ერთი კვირის წინ ცნობილი გახდა რომ საქართველოს ნაკრებისა და ბათუმის „დინამოს“ მოთამაშეები ზურიკო დავითაშვილი და ირაკლი აზაროვი კარიერას იტალიაში გააგრძელებდნენ. ორი დღის წინ ქართულ სპორტულ მასმედიაში გაჟღერდა ცნობა რომ ორივე ფეხბურთელი მომავალ სეზონს სერბეთში გაატარებს. დასახელებული იყო კლუბიც – ბელგრადის „ცრვენა ზვეზდა“.
გუშინ ამ თემას სერბული მედიაც გამოეხმაურა. გამოცემა „Republika.rs“-ის მტკიცებით, აზაროვი ახლოს არის „ცრვენა ზვეზდაში“ გადასვლასთან. სერბეთის ჩემპიონს სჭირდება მარცხენა მცველი, რადგან ამ პოზიციაზე დიდი ხანია უკონკურენტოდ არის მილან როდიჩი.
რაც შეეცება დავითაშვილს. გამოცემა „Sportal.blic.rs“-ის ცნობით, საქართველოს ნაკრების თავდამსხმელს ბელგრადის „პარტიზანს“ უკავშირებენ.
გუშინ ცნობილი გახდა რომ თორნიკე ოქრიაშვილი შესაძლოა, ბათუმის „დინამოში” ჩაირიცხოს.
ქართველმა სამხრეთ კორეის „ჯეონბუკში“ სამედიცინო შემოწმება ვერ გაიარა და ახლა კვლავ უკლუბოდაა.
თორნიკეს ბოლო გუნდი კვიპროსის „აპოელი“ გახლდათ, რომელიც გასული სეზონის დასრულების შემდეგ დატოვა.
გუშინ ხვიჩა კვარაცხელიას შესახებ ცნობილმა საფეხბურთო მენეჯერმა პიეტრო ლო მონაკომ ისაუბრა.
„ნაპოლის“ მთავარი დამრტყმელი ძალა? ვიმედოვნებ, ასეთი კვარაცხელია იქნება, ამის მართლა მჯერა. თუ ქართველი აფეთქდება, აუცილებლად გახდება სპალეტის გუნდის მთავარი მოთამაშე. ხვიჩას თავისუფლება უნდა მიეცეს, მთელი მარცხენა ფლანგი მის განკარგულებაში უნდა იყოს, მაგრამ „ნაპოლის“ ტრანსფერები აუცილებლად სჭირდება. კარგი იქნება, თუ აურელიო დე ლაურენტისი 2 ფორვარდსა და 1 ნახევარმცველს შეიძენს. ამ შემთხვევაში, ნეაპოლელების შემადგენლობა სრულად დაკომპლექტდება”, – განაცხადა ლო მონაკომ.
პირველი სექტემბრიდან თბილისი კალათბურთში ევროპის ჩემპიონატის ფინალური სტადიის ერთ-ერთ ჯგუფს უმასპინძლებს.
გუშინ „ფიბა“-ს ვებგვერდზე ევრობასკეტის წინ მორიგი რეიტინგი გამოქვეყნდა, სადაც საქართველო აღნიშნული ტურნირის მონაწილე 24 ნაკრებს შორის მე-14 ადგილზეა.
„საქართველო იმ ნაკრებთა სიაშია, რომელთაც ამჯერად თამაში მშობლიურ გარემოში მოუწევთ. ევრობასკეტისთვის აშენებული ახალი არენა დიდი ზურგი უნდა იყოს ქართველი კალათბურთელებისთვის, რომელთაც გასულ თვეში ესპანეთთან მატჩში მნიშვნელოვანი მოგების გემო შეიგრძნეს, თუმცა იმავე მეტოქესთან ჯგუფურ ეტაპზე თამაშს კიდევ უფრო დიდი დატვირთვა ექნება. საქართველოს ნაკრებს ერთ-ერთი უძლიერესი წინა ხაზი ეყოლება მას შემდეგ, რაც თორნიკე შენგელია-გიორგი შერმადინის დუეტს გოგა ბითაძე შეუერთდება“.
ამ რეიტინგით საქართველო ისეთ ნაკრებებს უსწრებს, როგორებიც უკრაინა, მონტენეგრო, ბოსნია-ჰერცეგოვინა და პოლონეთი არიან. უკან არიან ჩვენი ჯგუფის სხვა წევრები: ბელგია და ბულგარეთიც. სამაგიეროდ, ჩამოვრჩებით ხსენებულ ესპანეთსა და თურქეთს.
გუშინ ამერიკულმა გამოცემამ „We Talk Hoops“ NBA-ში შესაძლო დიდ გაცვლაზე დაწერა, რომელშიც 4 კლუბის 10 კალათბურთელი იქნება ჩართული, მათ შორის კი, „ინდიანა პეისერსის“ ქართველი ცენტრი გოგა ბითაძეც ფიგურირებს.
ცნობილი ხდება რომ „ინდიანა“ „ლოს ანჯელეს ლეიკერსში“ გაუშვებს ორივე ცენტრს – მაილს ტერნერსა და გოგა ბითაძეს, სანაცვლოდ კი, რასელ ვესტბრუკი, ტეილენ ჰორტონ-ტაკერი და 2025 წლის დრაფტის პირველ რაუნდში არჩევანი ერგება.
ლებრონ ჯეიმსის გუნდი დამატებით მაიკ კონლისაც მიიღებს, სხვა ორი კლუბის სარგებელი კი ასეთია: „იუტა ჯაზს“ დაემატებიან ჯულიუს რენდლი, დერიკ როუზი და ევან ფურნიე 2024 და 2026 წლების დრაფტის პირველი რაუნდის არჩევნებთან ერთად, ხოლო „ნიუ იორკ ნიკსი“ დონოვან მიტჩელითა და ტი ჯეი მაკკონელით გაძლიერდება.
ეს მხოლოდ ვარაუდია და ჯერჯერობით, ოფიციალური ინფორმაცია არ არსებობს, თუმცა, თუ ბითაძე „ლეიკერსში“ ისევ მაილს ტერნერთან ერთად აღმოჩნდება, დიდად სარგებლიანი არ უნდა იყოს. „ინდიანაში“ სასტარტო ცენტრად სწორედ ამერიკელი კალათბურთელი თამაშობს და რამდენად გაუძლებს გოგა მასთან და სხვა შესაძლო თანაამპლუელებთან კონკურენციას ძნელი სათქმელია.
გუშინ ცნობილი გახდა რომ საქართველოს საკალათბურთო ნაკრების გამთამაშებელი გიორგი ცინცაძე ტუნისის მოქმედ ჩემპიონ „მონასტირში“ ჩაირიცხა და მომავალ სეზონს აფრიკაში გაატარებს.
კონტრაქტი ერთ წელზეა გათვლილი. საინტერესოა, რომ როდესაც „მონასტირმა” ქართველი მცველის ტრანსფერის შესახებ ცნობა სოციალურ ქსელში განათავსა, ის სანდრო მამუკელაშვილმა მოიწონა, ტუნისური კლუბის გამოხმაურება კი მართლაც სახალისო იყო: „იმედი გვაქვს, რომ ერთ დღეს შენც ჩვენი ოჯახის წევრი გახდები“.
„მონასტირი“ აფრიკულ კონტინენტზე ერთ-ერთი საუკეთესო კლუბია და გასულ სეზონში ადგილობრივი ჩემპიონთა თასის გამარჯვებულიც გახდა. ტუნისურმა კლუბმა ფინალში ანგოლურ „პეტრო დე ლუანდას“ 83:72 სძლია, საუკეთესო კი საქართველოს ნაკრების ყოფილი ნატურალიზებული ამერიკელი კალათბურთელი მაიკლ დიქსონი იყო, რომელმაც 21 ქულა ჩააგდო. დარჩება თუ არა დიქსონი მომავალ სეზონშიც ტუნისში, ჯერჯერობით, გაურკვეველია.
ავტორი
