რუსი მილიარდერი ოლეგ დერიპასკა აცხადებს, რომ რუსეთის უკრაინაში შეჭრის შედეგად გამარჯვებული არცერთი მხარე არ იქნება. ის ყურადღებას ეკონომიკურ გავლენაზე ამახვილებს.„მაწუხებს, რამდენად სწრაფად მივატოვეთ ყველაფერი, რაც (ეკონომიკურად) იყო მიღწეული 90-იან წლებში, შემდეგ მივატოვეთ ყველაფერი, რასაც მივაღწიეთ 2000-იან წლებში და ახლა ვსხედვართ და ველოდებით გამარჯვებას. რისი გამარჯვება, ვისი გამარჯვება? “ _ განაცხადა reuters-ის ცნობით, დერიპასკამ.
„ვფიქრობ, რომ უკრაინის განადგურება კოლოსალური შეცდომა იქნება, მათ შორის ჩვენთვის“,_ აღნიშნა დერიპასკამ.
კეთილდღეობის მზარდი დონე დაკავშირებული იყო რუსეთის კერძო სექტორის განვითარებასთან და კავშირების დამყარებასთან დანარჩენ ევროპასთან, როგორც რუსეთის მთავარ ეკონომიკურ პარტნიორთან. მაგრამ „აშკარაა“, რომ დასავლეთის სანქციები ახლა უფრო მეტად აზიანებს რუსეთს, ვიდრე ევროპას, _ თქვა დერიპასკამ, რუსული ალუმინის გიგანტის Rusal-ის (RUAL.MM) დამფუძნებელმა.
ეს ეწინააღმდეგება პუტინის მიერ არაერთხელ გაჟღერებულ არგუმენტს, რომ რუსეთი გახდება უფრო ძლიერი.
“რუსეთში რეჟიმის შეცვლის პოტენციალი არ არსებობს. ოპოზიციამ ამჯობინა ლამაზი ევროპული ხედები და უკან დაიხია ქვეყნის ცხოვრებიდან”, _ განაცხადა დერიპასკამ.
როგორც ცნობილია, რუსეთის ბევრი წამყვანი ოპოზიციური ფიგურა, განსაკუთრებით კრემლის ციხეში მყოფი კრიტიკოსის ალექსეი ნავალნის თანამოაზრეები, გაიქცნენ ევროპის სხვა ქვეყნებში, რათა თავი დააღწიონ დევნას.
