გუშინ იტალიურმა გამოცემამ „Il Mattino“ გაავრცელა ცნობა რომ „ნაპოლი“ და ხვიჩა კვარაცხელია მომავალი კონტრაქტის პირობებზე უკვე შეთანხმდნენ.
ფეხბურთელმა მიიღო ნეაპოლური კლუბის პრეზიდენტის, აურელიო დე ლაურენტისის წინადადება – 900 ათასი ევრო 2027 წლამდე, აგრეთვე ბონუსები და საერთო ჯამში წელიწადში დაახლოებით 1.1 მილიონს გამოიმუშავებს. ასე რომ, ჩემპიონთა ლიგაზე დაბრუნების შემდეგ კვარაცხელია „ნაპოლის“ პირველი შენაძენი იქნება და ლუჩანო სპალეტის გუნდს გააძლიერებს. „ნაპოლის“ სურს ქართველი 9.5 მილიონად შეიძინოს და თანხა სამ ტრანშად დაფაროს. მოლაპარაკებები მალე დასრულდება“.
გამოცემა „CalcioMercato“-ს მტკიცებით „ნაპოლისა“ და ქართველ მოთამაშეს შორის მოლაპარაკებას ახლო წარსულში ცნობილი იტალიელი ფეხბურთელი, 2006 წლის მსოფლიოს ჩემპიონი, 40 წლის ქრისტიან ძაკარდი აწარმოებს.
უკრაინაში კი იმი გრძელდება…
გუშინ, უკრაინის ფეხბურთის ასოციაციის პირველი ვიცე-პრეზიდენტი ალექსეი მიხაილიჩენკო გამოცემა „Футбол NEWS“-ს ესაუბრა.
„ უკრაინაში შეჭრის შემდეგ ბევრ კოლეგა ფეხბურთელს ველაპარაკე. ერთადერთი რუსი, რომელმაც ტელეფონით დამირეკა, იგორ სკლიაროვია. ის აშშ-ში, ჩიკაგოში ცხოვრობს. მისი მეუღლე ცნობილი ტანმოვარჯიშეა. ისინი იქ დიდი ხანია მუშაობენ და შოკირებულები არიან. მან მითხრა, რომ ეს უფრო ჩრდილოეთ კორეაა, ვიდრე რუსეთი. მისთვის ეს ძალიან მტკივნეულია. სამწუხაროდ სკლიაროვი გამონაკლისი აღმოჩნდა. სხვა რუს მოთამაშეებს ალბათ, ესმით, რომ ჩემთან ურთიერთობა სასურველი არაა. მეტად სახელებს არ დავასახელებ, არც გვარებს, რადგან მათ უკვე არ აქვთ სახელი და გვარი. სახელი და გვარი ადამიანებს აქვთ, ცხოველებს – არა. ოი, ცხოველები შეიძლება გაგვინაწყენდნენ, რომ რუსებს შევადარე. „ვესტ ჰემის“ ნახევარმცველი ანდრეი იარმოლენკო მშობლიური ჩერნიგოვის განადგურების გამო შეძრწუნებულია და „ინსტაგრამზე“ რუსების მიმართ თავისი პოზიცია შემდეგნაირად გამოხატა: „ჩვენ ამას არასოდეს გაპატიებთ. პუტინ, შენ განავალი ხარ“. – განაცხადა ალექსეი მიხაილიჩენკომ.
ლეგენდარულმა უკრაინელმა ფეხბურთელმა ანდრეი შევჩენკომ კიდევ ერთხელ ისაუბრა რუსეთის მიერ მის ქვეყანაში წარმოებულ ომზე და ემოციები არც ამჯერად დაუმალავს.
„გული გახეთქვაზე მაქვს. ვიცი რა ხდება მარიუპოლში, ხარკოვში, ვნახე რუსებმა რა აკეთეს ბუჩაში, როგორ ბომბავენ კიევს. სიტყვებიც კი არ მყოფნის, ამავდროულად კი, ვამაყობ, რომ უკრაინელი ვარ. ვამაყობ, როგორ იცავს ჩვენი არმია ქვეყანას, ვამაყობ ჩვენი პრეზიდენტით, რომელმაც უზარმაზარი პასუხისმგებლობა აიღო. სწორედ მან მოახერხა უკრაინელი ხალხის გაერთიანება. მინდა ყველას გამძლეობა ვუსურვო. ჩვენ აუცილებლად გავიმარჯვებთ. თუკი ერთად დავდგებით, სხვაგვარად უბრალოდ ვერ იქნება. დიდება უკრაინას“.
რუსმა სამხედროებმა რამდენიმე დღის წინ, კიევთან ახლოს მდებარე დონეცკის „შახტარის“ საწვრთნელ ბაზას ცეცხლი გაუხსნეს.
შემთხვევას სოციალურ ქსელში კლუბის მეკარე, ანატოლი ტრუბინი შემდეგი კომენტარით გამოეხმაურა:
„ესეც საბრძოლო ობიექტია? ბუნებრივია, ეს ფოტოები იმ დაბომბილ სახლებს არც შეედრება, მაგრამ აზრი არ დევს ამ ქმედებაში, რაში სჭირდებოდათ ამის გაკეთება. როდესაც სადმე წესრიგის დამყარება გინდა, პირველ რიგში საკუთარ თავში უნდა დაამყარო…“
2020 წლის ტოკიოს ოლიმპიური თამაშების გამარჯვებულმა, მოჭიდავემ და ამჟამად უკრაინის პარლამენტის წევრმა, ჟან ბელენიუკმა სოციალურ ქსელში ქალაქ ბუჩაში, რუსი სამხედროების მიერ ჩადენილი სისასტიკის ამსახველი მასალები გაავრცელა:
„გაეროში რუსეთის წარმომადგენელმა, ვასილი ნებენზიამ სცადა უარყოფა იმ სისასტიკის, რაც რუსების მხრიდან ბუჩაში უკრაინელი ხალხის გენოციდს უკავშირდება. ამასთან განაცხადა რომ ჟან ბელენიუკს, რომელიც ქალაქს თავდასხმის შემდეგ მაშინვე ესტუმრა, არ უნახავს იქ გარდაცვლილები და რუსეთის მიერ ჩადენილი სისასტიკე. რა თქმა უნდა, ეს დიდი ტყუილია, მაგრამ ამას უკვე მიჩვეულები ვართ. მას ალბათ უნდოდა ეთქვა, რომ მე არ გამოვაქვეყნებდი გარდაცვლილი ხალხის ფოტოებს. რთულია ვასილი ნებენზიას გაგება. რთულია იმის გაგება, რა არის რუსებისთვის ნორმალური, რატომ აძლევენ საკუთარ თავს ამდენის უფლებას. ნორმალური ადამიანისთვის ამ ყველაფრის ყურება საშინელებაა.
ბუჩაში, ირპინში, გოსტომელში და სტოიანკაში პირველად 1 აპრილს ჩავედი, როდესაც ქალაქები უკვე განადგურებული იყო. მთელი დღის განმავლობაში 10-ზე მეტ მოქალაქეს შევხვდი, ისინი თავშესაფრიდან გამოსვლას და ქალაქის დატოვებას იწყებდნენ. ირპენში სამანქანო მოძრაობა დაკეტილი იყო და ჩემს მეგობრებთან ერთად ფეხით დავდიოდი. ამ პირობებში, ყველა ქუჩის შემოვლა შეუძლებელი იყო. ისეთი საშინელება ხდებოდა, ყველაფრის გადაღება არ მინდოდა, მაგრამ რაც გადავიღე, ნათლად ადასტურებს რუსების მიერ ჩადენილ სისასტიკეს. თავდაპირველად, არ მინდოდა დაღუპული მშვიდობიანი მოქალაქეების ფოტოების გამოქვეყნება მორალური და ეთიკური მიზეზების გამო, მაგრამ ეს პროპაგანდის მიმართულებით ეს ერთ-ერთი იარაღი იქნება. ამიტომ ვაქვეყნებ ფოტოებისა და ვიდეოების ნაწილს.“ – განაცხადა ჟან ბელენიუკმა.
