ოზურგეთში, ბოლო ორიოდე თვის განმავლობაში, ძალზე აქტუალური გახდა ოჯახების თუ მეგობრების წრეებიდან შეკრება და თურქეთში სხვადასხვა პროდუქტის შესაძენად წასვლა.
_500 ლარი როგორმე უნდა მოაგროვო ან ისესხო და მთელი წლის სამყოფი საკვები პროდუქტის მარაგს ჩამოიტან. სხვა გზა არ დაგვიტოვეს ხალხს. ყოველდღე ძვირდება ყველაფერი. ვინმე გვიპასუხებს, თურქეთში რატომ არის ასე იაფი პროდუქტი და აქ ცეცხლს რატომ უკიდებენ? ადრე სამუშაოდ გარბოდა ხალხი, ახლა ზეთისთვის გარბიან …ვაი, სირცხვილო… ესაა ბიზნესი და ესაა მთავრობა? _ ასე სუბრობენ „გურია ნიუსთან“ ოზურგეთის ბაზარსა თუ მაღაზიებში მოსიარულე მომხმარებლები.
განსაკუთრებულ გულისწყრომა იმის გამო გამოთქვამენ, რომ სულ რაღაც წლინახევრის წინ, ერთი ბოთლი ზეთი 2.60 ლარი ღირდა. ახლა კი ათი ლარი ღირს.
_ახლა იმას ვფიქრობთ, ფული როგორმე შევაგროვოთ ან ვისესხოთ… თხილის სეზონი მოდის. წინასწან აანონსებენ ყველა კუთხე-კუნჭულში, რომ ფასი არ ექნება. თუმცა, როგორც ჩაიბარებენ, ისე გავყიდით და მაშინვე გავიქცევით თურქეთში. მეზობლებმა 500 ლარად იმდენი პროდუქტი ჩამოიტანეს, მთელი წელი ეყოფათ. აქაური ფასით, 500 ლარად სამი თვის სამყოფს, მარტო ზეთს თუ იყიდი. სამარცხვინო ამბავი გვჭირს. ხალხი ასე როგორ უნდა დაახრჩო? ჰო, გვითხრან ახლა, ბიზნესია, ბატონო, ბიზნესიო…ბიზნესი კი არა ყაჩაღობაა. მთავრობის ნება უნდა იყოს, რომ ეს ბიზნესი წესიერად მუშაობდეს..._ გვეუბნებიან ოზურგეთელი ქალბატონები: გულიკო ცეცხლაძე, მაია ქავთარაძე, ნინო და მაია მამალაძეები და სხვები. ისინი დილაადრიან ოზურგეთის ბაზარსა და მარკეტებს სტუმრობდნენ ზეთის და სხვა აუცილებელი, ყოვლდღიური პროდუქტის შესაძენად.
ავტორი
