გუშინ გამოცემამ „Corriere dello Sport“ გაავრცელა ინფორმაცია რომ ხვიჩა კვარაცხელიამ „ნაპოლიში“ გადასვლის წინ პირველი სამედიცინო შემოწმება გაიარა. სავარაუდოდ, ეს მაშინ მოხდა, როცა „ტრავმის“ გამო ხვიჩამ ალბანეთთან ამხანაგურ მატჩში არ ითამაშა.
ორი დღის წინ, ესპანეთის „ლა ლიგის“ 31-ე ტურში სტუმრად „რაიო ვალეკანოსთან“ ფრედ დასრულებულ მატჩში (1:1) ყველა წამყვანმა ესპანურმა სპორტულმა გამოცემამ გიორგი მამარდაშვილის კარგ თამაშს გაუსვა ხაზი.
კომენტარი გააკეთა „ვალენსიას“ მთავარმა მწვრთნელმა ხოსე ბორდალასმაც და ქართველი კარის დარაჯის თამაში განსაკუთრებით გამოყო:
„მამარდაშვილი დიდებული იყო. მიუხედავად იმისა, რომ გოლი გაუშვა, შეხვედრა მაღალ დონეზე ჩაატარა. გაშვებულ გოლში ბრალი მთელ გუნდს მიუძღვის – შეტევაში ვიყავით, ბურთი დავკარგეთ და კონტრშეტევაზე მცველების ზურგს უკან სივრცე ვერ შევზღუდეთ. მოთამაშეებსაც ვუთხარი, რომ იმ ეპიზოდში მეტი ყურადღებით უნდა გვეთამაშა.“
გუშინ გერმანული გამოცემა „HSV24“ გიორგი ჩაკვეტაძისა და „ჰამბურგის“ საკონტრაქტო ამბებს ისევ დაუბრუნდა და ქართველი ნახევარმცველის გამოსყიდვაზე ისაუბრა:
„მისი საკითხი ისევ ღიად რჩება, თუმცა კლუბში არ გამორიცხავენ ჩაკვეტაძესთან თანამშრომლობა გაგრძელდეს და ის ბელგიური „გენტისგან“ გამოისყიდონ. უკვე ჩატარებულ 311 წუთში გიორგიმ 1 გოლი გაიტანა.“
22 წლის ქართველი „გენტის“ საკუთრებაა, სადაც 2017 წელს თბილისის „დინამოდან“ გადავიდა, მის რიგებში კი 6 გოლისა და 10 საგოლე პასის ავტორია. სავარაუდოდ, ჰამბურგელები ბუნდესლიგაში ვერ აღზევდებიან, თუმცა გიორგი გერმანულ კლუბში აშკარად უკეთ ათამაშდა.
გუშინ ქართველი კალათბურთელი გოგა ბითაძე „ინდიანა პეისერსის“ ვებგვერდის ჟურნალისტს ესაუბრა და სხვა თემებთან ერთად, საქართველოს ნაკრების შესახებ ილაპარაკა.
„ახლა თავს უფრო ჩამოყალიბებულ კალათბურთელად ვგრძნობ. მეტი პასუხისმგებლობა მაკისრია და ამისთვის მზად უნდა ვიყო. საქართველოს ნაკრების რიგებში თამაში გადაწყვეტილი მაქვს და ევრობასკეტამდე მსოფლიო ჩემპიონატის საკვალიფიკაციო ეტაპის მატჩებში მივიღებ მონაწილეობას. ქართველი ხალხისთვის ევრობასკეტი დიდი მოვლენაა და იმედი მაქვს, წარმატებას მივაღწევთ“.
გუშინ გერმანულმა გამოცემამ „TVP Sport“ გაავრცელა ინფორმაცია რომ ახალი სეზონიდან „ბაიერნის“ თავდამსხმელი რობერტ ლევანდოვსკი კარიერას კატალონიურ „ბარსელონაში“ გააგრძელებს. ლევანდოვსკიმ „ბარსასთან“ სამწლიანი კონტრაქტი შეათანხმა.
33 წლის პოლონელმა „ბაიერნის“ ხელმძღვნელობას განუცხადა, რომ 2023 წლის ზაფხულამდე მოქმედი ხელშეკრულების გაგრძელებას არ აპირებს. „ბაიერნი“ ლევანდოვსკიში 65 მილიონ ევროს ითხოვს, თუმცა, ტრანსფერში სხვა ფეხბურთელების ჩართვის შემთხვევაში, თანხას დაუკლებს.
გუშინ ბრიტანულ მასმედიაში საინტერესო ინფორმაცია გავრცელდა. წარსულში ცნობილი ფეხბურთელი და მწვრთნელი, შოტლანდიელი კენი დალგლიში მიიჩნევს, რომ უკრაინის ეროვნული ნაკრები მსოფლიოს 2026 წლის ჩემპიონატის საკვალიფიკაციო ეტაპისგან უნდა გათავისუფლდეს, თუკი 2022 წლის მუნდიალის საგზურისთვის ფლეი ოფის შეხვედრის ჩატარებას ვერ მოახერხებს.
უკრაინის ნაკრებმა ყატარის მსოფლიო პირველობის საგზურისთვის ივნისში შოტლანდიასთან უნდა ითამაშოს, თუმცა რუსეთის უკრაინაში შეჭრისა და იქ ფართომასშტაბიანი ომის გამო, ამ ქვეყანას და მის ნაკრებს ფეხბურთისთვის ნაკლებად სცალია.
„არ ვიცი, რა უნდა გაკეთდეს, მაგრამ უდიდეს პატივისცემას იმსახურებენ უკრაინელი ფეხბურთელები და ქვეყნის ფეხბურთის ასოციაცია. მათი ბრალი სულაც არ არის, რომ ასეთ მდგომარეობაში აღმოჩნდნენ. გუნდის წევრების დიდი ნაწილი იქ არ თამაშობს. ისინი სხვაგან გამოდიან, მაგრამ მათ ჰყავთ ოჯახები, რომლებიც ძალიან დაზარალდნენ. უსამართლობა მგონია ნებისმიერი ფორმით მათი წნეხში მოქცევა. კარგი ჟესტი იქნებოდა, მათთვის შეთავაზება, რომ მომდევნო მსოფლიოს ჩემპიონატზე საკვალიფიკაციო ეტაპის გავლის გარეშე მოხვდებიან, თუკი ზაფხულში თამაშისთვის მზად არ იქნებიან. ამით მათ წინაშე პატივისცემას გამოვიჩენთ“, – განაცხადა კენი დალგლიშმა.
ავტორი
