ოზურგეთის მუნიციპალიტეტის საკრებულოს და “ერთიანი ნაციონალური მოძრაობის“ წევრი ბესო ქათამაძე ფრაქცია “ქართული ოცნების“ თავმჯდომარეს მარიკა ჩხიკვიშვილს პასუხობს.
ცნობისთვის, მარიკა ჩხიკვიშილმა საკრებულოს სხდომაზე განაცხადა: “ნაციონალური მოძრაობა” დესტრუქციული ქმედებებით ყველანაირად ცდილობს ქვეყანაში იყოს ქაოსი, ომი და არეულობა. ამ პარტიის ოზურგეთის წარმომადგენლები კი საკრებულოს ყველა სხდომაზე ცდილობენ ხელი შეუშალონ კონსტრუქციულ მუშაობას, შეაფერხონ საკრებულოს საქმიანობა, მუნიციპალიტეტის წინსვლა და განვითარება. თუმცა ეს არ გამოგივათ!“ – თქვა მარიკა ჩხიკვიშვილმა.
“ერთიანი ნაციონალური მოძრაობის“ წევრის ბესო ქათამაძის თქმით, თუ ვინმე ოზურგეთში “ნაციონალურ მოძრაობაზე“ ხმას ვერ უნდა იღებდეს, ეს მარიკა ჩხიკვიშვილია, რომელიც კოორდინატორი იყო იმ პერიოდში, როდესაც ეს პარტია იყო ხელისუფლებაში.
“სინდისი რომ აწუხებდეს და გააჩნდეს, მართლა უნდა შერცხვენოდა დავითაშვილის ფოტოს ხელში აღება და საკრებულოზე აფრიალება, რადგან ზუსტად იმ დროს როცა კობა დავითაშვილს სამწუხაროდ ფიზიკურად გაუსწორდნენ, მარიკა და მისი ოჯახი ნაციონალური ხელისუფლების მეხოტბეები იყვნენ. რაც შეეხება რუსული გრუს და კაგებეს ნარატივს თითქოს ჩვენ ომი გვინდა ესაა ყველა ამაზრზენი ცილისწამება, რაც ოცნების ბინძურ, რუსულ ტვინებში მოიხარშა. ეს ხდება ზუსტად იმ დროს როდესაც რეგიონში საომარი მოქმესებები მინდინარეობს რუსეთ-უკრაინას შორის, რომელთან მიმართებითაც ოცნებამ პუტინის რუსეთის მხარდაჭერა დაიწყო. ამას ვამბობ ფაქტებით, რომელიც დადასტურებულია საბაჟო დოკუმენტაციით (ბესო ქათამაძემ სამი დოკუმენტი მიაწოდა ავტ), სადაც ნათლად ჩან როგორ გადასცა ჩვენმა ხელისუფლებამ ამერიკული რადიოკავშირის ,,მოტოროლას” რაციები ბელარუსის ტერიტორიაზე რუსეთს, რასთან დაკავშირებითაც ამერიკულ მხარეს აქვს კითხვები. სამარცხვინო ბრალდებების და რუსული ნარატივის გაჟღერებით: “ომი გინდათ“ თრგუნავენ მოსახლეობას, რა დროსაც ყველა თავის უკუღმართობას და უმოქმედობას ოპოზიციას გვაბრალებენ, ამიტომაც მე ვფიქრობ სამარცხვინოდ დაასრულებენ თავიანთ რუსულ მართველობას,“ – აღნიშნა “გურია ნიუსთან“ საუბრის დროს ბესო ქათამაძემ.
ავტორი
