Gazprom-მა იტალიაში ბუნებრივი აირის მიწოდება მესამედით შეამცირა. ამის შესახებ განცხადებას იტალიის სახელმწიფო ენერგეტიკული კომპანია Eni ავრცელებს. – წერს reuters.
გამოცემა წერს, რომ Nord Stream 1 მილსადენი, რომელიც გაზის ტრანსპორტირებას რუსეთიდან გერმანიაში ახორციელებს, შეჩერებულია დაგეგმილი ტექნიკური სამუშაოების გამო, რაც იწვევს შეშფოთებას ევროპისთვის გაზის მიწოდებასთან დაკავშირებით, თუ გათიშვა გაგრძელდება.
“გაზპრომი დღეში დაახლოებით 21 მილიონი კუბური მეტრის მოცულობის ბუნებრივ აირს მოგვაწვდის, ხოლო ბოლო რამდენიმე დღის განმავლობაში Eni-მ მიიღო დღიური მოცულობა დაახლოებით 32 მილიონი კუბური მეტრი“, – წერს Eni განცხადებაში.
კომპანიას გაზის დეფიციტის მიზეზი არ დაუსახელებია – წერს გამოცემა.
როგორც reuters წერს, იტალიის ეკოლოგიური განვითარების მინისტრის, რობერტო ჩინგოლანის თქმით, იტალია ცდილობს რუსულ გაზზე დამოკიდებულება უახლოეს მომავალში კიდევ უფრო შეამციროს და პარალელურად, ზამთრისთვის რეზერვები შეავსოს.
“წლის უკანაკნელ თვეებში, მარაგების 90% აუცილებლად უნდა შევავსოთ. მომდევნო ორი წლის განმავლობაში გაიზრდება ახალი მომწოდებლების რაოდენობა, რაც საშუალებას მოგვცემს ვიყოთ გონივრულები და დამოუკიდებელი ვიყოთ რუსი მომწოდებლებისგან 2024 წლის მეორე ნახევრისთვის, მაგრამ 2022 წლის ზამთარი ცოტა უფრო რთული იქნება“. – თქვა ჩინგოლანიმ.
გაზის ქსელის ოპერატორი Snam-ის (SRG.MI) ხელმძღვანელმა თქვა, რომ იტალიამ ამჟამად შეავსო თავისი გაზის საცავის სიმძლავრის დაახლოებით 64%
როგორც გამოცემა წყაროზე დაყრდნობით წერს, მთავრობა ამჟამად ვერ ხედავს გაზის საგანგებო გეგმის განხორციელების აუცილებლობას, რადგან ქვეყანა ცდილობს გაუმკლავდეს რუსეთის მიწოდების ვარდნას და ენერგიის ზრდას
პარალელურად, წინასწარ დაგეგმილი ტექნიკური სამუშაოების გამო მილსადენი ჩრდილოეთის ნაკადი 1, რომელიც რუსეთსა და გერმანიას აკავშირებს, მომდევნო 10 დღის განმავლობაში ფუნქციონირებას წყვეტს.
გასულ თვეში, რუსეთმა ჩრდილოეთის ნაკადი 1-ით გაზის მიწოდება 40%-მდე შეამცირა, ამის მიზეზად კი ტექნიკური შეფერხებები დაასახელა. ზემოხსენებულ მილსადენში წელიწადში 55 მილიარდი კუბური მეტრი გაზი გადის.
ავტორი
