ზაფხულის ცხელი დღეები დასვენებასთან და გართობასთან ასოცირდება. ამ დროს დიდიან-პატარიანად ყველა სკვერებსა თუ პარკებში იყრის თავს.
დაბა ჩოხატაურში, 9 აპრილის სახელობის სკვერში მდებარე საბავშვო ატრაქციონები ჩოხატაურელი ბავშვებისთვის წელიწადის ამ დროს ერთადერთ გასართობს წარმოადგენს, მაგრამ, სამწუხაროდ, როგორც აღმოჩნდა, სკვერი მოუწესრიგებელია, ბავშვებისთვის სათამაშოდ დაყრილი ქვიშა ფეკალიებით დაბინძურებული, ატრაქციონები კი დაზიანებულია და შეცვლას საჭიროებს.
“ყოველ საღამოს ამ პარკში ვართ. ბავშვს გარეთ გასვლა და თანატოლებთან გართობა, სასრიალოზე სრიალი უნდა. თუ უარს ვეტყვით წამოყვანაზე, ტირილს იწყებს, პატარაა ჯერ და არ ესმის იმდენი, რომ სკვერი დაბინძურებულია _ ქვიშას, როგორც ჩანს, ქუჩის ცხოველები აბინძურებენ. რთულია, პატარებს თამაში აუკრძალო, როცა მიზეზი არ ესმით”, _ ამბობს პარკში მყოფი ერთ-ერთი ქალბატონი ჩვენთან საუბრისას.
“იქნებ, ატრაქციონები შეცვალონ. თუ ამას ვერ ახერხებს ჩვენი ხელისუფლება, ქვიშა მაინც გამოცვალონ. რამე იღონონ, რომ ასეთ ბინძურ გარემოში არ მოგვიწიოს ბავშვების გამოყვანა”, _ ამბობს პარკში მყოფი კიდევ ერთი პიროვნება და საკუთარი ვინაობის გამხელისგან თავს იკავებს.
იგეგმება თუ არა ჩოხატაურში 9 აპრილის სკვერის რეაბილიტაცია, ამის გასარკვევად ჩოხატაურის მუნიციპალიტეტის მერს, დავით შარაშიძეს ვესაუბრეთ.
_ ბატონო დავით, იგეგმება თუ არა 9 აპრილში საბავშვო ატრაქციონების განახლება?
_ ჩოხატაურის მუნიციპალიტეტში მიმდინარეობს მასშტაბური პროექტი, რომელიც ხორციელდება პრემიერ-მინისტრის მიერ ინიცირებული პროექტის _ “განახლებული რეგიონების” ფარგლებში. მთლიანად უტარდება რეაბილიტაცია მუნიციპალიტეტის ცენტრს, ასევე, ჩაუტარდება რეაბილიტაცია ნოდარ დუმბაძის და ანა კალანდაძის სკვერებს. ამის შემდეგ გაკეთდება გამდინარე ორპირას კალაპოტის რეაბილიტაცია. ამ ყველაფრის დასრულების შემდეგ მოხდება 9 აპრილის სკვერის რეაბილიტაციაც.
_ როდის უნდა დასრულდეს რეაბილიტაციის პროცესი?
_ 9 აპრილის პარკი წლის ბოლომდე იქნება რეაბილიტირებული, გათანამედროვდება, უფრო კარგი და ლამაზი გახდება.
რეაბილიტაციის შემდეგ ვგეგმავთ, რომ უფრო მაღალი ღობე გავაკეთოთ, გარდა ამისა, ქვიშის ნაცვლად გავაკეთებთ უმაღლესი სტანდარტების შესაბამის კაუჩუკს, რომელიც აპრობირებულია მსგავსი ტიპის სკვერებში.
_ კიდევ რა შეიცვლება 9 აპრილის სახელობის სკვერში?
_ მემორიალს ჩაუტარდება რეაბილიტაცია. დაახლოებით, ერთი თვის წინ, ახალი ხეები დავრგეთ, მაგრამ კიდევ ვგეგმავთ დარგვას. ახალი საბავშვო ატრაქციონების ჩამოტანაა დაგეგმილი და მანდვე დავამონტაჟებთ, სადაც ბავშვები შეძლებენ თამაშს. გარდა ამისა, დამონტაჟდება თანამედროვე ლედ განათებებიც, _ ამბობს მუნიციპალიტეტის მერი.
ავტორი
