„ნაპოლი“ ძლიერდება – ჯოვანი სიმეონე, ჯაკომო რასპადორი. ვინ იქნება შემდეგი?

გუშინ ცნობილი გახდა რომ ახალი სეზონისთვის ხვიჩა კვარაცხელიას „ნაპოლი“ გაძლიერებას აგრძელებს. ნეაპოლურ კლუბში კარიერას გააგრძელებს ჯოვანი სიმეონე.

დიეგო სიმეონეს ვაჟი „ნაპოლიში“ იჯარის წესით ითამაშებს. 27 წლის მოთამაშეს „სერია A“-ში თამაშის მრავალწლიანი გამოცდილება აქვს. თავის დროზე არგენტინელს „ფიორენტინაში“, „კალიარისა“ და „ვერონაში“ უთამაშია. იტალიის ჩემპიონატში ჯამში 215 მატჩი აქვს ჩატარებული და მის ანგარიშზე 67 გატანილი გოლი და 20 შედეგიანი გადაცემაა.

ასევე გადაწყვეტილი ამბავია, რომ „სასუოლოს“ 22 წლის მოთამაშე ჯაკომო რასპადორი კარიერას „ნაპოლიში“ გააგრძელებს.

მხარეები შეთანხმდნენ, რომ თავდაპირველად „ნაპოლი“ ფეხბურთელს 1-წლიანი იჯარით აიყვანს და 5 მილიონ ევროს გადაიხდის, შემდეგ კი 30 მილიონ ევროდ გამოისყიდის. რასპადორი 2020 წელს იტალიის ნაკრებთან ერთად ევროპის ჩემპიონი გახდა და იტალიაში ერთ-ერთ ნიჭიერ ფეხბურთელად ითვლება.

გუშინ იტალიის „სერია A“-ს ოფიციალურმა ვებგვერდმა პირველი ტურიდან 5 საგოლე პასი გამოარჩია და ტოპხუთეულში პირველი ადგილი ხვიჩა კვარაცხელიას საგოლე გადაცემას მიაკუთვნა.

„ვერონასთან“ შეხვედრაში ხვიჩამ მატჩის 55-ე წუთზე ერთი შეხებით მეკარესთან პირისპირ დატოვა პიოტრ ჟელინსკი, რომელმაც გოლის გატანა შეძლო. ქართველმა შემტევმა მეტოქის დაცვაში არსებული დერეფანი, რომელიც პოლონელმა ნახევარმცველმა აითვისა, დროულად შენიშნა და პასი მართლაც იდეალური იყო.

ბრიტანული სპორტული მასმედიის მტკიცებიოთ „მანჩესტერ იუნაიტედი“ კიევის „დინამოსა“ და უკრაინის ნაკრების მეკარის გეორგი ბუსჩანის გადაბირებითაა დაინტერესებული.

28 წლის კარის დარაჯი კიევური გუნდის აღზრდილია და მას უკრაინულ გუნდთან კონტრაქტი 2026 წლამდე აკავშირებს. ვრცელდება ინფორმაცია იმის შესახებაც, რომ ბუსჩანის სამსახურით „ვესტ ჰემიცაა“ დაინტერესებული.

„მანჩესტერ იუნაიტედის“ სახელს საქართველოს ნაკრების მეკარე გიორგი მამარდაშვილსაც აქტიურად უკავშირებენ. შესაძლოა კლუბმა არჩევანი საქართველოსა და უკრაინის ნაკრებების მეკარეებიდან ერთ-ერთზე – გიორგისა და გეორგის შორის გააკეთოს.

გუშინ გამოცემამ „HULL Live“ გაავრცელა ცნობა რომ ლონდონის „არსენალის“ აკადემიის წევრი, სალაჰ ედინი იჯარის წესით „ჰალ სიტის“ შეუერთდება. სეზონის ბოლოს შოთა არველაძის გუნდს ჰოლანდიის სახელით მოასპარეზე მოთამაშის გამოსყიდვის უფლებაც ექნებათ.

18 წლის სალაჰი ცენტრალური ნახევარმცველია, რომელიც „არსენალმა“ 2020 წელს „ფეინოორდის“ აკადემიიდან დაიმატა და თავისი თაობის ერთ-ერთ უნიჭიერეს მოთამაშედ ითვლება.

გუშინ ცნობილი გახდა რომ ვეტერანი ურუგვაელი თავდამსხმელი ედინსონ კავანი მოლაპარაკებას „ლა ლიგის“ ბინადარ „ვილიარეალთან“ აწარმოებს და შეთანხმებასთან ძალიან ახლოსაა.

35 წლის თავდამსხმელი გასული სეზონის შემდეგ „მანჩესტერ იუნაიტედიდან“ წამოვიდა და ახლა თავისუფალი აგენტია. კავანის სახელს „ვალენსიასაც“ უკავშირებდნენ, თუმცა როგორც ჩანს, ურუგვაელი კარიერას „ვილიარეალში“ გააგრძელებს.

უკრაინაში კი დიდი სკანდალია. გამოცემა „Українська правда“ ავრცელებს დაზუსტებულ ინფორმაციას, რომ იმ დროს, როდესაც უკრაინა რუს ოკუპანტებთან იბრძვის, ქვეყნის ფეხბურთის ფედერაციის საპატიო პრეზიდენტი და უმაღლესი რადას დეპუტატი გრიგორი სურკისი თავის ძმასთან, კიევის „დინამოს“ პრეზიდენტ იგორ სურკისთან ერთად მონტე-კარლოში იმყოფება.

ძმები ოჯახებთან ერთად მონტე-კარლოს ერთ-ერთ ყველაზე ძვირადღირებულ სასტუმროში, ხუთვარსკვლავიან „Monte-Carlo Bay“-ს აპარტამენტებში ცხოვრობენ. ისინი იქ ერთი წლის განმავლობაში იქნებიან და ეს სიამოვნება დაახლოებით ორი მილიონი ევრო დაუჯდებათ.

გრიგორი სურკისი პარტიის „ოპოზიციური პლატფორმა – სიცოცხილსათვის“ წევრია, რომელიც უკრაინაში აკრძალეს.

სურკისებმა ორი ავტომობილით, რომლებშიც კიდევ 8 ადამიანი იმყოფებოდა, უკრაინის საზღვარი ჯერ კიდევ 26 თებერვალს გადაკვეთეს და თან 16 მილიონ დოლარზე მეტი ჩემოდნებით წაიღეს.

უკრაინელმა მესაზღვრეებმა სურკისების მანქანები არ შეამოწმეს და მათ არადეკლარირებული თანხის ქვეყნიდან გატანა დაუბრკოლებლად მოახერხეს.

ამის გამო გამოძიების სახელმწიფო ბიურომ სასაზღვრო კონტროლის ინსპექტორების მიმართ სისხლის სამართლის საქმე აღძრა. სურკისების მიერ დიდი ოდენობით თანხის ქვეყანაში შეტანა მაშინ უნგრელმა მესაზღვრეებმა დააფიქსირეს.