25 მაისს, ოზუგეთში, სახვითი ხელოვნების ცენტრში, ტრადიციულად, ოზურგეთის რეგიონული საგაზაფხული გამოფენა მოეწყო.
დარბაზში ორმოცი ავტორის ასზე მეტი ნამუშევარი იყო გამოფენილი.
_მინდა, ეს დღე მოგილოცოთ ჩვენი ცენტრის სახელით და გითხრათ, რომ ეს არის ჩვენი ძალზე მნიშვნელოვანი აქტივობა. ჩვენი პროექტის „ამაგდარი მხატვრების“ მიხედვით, დღეს ასევე გაიხსნება მხატვარ ჯემალ მიმინოშვილის სკულპტურა „გურული ფირალი“, – დარბაზში შეკრებილთ მიესალმა და სიახლეებზე ესაუბრა, სახვითი ცენტრის წარმომადგენელი, ლია ურუშაძე.
გურიის მხატვართა კავშირის თავმჯდომარემ, თამაზ დარჩიამ და სახვა სიტყვით გამომსვლელებმა ისაუბრეს მხატვართა გამოფენის დიდი მნიშვნელობაზე. მათ ხაზი გაუსვეს, რომ ბოლო ორ წელიწადში პანდემიამ ხელი შეუშალა ცოცხალი ღონისძიებების ჩატარებას, თუმცა სასიხაურულოა, რომ პროცესი დაიძრა.
_მხატვრებისთვის ასეთი მხარდჭერა ძალიან კარგია, სტიმულის მიმცემია. შეიძლება, ხელოვანს ტაში არ სჭირდებოდეს, თუმცა, ასეთი მხარდაჭერა მოგვიანებით ჰპოვებს ასახვას მხატვრის შემოქმედებაში. ესთეტიკა, რასაც სახვითი ხელოვნება ჰქვია, მუდამ დაფარულ მდგომარეობაშია და შემდეგ ვხედავთ, – თქვა სახვითი ცენტრის დირექტორმა, მხატვარმა ავთანდილი თავართქილაძემ.
გამოფენაზე წარმოდგენილი იყო როგორც ოზურგეთის, ისე ჩოხატაურელი და ლანჩხუთელ მხატვართა ნამუშევრები.
ჩოხატაურის სამხატვრო სკოლის დირექტორმა მზია კვინტრაძემ მადლობა გადაუხადა გალერეის ხელმძღვანელობას, აქ მოსულ საზოგადოებას:
_უღრმესი მადლობა ამ ღონისძიების მესვეურებს. ეს გალერეა არის ხელოვნების კერა, თუმცა, ჯერ სიყვარულია და შემდეგ არის შემოქმედება. ამიტომ აცოცხლებს და ახალი რაკურსით ანახვებს ადამიანს ამდენ თავისივე დაფრთიანებულ ხელოვანს! – თქვა მან.
ღონისძიების დასასრულს, სამხატვრო გალერეის წინ, გახსნეს ჯემალ მიმინოშვილის სკულპტურა „გურული ფირალი“.
ნამუშევარი მხატვრის შვილმა ჩამოხსნა.
_აწი „გურული ფირალი“ აქ გვეყოლება. ეს იქნება უნიჭიერესი ხელოვანის, ჯემალ მიმინოშვილის ხსოვნის უკვდავყოფა, – თქვა ავთანდილ თავართქილაძემ.
ავტორი
