდა.
„ოლექსი ცობკო დაიღუპა ბუჩის თავისუფლებისთვის ბრძოლაში“, – ნათქვამია განცხადებაში.
ცობკო 2003-05 წლებში ადგილობრივი რაგბის ასოციაციის პრეზიდენტი იყო. მას, როგორც მოთამაშეს, კაპიტნის სამკლავურის ტარების პატივი ჰქონდა.
