გუშინ საქართველოს ნაკრების მთავარმა მწვრთნელმა ვილი სანიოლმა პრესკონფერენცია გამართა და სხვა საინტერესო თემებთან ერთად ხვიჩა კვარაცხელიაზეც ისაუბრა:
„ბოსნიაში ყოფნისას ხვიჩა კვარაცხელიას ვესაუბრე. „ნაპოლიში“ გადასვლა შესანიშნავი ნაბიჯია. მჯერა, რომ იტალიურ კლუბში დამკვიდრებას შეძლებს, რაც ჩვენთვის ძალიან კარგი იქნება. მას „ნაპოლიში“ დამკვიდრებისთვის დიდი შრომა დასჭირდება. მე მისი წარმატების მჯერა. მას ყველა თვისება აქვს, რომ „ნაპოლიში“ წარმატებული გახდეს. ხვიჩა კვარაცხელიას ფსიქოლოგიურ მდგომარეობაზე ბევრი საუბარი იყო, მაგრამ სამუშაო პროცესში მე პრობლემა არ შემიმჩნევია. ის ფაქტი, რომ მედიასთან არ საუბრობს, არ ნიშნავს, რომ თავს ცუდად გრძნობს. ხვიჩა ძლიერი ბიჭია და საუკეთესო თვისებებს „ნაპოლიშიც“ გამოავლენს. დიდი მოლოდინი მაქვს, რომ უახლოეს შეხვედრებში ხვიჩა და ნაკრების ყველა სხვა მოთამაშე მაღალ დონეზე ითამაშებს“. – განაცხადა ვილი სანიოლმა.
გუშინ საინტერესო ინფორმაცია გაავრცელა პოლონურმა გამოცემამ „Sportowefakty“. მისი მტკიცებით პოლონური „ლეგია“ ბათუმის „დინამოს“ მეკარე ლაზარე კუპატაძის შეძენით დაინტერესდა.
ლაზარე კუპატაძე ბათუმის „დინამოს“ ძირითადი მეკარე გახლავთ და 26 წლისაა. „კრისტალბეთ“ ეროვნული ლიგის მიმდინარე სეზონში მან 11 შეხვედრა ჩაატარა და კარი მშრალად 7-ჯერ შეინახა.
ესპანურმა გამოცემამ „El Desmarque“ კი გიორგი მამარდაშვილის შესახებ მორიგი წერილი გამოაქვეყნა და დაწერა, რომ „ვალენსია“ ქართველი მეკარის დაცვას აპირებს, რომელიც „ერთა ლიგის“ თამაშებისთვის ეროვნულ ნაკრებში გამოიძახეს.
„გიორგი მამარდაშვილი ეროვნულ ნაკრებში მიემგზავრება, რაც მისი კარგი სათამაშო ფორმის კიდევ ერთი დადასტურებაა. ვალენსიაში კი უკვე მუშაობენ გეგმაზე, რომლითაც მის დაცვას შეძლებენ. ქართველი ფეხბურთელი „ლა ლიგის“ მიმდინარე სეზონში, „ვალენსიასთვის“ ერთ-ერთი შესანიშნავი სიახლე გახლდათ. მიუხედავად იმისა, რომ კლუბს რთული წელი ჰქონდა, მამარდაშვილი დაბრკოლებებს გაუმკლავდა და წარმატებით იასპარეზა. მან თავისი თავის საუკეთესო ვერსია აჩვენა და დაამტკიცა, რომ გუნდში ადგილს ნამდვილად იმსახურებს, ნაკრებში გამოძახება კი მორიგი დადასტურებაა, რომ ბრწყინვალედ ასპარეზობს“.
გუშინ, პარიზში, „როლან გაროსის“ ძირითადი ბადის წილისყრა შედგა, სადაც ნიკოლოზ ბასილაშვილის მეტოქის ვინაობა გახდა ცნობილი.
ბასილაშვილი საწყის ეტაპზე 63-ე ჩოგანს, ამერიკელ მაქსიმ კრესის დაუპირისპირდება, რომელთანაც აქამდე მხოლოდ ერთხელ აქვს ნათამაშები – 2021 წელს აშშ-ს ღია პირველობაზე, სადაც ქართველმა 7:6, 6:3, 7:5 იმარჯვა.
რაც შეეხება მეორე წრეს, ამ წყვილს შორის გამარჯვებული ამერიკელ მაკენზი მაკდონალდსა და კვალიფიკაციის ბადეში ერთ-ერთ ჩოგბურთელს შორის საუკეთესოს დაუპირისპირდება.
რამდენიმე დღის წინ ცნობილი გახდა რომ ფრანგმა თავდამსხმელმა კილიან მბაპემ „პარი სენ-ჟერმენის“ დატოვება და მადრიდის „რეალში“ გადაბარგება საბოლოოდ გადაწყვიტა. გუშინ მდგომარეობაკიდევ ერთხელ შეიცვალა.
იტალიელმა ჟურნალისტმა ჯანლუკა დი მარციომ გაავრცელა ინფორმაცია, რომ სიტუაცია კილიანის „რეალში“ შესაძლო ტრანსფერთან დაკავშირებით მკვეთრად შეიცვალა და ფეხბურთელმა კიდევ ერთხელ გადაიფიქრა.
„რეალთან“ სიტყვიერი შეთანხმების მიუხედავად, 23 წლის ფეხბურთელი ახლა პარიზელებთან კონტრაქტის გახანგრძლივებასთან ახლოსაა. მბაპე მზადაა გადაიფიქროს და დარჩეს პსჟ-ში, კლუბის მკვეთრი ქმედებების გამო. პარიზელები ბოლო დღეებია ყველაფერს აკეთებენ, რომ კილიანი დარჩენაში დაარწმუნონ.
გუშინ, უკრაინის საფეხბურთო ეროვნული გუნდის მთავარი მწვრთნელი ოლეკსანდრ პეტრაკოვი იტალიურ მედიას უკრაინაში მიმდინარე ომსა და რუსეთის მიმართ მის დამოკიდებულებაზე ესაუბრა. ერთ-ერთი შეკითხვა პეტრაკოვს უკრაინა-რუსეთს შორის მომავალში საფეხბურთო მატჩის გამართვის შესაძლებლობაზეც დაუსვეს, რაზეც 64 წლის უკრაინელის პასუხი კატეგორიული იყო.
„რუსებმა ყველაფერი გააკეთეს, რათა ჩვენს შორის არანაირი ურთიერთობა აღარ იყოს. არ ვიცი, რამდენი წელი უნდა გავიდეს, რომ ჩადენილი მხეცობისთვის ცოდვები გამოისყიდონ. ჩვენ მათთან ურთიერთობას ათწლეულების განმავლობაში ვეღარ მოვახერხებთ. ესენი ადამიანები არ არიან. მოვიდნენ ჩვენს მიწა-წყალზე, გვიკლავენ შვილებსა და ქალებს, ძალადობენ მათზე. მასობრივად მხარს უჭერენ პრეზიდენტ პუტინს. ეს არ არის პუტინის დანაშაული, ეს მთლიანად რუსი ხალხის დანაშაულია.
მომავალში რუსეთსა და უკრაინას შორის ამხანაგური მატჩის ჩატარება ვერ წარმომიდგენია. სანამ ნაკრებს ვწვრთნი, ეს ნამდვილად არ მოხდება”, – განაცხადა პეტრაკოვმა.
ავტორი
