გერმანიამ და იტალიამ თავიანთ კომპანიებს ანგარიშის რუბლებში გახსნის უფლება მისცეს, რათა რუსული გაზის შეძენა რუსეთის ფედერაციის წინააღმდეგ დაწესებული სანქციების დარღვევის გარეშე შეძლონ, _ ამის შესახებ ინფორმაციას Reuters-ი ავრცელებს.
სააგენტოს ინფორმაციით, ბრიუსელმა სანქციების დარღვევის გარეშე რუსული გაზი შეძენის შესახებ ორი წერილობითი გზამკვლევი გამოაქვეყნა, თუმცა, ლეგალური მარშრუტი კვლავ ბუნდოვანია, რადგან ევროკავშირის ოფიციალურმა წარმომადგენლებმა დახურულ შეხვედრაზე ფირმებს ურჩიეს, რომ Gazprom-ში ანგარიში არ გაეხსნათ.
დიპლომატების თქმით, აღნიშნული ფაქტი ევროკავშირის ერთიანობას საფრთხეს შეუქმნის.
Reuters წერს, რომ ფინეთმა, ბულგარეთმა და პოლონეთმა გაზის რუბლებში შეძენაზე უარი განაცხადეს, რის გამოც ამ ქვეყნებში რუსული გაზის მიწოდება შეწყდა.
გამოცემა თავის ორი წყაროზე დაყრდნობით წერს, რომ ევროკომისიასთან კომუნიკაციის შემდეგ გერმანიის მთავრობამ გერმანელ იმპორტიორებს განუმარტა, რომ მათ ანგარიშის რუბლში გახსნა სანქციების დარღვევის გარეშე შეეძლებათ.
გამოცემის მიხედვით, იტალიის მთავრობა, სავარაუდოდ, ევროკომისიასაც ესაუბრა.
“ეს მოხდა მანამ, სანამ იტალიური ენერგეტიკული კომპანია Eni სამშაბათს განაცხადებდა, რომ ორი ანგარიშის გახსნა დაიწყო, ერთი ევროში და ერთი რუბლში“. – წერს Reuters-ი.
Reuters წერს, რომ გასულ კვირას იტალიის პრემიერმინისტრმა, მარიო დრაგიმ აღნიშნა, რომ გაზის რუბლებში გადახდის კანონიერების საკითხი “ნაცრისფერი ზონაა”, თუმცა აღნიშნულ საკითხზე კომენტარი არ გაუკეთებია.
ორი წყაროს ინფორმაციით, კომპანიებს ანგარიშების რუბლში გახსნა შეუძლიათ სანქციების დარღვევის გარეშე, თუ Gazprom-ში გადახდები რუსულ ვალუტაში არ იქნება.
ავტორი
