ბერძნული მედიის ინფორმაციით, სამართალდამცველებმა მასშტაბური სპეცოპერაციის შედეგად, დააკავეს საქართველოს 13 მოქალაქე, რომლებსაც ბრალი ედებათ ძარცვაში, ქურდობასა და ყაჩაღობაში.
მედია, დაჯგუფების მეთაურად 72 წლის “კანონიერ ქურდს”, კაკო ბილანიშვილს ასახელებს და მის ფოტოსურათებს აქვეყნებს.
გამოცემა წერს, რომ ბილანიშვილს ემორჩილება ჯგუფის ყველა წევრი და აბარებდნენ ანგარიშს. ,,მის მიმართ ჯგუფის სხვა წევრები ყოველ დღე ავლენდნენ სრულ პატივისცემას, განსაკუთრებით დიდი იყო მასთან შეხვედრის სურვილი, რათა მისთვის ქურდობით მიღებული ფული და სხვა ძვირფასეულობა გადაეცათ და თანაგრძნობა მოეპოვებინათ“, – წერს მედია.
როგორც ბერძნული მედია წერს, ბილანიშვილის გარდა, დაკავებულები არიან: 33 წლის ბექა ბალახაძე, 31 წლის ლიკა ჟვანია, 26 წლის ზაზა თევზაძე, 38 წლის დავით რუბაშვილი , 30 წლის მიხეილ შანყულაშვილი, 27 წლის ჯემალ ლეჟავა, 32 წლის ლაშა ჯიმშიტაშვილი, 31 წლის ოთარ თხელიძე, 41 წლის რაშიდ მაჰმუდი, 31 წლის გიორგი ჯვარშეიშვილი, 38 წლის შალვა კუხიანიძე, 41 წლის დავით ბარძიმაძე.
საერთო ჯამში, მათ მიერ ნაძარცვი ნივთების ღირებულება 434 ათას ევროს აჭარბებს.
სულ დადგენილია ძარცვის 47-მდე შემთხვევა.
მედიის ინფორმაციით, პოლიციაში აცხადებენ, რომ ჩხრეკისას ამოღებულია ცეცხლსასროლი იარაღი, მათ შორის ადგილობრივი პოლიციელების სახელზე გაფორმებული, რაც აჩენს ეჭვს, რომ ქართველების დაჯგუფებამ სამართალდამცველების სახლებიც გაქურდა. მედიის ინფორმაციით, ნაძარცვის რეალიზაცია ძირითადად ათენში მდებარე ერთ-ერთ ქართულ რესტორანში ხდებოდა, რომლის მფლობელიც ასევე დაპატიმრებულია.
როგორც პოლიციაში აცხადებენ, დაკავებულთა ნაწილი წარსულში ნასამართლევია, ნაწილი კი საბერძნეთიდან რამდენიმე წლის წინ გააძევეს, თუმცა შეცვლილი გვარით მათ უკან დაბრუნება მაინც მოახერხეს.
ცნობისთვის ,,კანონიერი ქურდი“ კაკო ბილანიშვილი ავთანდილ ბილანიშვილის, იგივე “კაწროს” მამაა, რომლის სახელიც გიორგი შაქარაშვილის მკვლელობის საქმეში ფიგურურებდა.
