“ჯერ წყლის სამუშაოები დაიწყოს და მერე _ გზის. იხრჩობა ხალხი!”

“საქართველოს რეგიონებში გასახორციელებელი პროექტების ფონდის” დაფინანსებით ლანჩხუთის მუნიციპალიტეტის აკეთის ადმინისტრაციულ ერთეულში გზის რეაბილიტაციის სამუშაოების გახორციელება იგეგმება.

“გზასთან დაკავშირებით ძალიან კმაყოფილები ვართ. გადაწყვეტილი საკითხია _ გარდამავალი პროექტი იქნება. დაიწყება შუხუთიდან, შემდეგ ზემო აკეთში, გაგურში, ჭანჭათში _ აკეთის თემის ყველა სოფელს გაივლის. სამუშაოები დაიწყება წელს. ვინაიდან ზამთარში მუშაობა ვერ მოხერხდება, ზემო აკეთამდე წელს ამოვა გზა”, _ ასეთი განმარტებები გაკეთდა ლანჩხუთის მუნიციპალიტეტის ხელმძღვანელობის მხრიდან აკეთელი ახალგაზრდების პერფორმანსის პასუხად, რომელთაც რამდენიმე დღის წინ საკრებულოში საპროტესტო ბანერი მიიტანეს წარწერით _ “აკეთი ითხოვს გზას და წყალს!” და ადგილობრივ ხელისუფლებას ამ სოფლის მთავარი გასაჭირი კიდევ ერთხელ შეახსენეს.

ირკვევა, რომ პრობლემის მოსაგვარებლად გარკვეული ნაბიჯები მართლაც გადაიდგა, რამეთუ მუნიციპალიტეტის ბიუჯეტში, საკრებულოს უახლოეს სხდომის შემდგომ, აისახება გზის პირველი ეტაპის თანხა. საქმე ისაა, რომ “საქართველოს რეგიონებში გასახორციელებელი პროექტების ფონდიდან” ლანჩხუთის მუნიციპალიტეტს დამატებით ორი მილიონ 50 ათასი ლარი ერგო, რომლის ბიუჯეტში ასახვასაც საკრებულომ დასტური უახლოეს სხდომაზე უნდა მისცეს. ირკვევა, რომ რეგიონული ფონდის მიერ გამოყოფილი თანხიდან მეტი წილი სწორედ აკეთის ადმინისტრაციულ ერთეულში გზის რეაბილიტაციას მოხმარდება. საუბარია ერთი მილიონ 300 ათას ლარზე, რომლითაც აკეთის ადმინისტრაციულ ერთეულში, სოფელ შუხუთიდან სოფელ გაგურის ცენტრამდე გზის რეაბილიტაცია უნდა გახორციელდეს. პროექტის ჯამური ღირებულება ერთი მილიონ 368 422 ლარითაა განსაზღვრული და სამუშაოების შესასრულებლად ადგილობრივ ბიუჯეტს თანადაფინანსებისთვის 68 422 ლარის გაღება მოუწევს.

გარდა გზის პრობლემისა, აკეთის მოსახლეობა მიიჩნევს, რომ წყალი მათთვის სასიცოცხლოდ უმნიშვნელოვანესია. მეტიც, მათი ნაწილის აზრით, ადმინისტრაციულ ერთეულში უპირველესად სწორედ ეს პრობლემა უნდა აღმოიფხვრას და შემდეგ მოგვარდეს გზასთან დაკავშირებული საკითხები.

“სასიცოცხლოდ უმნიშვნელოვანესია, რომ ჯერ წყლის სამუშაოები დაიწყოს და მერე _ გზის. იხრჩობა ხალხი”, _ ამ სიტყვებით მიმართა რამდენიმე დღის წინ სოციალურ ქსელით ლანჩხუთის მერიას სოფლის ერთ-ერთმა მკვიდრმა, რის პასუხადაც მერიის პიარმა განმარტა, რომ “აკეთში ჭაბურღილების მოწყობა დასრულდა და წყლის მილების გაყვანა იწყება”.

იმავე საკითხზე სოფლის მაჟორიტარის ემზარ თედორაძის განმარტებით, წყალთან დაკავშირებით ტენდერი გამოცხადებული იყო, თუმცა, გარკვეული შემაფერხებელი პირობები შეიქმნა, რამაც საქმის დროში გაჭიანურება გამოიწვია. კერძოდ, მისი თქმით, აკეთის ტერიტორიაზე საჭირო წყლის დებეტი ვერ მოიძებნა და ამიტომ პროექტის კორექტირება დადგა დღის წესრიგში, რომ წყლის სათავე მეზობელ სოფელში მოეწყოს და იქედან მოხდეს აკეთის მოსახლეობისთვის სასმელი წყლის მიწოდება.

 “ქვემო აკეთში ნაპოვნი წყლის სათავე არ აღმოჩნდა სასმელად ვარგისი, ზემო აკეთში კი წყალი საერთოდ არ ამოვიდა. ამჟამად წყალი ამოვიდა შუხუთის ტერიტორიაზე, რომელიც მოხმარდება აკეთს, რაც საჭიროებს კორექტირებას პროექტში, რამაც გამოიწვია სამუშაოების გაჭიანურება. გვპირდებიან, რომ სამუშაოები აგვისტოდან დაიწყება და ნოემბრის თვისთვის მოხერხდება მისი დასრულება”, _ თქვა თედორაძემ, როცა საკრებულოში აკეთელმა ახალგაზრდებმა საპროტესტო ბანერი მიიტანეს წარწერით _ “აკეთი ითხოვს წყალს და გზას!”