გუშინ ცნობილი გახდა რომ საერთაშორისო ოლიმპიური კომიტეტის აღმასრულებელი საბჭოს გადაწყვეტილებით, პარიზის 2024 წლის ოლიმპიურ თამაშებზე ძალოსანთა ტურნირი ახალ წონით კატეგორიებში ჩატარდება.
პარიზში ძალოსანთა ასპარეზობები გაიმართება კაცთა ხუთ – 61, 73, 89, 102, +102 კილოგრამ წონით კატეგორიაში. ასევე ხუთ წონაში – 49, 59, 71, 81, +81 გამოვლენ ქალი ძალოსნებიც.
შესაბამისად, სახელოვან ქართველ ძალოსან ლაშა ტალახაძეს ოლიმპიური რეკორდების ახლიდან დამყარება მოუწევს, რადგანაც ის შეცვლილ წონით კატეგორიაში გამოვა.
XXXIII ოლიმპიური თამაშები 2024 წლის 26 ივლისიდან 11 აგვისტომდე გაიმართება.
გუშინ, საქართველოს საფეხბურთო ნაკრების ყოფილმა მთვარმა მწვრთნელმა ვლადიმირ ვაისმა გამოცემასთან „Championat.com“ ხვიჩა კვარცხელიას „ნაპოლიში“ შესაძლო ტრანსფერზე ისაუბრა:
„ვფიქრობ, ხვიჩა მზად არის „ნაპოლიში“ გადასასვლელად. მას ყველა თვისება აქვს, რომ დიდი ფეხბურთი ითამაშოს. თუ ტრანსფერი შედგა, ბედნიერი ვიქნები. „ნაპოლი“ კარგი გუნდია, ხვიჩას კი, ვფიქრობ, ინსინიეს შეცვლა თავისუფლად შეუძლია. ჩემი აზრით, ის ნეაპოლში სრულად გამოვლენს თავის თვისებებს: სიჩქარე, დრიბლინგი, პასი. ახლა ყველაფერი მხოლოდ მასზეა დამოკიდებული, კვარაცხელია ძალინ ნიჭიერია და აქვს მონაცემები, რომ დიდებული კარიერა ჰქონდეს“, – განაცხადა ვლადიმირ ვაისმა.
გუშინ ხვიჩა კვარაცხელიაზე პოპულარულმა იტალიურმა გამოცემამ „კორიერე დელო სპორტმაც“ დაწერა. გაზეთის მტკიცებით, ქართველ მოთამაშესა და „ნაპოლის“ შორის შეთანხმება უახლოეს პერიოდში შედგება:
„ნაპოლის“ სპორტულმა დირექტორმა კრისტიანო ჯუნტოლიმ განსაზღვრა ბათუმის „დინამოსთან“ გარიგების ყველა დეტალი. გარიგება ახლოსაა. მან აღმოაჩინა ახალგაზრდა ფეხბურთელი, რომლის გვარი რთულად გამოითქმის, მაგრამ ის დარწმუნებულია, რომ საქართველოს ნაკრების ერთ-ერთი ლიდერი კარგად მოერგება ლუჩანო სპალეტის სქემას – 4-2-3-1-ს ან თუნდაც 4-3-3-ს. კახა კალაძის შემდეგ იტალიაში კიდევ ერთი ქართველი ითამაშებს. კვარაცხელია არის ფიზიკურად ძლიერი, უყვარს ფინტები მარცხენა ფლანგზე და აქვს კარგი დარტყმა მარჯვენა ფეხით“.
გუშინ კიდევ ერთხელ დადასტურდა ინფორმაცია რომ საქართველოს საკალათბურთო ნაკრების წამყვანი მოთამაშე თორნიკე შენგელია მომავალი სეზონიდან ესპანური „ბარსელონას“ ღირსებას დაიცავს. ამისი წინაპირობა კი, კატალონიური გუნდიდან ამერიკელი ცენტრის ბრენდონ დევისის წასვლაა. იტალიური გამოცემა „Pianetabasket“-ის მტკიცებით, „ბარსელონა“ აღარ აპირებს დევისისთვის მრავალმილიონიანი ხელშეკრულების გაგრძელებას.
„ბარსელონასა“ და დევისს შორის მოლაპარაკება ჩიხში შევიდა, რადგანაც მხარეები ფინანსურ საკითხებზე ვერ თანხმდებიან. ეს ნიშნავს, რომ სამწლიანი თანამშრომლობის შემდეგ, ის ესპანურ გუნდს დატოვებს და სავარაუდოდ, კარიერას ამ სამეულიდან ერთ-ერთში გააგრძელებს: „ეფესი“, „რეალი“, „მილანი“. დევისი სეზონში 3 მილიონ დოლარს იღებს, მისი აგენტი კი თანხის კიდევ უფრო გაზრდას ითხოვს. ამ ფონზე „ბარსელონა“ მოლაპარაკებას თორნიკე შენგელიასთან აწარმოებს და წინასწარი შეთანხმება უკვე არსებობს. ის სეზონს ბოლონიაში დაასრულებს, შემდეგ კი, კატალონიური კლუბის წევრი გახდება“.
თორნიკე შენგელიამ მიმდინარე სეზონი მოსკოვის „ცსკა“-ში დაიწყო. უკრაინაში საომარი მოქმედებების დაწყების შემდეგ კლუბთან კონტრაქტი გაწყვიტა და ახლა, „ვირტუს ბოლონიას“ ღირსებას იცავს. იტალიური მხარე აქტიურად ცდილობს, რომ ქართველი თავდამსხმელი ამ სეზონის შემდეგაც შეინარჩუნოს, თუმცა, „ბარსელონას“ შეთავაზების გადაფარვა გაუჭირდება.
უკრაინაში კი ფართომასშტაბიანი ომი კვლავ გრძელდება.
ცნობილი გახდა რომ ახლო წარსულში ცნობილი უკრაინელი ფეხბურთელი, კიევის „დინამოს“ ყოფილი თავდამსხმელი, „ოქროს ბურთის“ 1986 წლის მფლობელი, ევროპის ვიცე-ჩემპიონი (1988) იგორ ბელანოვი სამშობლოს დამცველთა რიგებში ჩადგა. 61 წლის ბელანოვმა ხელში ავტომატი აიღო და სანგრებში თანამებრძოლებთან ერთად გამაგრდა.
„ლეგენდარული ბელანოვი, სსრკ-ის ნაკრების ყოფილი ფეხბურთელი, ახლა უკრაინის დასაცავად იბრძვის, რადგან არ უნდა განმეორდეს იმპერიის საშინელებანი“, – დაიწერა უკრაინულ მასმედიაში.
უკრაინის შეიარაღებულ ძალებში აგრეთვე კიევის „დინამოს“ ყოფილი ნახევარმცველი ვლადიმირ ბესონოვი და ტირასპოლის „შერიფის“ მწვრთნელი იური ვერნიდუბი იბრძვიან.
