უკრაინის პრეზიდენტმა ვოლოდიმირ ზელენსკიმ დასავლელ მოკავშირეებს მოუწოდა, მის ქვეყანას თანამედროვე, ეფექტური საჰაერო თავდაცვის სისტემები მიაწოდონ. მან ამის შესახებ მას შემდეგ განაცხადა, რაც რუსეთმა სამშაბათს, 5 ივლისს, დასავლეთ უკრაინაში, ხმელნიცკის რეგიონში დაარტყა სამიზნეებს, რამაც გამოიწვია საჰაერო თავდასხმის სირენების ჩართვა მთელ ქვეყანაში.
„რუსული არმია არანაირ შესვენებას არ იღებს. მას ერთი ამოცანა აქვს – ხალხს სიცოცხლე წაართვას, ხალხი დააშინოს- ისე, რომ რამდენიმე დღე საჰაერო განგაშის გამო ხალხმა თავი ტერორის ნაწილად იგრძნოს. ამ საღამოს კიევმა და ისევ თითქმის მთელმა უკრაინამ გაიგო საჰაერო განგაში.
რაკეტების ნაწილი ჩამოაგდეს ჩვენმა საჰაერო თავდაცვის ძალებმა. ჩვენ, არცერთი დღით არ შევამცირებთ ჩვენს დიპლომატიურ საქმიანობას, რათა მივიღოთ თანამედროვე რაკეტსაწინააღმდეგო სისტემები უკრაინისთვის საკმარისი რაოდენობით.
ეს არის ჩვენი სახელმწიფოს მაქსიმალური ამოცანა – უზრუნველყოს უკრაინელების ძირითადი უსაფრთხოება, ძირითადი დაცვა სარაკეტო თავდასხმებისგან უკვე წელსვე. მაგრამ ამ ამოცანის შესრულება დამოკიდებულია არა მხოლოდ ჩვენზე, არამედ ჩვენი პარტნიორების მიერ ჩვენი ფუნდამენტური საჭიროებების გაგებაზეც“, – თქვა ზელენსკიმ.
ცნობისთვის, ხმელნიცკის რეგიონის სამხედრო ადმინისტრაციის ხელმძღვანელმა სერხი ჰამალიიმ განაცხადა, რომ ტერიტორიაზე ოთხი რაკეტა იქნა გასროლილი. ერთ-ერთი ჭურვი უკრაინის საჰაერო თავდაცვამ მოიგერია, ნამსხვრევები შეპეტივის რაიონში ჩამოვარდა. დანარჩენი სამი დაეცა სამოქალაქო ინფრასტრუქტურას
”დარტყმის სამიზნე იყო წყლის კოშკი, რომელიც სრულად ამარაგებს საზოგადოებას წყლით,” – თქვა ჰამალმა და აღნიშნა: „აფეთქებების შედეგად ერთი ადამიანი დაშავდა”.
ზელენსკის თქმით, სამშაბათს, ასევე იყო რუსული დარტყმები სუმში, მიკოლაივში და დნეპროპეტროვსკში.
ავტორი
