რამდენიმე დღის წინ იტალიურ მედიაში გავრცელდა ინფორმაცია, რომ „ნაპოლის“ პრეზიდენტი აურელიო დე ლაურენტისი გუნდის მთავარ მწვრთნელ ლუჩანო სპალეტის გადააყენებდა.
გუშინ ცნობილი გახდა რომ სპალეტი ნეაპოლურ გუნდში კიდევ ერთი სეზონის განმავლობაში იმუშავებს.
„ის უმაღლესი დონის სპეციალისტია. მოვიყვანე, რადგან მისტერ სპალეტია. მას კონტრაქტი აქვს. ყოველთვის ვამბობდი, რომ ხელშეკრულება ორწლიანია, შესაძლო გახანგრძლივებით. სპალეტი დარჩება. მე რვა თვის განმავლობაში ინტერვიუს არ ვიძლეოდი. მისი, როგორც მწვრთნელის და ადამიანის გაცნობა მჭირდებოდა. ჩემი აზრით, ის განსაცვიფრებელი მწვრთნელი და სერიოზული ადამიანია. ეს მაიძულებს ვთქვა, რომ ამჯერადაც მიზანში გავარტყი“, – განაცხადა აურელიო დე ლაურენტისმა.
ინგლისური „ჰალის“ მთავარი მწვრთნელი შოთა არველაძე კი ახალი სეზონისთვის უკვე ემზადება.
„ჰალის“ უმთავარი მიზანი ახლა იმ რვა მოთამაშის შენარჩუნებაა, რომელთა ხელშეკრულებაც დასრულდა და მათ საშუალება აქვთ, გუნდში დარჩენა ისევ 12 თვით გაიხანგრძლივონ.
სეზონის დასაწყისში „ჰალის“ მიზანი პრემიერლიგაში აღზევება იყო, თუმცა, საბოლოოდ, ლიგაში ადგილის შენარჩუნებისთვის ბრძოლა მოუწიათ, რაც ახალ მფლობელ ილიჯალის ხელმძღვანელობით, წარმატებით შეძლეს. გუნდი სწორ გზაზეა“. – განაცხადა შოთა არველაძემ.
გუშინ, უკრაინის საფეხბურთო ასოციაციის პრეზიდენტმა, ანდრიი პავლენკომ, სოციალურ ქსელში ქვეყნის ნაკრების საგანგებო, პატრიოტული ფორმის ფოტოები წარმოადგინა, რომელსაც ნაკრების წევრები, 11 მაისს, მიონხენგლადბახის „ბორუსიის“ წინააღმდეგ ამხანაგურ მატჩში ჩაიცვამენ.
ფორმის წინა მხარეს უკრაინის დროშაა დახატული, რომლის კონტურებიც იმ ქვეყნების დროშებითაა შესრულებული, რომლებიც უკრაინას რუსეთთან ომის დროს სოლიდარობას უცხადებენ და მხარს უჭერენ (მათ შორისაა საქართველოს დროშაც). წარწერა „United for Ukraine“ – გავერთიანდეთ უკრაინისთვის – ნიშნავს. ზურგზე კი მოთამაშეების ნომრები ქვეყნის დაზარალებული ქალაქების სახელებითაა ინსპირირებული, რომლებიც შემდეგ ამ ქალაქების მუზეუმებს გადაეცემა.
გუშინ უკრაინის ნაკრებისა და „მილანის“ ყოფილმა ფეხბურთელმა ანდრეი შევჩენკომ რუსეთის აგრესიასთან მებრძოლ სახელმწიფოში რომის პაპის ვიზიტზე ისაუბრა.
„რასაკვირველია, უკრაინაში რომის პაპის ჩამოსვლა ძალიან სასარგებლო იქნება, მაგრამ ამ პერიოდში ჩვენთვის დახმარების საუკეთესო გზა საკუთარი ქვეყნის დაცვაში გვერდით დგომა და ლტოლვილების მიღება იქნება, განსაკუთრებით, ქალებისა და ბავშვების“.
ესპანური გამოცემა „Mundo Deportivo“-ს მტკიცებით, „ლივერპულის“ ერთ-ერთი ლიდერი სადიო მანე დიდი ალბათობით კარიერას კატალონიურ „ბარსელონაში“ გააგრძელებს.
თავად სენეგალელი ფეხბურთელიც არ გამორიცხავს „ბარსელონას“ ფორმის მორგებას.
„მანჩესტერ სიტის“ ხელმძღვანელობა კი ამჟამინდელ მთავარ მწვრთნელთან, პეპ გვარდიოლასთან, ხელშეკრულების გახანგრძლივებას აპირებს.
ინგლისური მასმედიის ინფორმაციით, მანჩესტერული გუნდი 51 წლის სპეციალისტს კონტრაქტს 2025 წლამდე გაუგრძელებს.
გვარდიოლა „სიტის“ 2016 წლიდან თავკაცობს. მისი ხელმძღვანელობით გუნდმა 10 ტიტული მოიგო. მანამდე ის „ბარსელონასა“ და „ბაიერნში“ მუშაობდა.
ფრანგული გამოცემა „L’Equipe“-ს მტკიცებით, ბილბაოს „ატლეტიკს“ ზაფხულში „პსჟ“-ის მთავარი მწვრთნელის, მაურისიო პოჩეტინოს გადაბირება სურს.
მართალია მიმდინარე სეზონში პარიზული კლუბი საფრანგეთის ჩემპიონი გახდა, მაგრამ არგენტინელს ჩემპიონთა ლიგიდან დროზე ადრე გავარდნას ვერ პატიობენ.
პოჩეტინოს „პარი სენ ჟერმენთან“ კონტრაქტი 2023 წლის ივლისამდე აკავშირებს და ნაადრევად შეწყვეტის შემთხვევაში, „პსჟ“ იძულებული გახდება მას საკომპენსაციოდ 15 მილიონი ევრო გადაუხადოს.
ავტორი
