„ვიწყებთ ქალაქის კიდევ ერთი ცენტრალური მაგისტრალის – კოსტავას გამზირის რეკონსტრუქცია – რეაბილიტაციას. პროექტი უკვე მომზადებულია და სამუშაოებზე ტენდერი ოქტომბერში გამოცხადდება. მოგეხსენებათ, უკვე წლებია კოსტავას ქუჩა – ქალაქის ერთ-ერთი მთავარი შემოსასვლელი – სავალალო მდგომარეობაშია და ძალიან აწუხებს თითოეულ ადამიანს ვინც აქ ცხოვრობს და გადაადგილდება. დაგეგმილი გვაქვს გზის საფარის სრულად განახლება, ახალი განათების სისტემის მოწყობა, საფეხმავლო და ველო ბილიკების კეთილმოწყობა და გამწვანება
კიდევ ერთი პროექტი, რომელიც ჩვენი მუნიციპალიტეტისთვის მნიშვნელოვანია – არის სოფელ ოზურგეთი-ნატანების შიდა სახელმწიფოებრივი გზის რეაბილიტაცია, რომელიც აქტიურად მიმდინარეობს. დასრულდა სამუშოების პირველი ეტაპი და უახლოეს პერიოდში მთლიანად დასრულდება გზის საფარის მოწყობა. გახსოვთ ოპოზიციის წარმომადგენლების წინასწარი სპეკულაციები ამ თემაზე, რომ სამუშაოები ნელი ტემპით წარიმართებოდა და პროექტს ვერ დავასრულებდით – სინამდვილეში, 25 დღეში მოხდა ძირითადი სამუშაოების განხორციელება და პირველი ფენა ასფალტ ბეტონის საფარის მოწყობა,“- განაცხადა ოზურგეთის მერმა, ავთანდილ თალაკვაძემ მერიის სხდომაზე.
მისივე თქმით ასევე დასრულდა ანასეულის ცენტრალური გზის რეაბილიტაცია და სოფელ დვაბზუში შიდა საავტომობილო გზის მოწყობა.
სოფელ მშვიდობაურში საჯარო სკოლას რეაბილიტაცია ჩაუტარდება
„საქართველოს მთავრობის მხარდაჭერით განვაგრძობთ ოზურგეთისთვის მნიშვნელოვანი პროექტების განხორციელებას. უკვე გამოცხადდა ტენდერი სოფელ მშვიდობაურის სკოლის შენობის რეაბილიტაციისთვის. რეაბილიტაცია ითვალისწინებს გათბობის სისტემის მოწყობასაც. ზრუნვა მომავალ თაობაზე, მათთვის უსაფრთხო და კომფორტული გარემოს შექმნა ჩვენი ერთ-ერთი მთავარი პრიორიტეტია. სკოლების რეაბილიტაციას საქართველოს მთავრობის მხარდაჭერით აქტიურად განვაგრძობთ და ამაზე უახლოეს პერიოდში მეტ ინფორმაციას მოგაწვდით,“- განაცხადა ოზურგეთის მერმა, ავთანდილ თალაკვაძემ.4.
განვაგრძობთ ჩვენი 8 პუნქტიანი გეგმის ერთ-ერთ მთავარ პრიორიტეტზე მუშაობას
„განვაგრძობთ ჩვენი 8 პუნქტიანი გეგმის ერთ-ერთ მთავარ პრიორიტეტზე მუშაობას – ეს გახლავთ წყალმომარაგების მიმართულება. ამჟამად მიმდინარეობს ზემო ნატანების უწყვეტი წყალმომარაგების სისტემის მშენებლობა. სამუშაოების 70% პრაქტიკულად დასრულებულია: შედეგად, მოეწყობა ცენტრალიზებული ქსელი, ჭაბურღილები, რეზერვუარი, საქლორატორო და ნატანების მოსახლეობა ხარისხიანი წყალმომარაგებით იქნება უზრუნველყოფილი. ამ პროექტს სახელმწიფო ბიუჯეტიდან 3 მლნ ლარზე მეტი მოხმარდება,“- აღნიშნავს ოზურგეთის მერი.
ვასრულებთ ჩვენი თანამოქალაქეებისთვის მიცემულ კიდევ ერთ პირობას
და სოფლებში ვიწყებთ გაზიფიცირების სამუშაოებს
„გვაქვს კიდევ ერთი პოზიტიური სიახლე გაზიფიცირების მიმართულებით. ვასრულებთ ჩვენი თანამოქალაქეებისთვის მიცემულ კიდევ ერთ პირობას და ოზურგეთის იმ სოფლებში ვიწყებთ გაზიფიცირების სამუშაოებს, სადაც ეს პრობლემა წლებია დგას. გაზის შეყვანა და დაერთება მოხდება შემდეგ სოფლებსა და დასახლებულ პუნქტებში: გოგიეთი, ჯუმათი, ძირიჯუმათი, ბოგილი, იანეთი, დვაბზუს ნასაკირალი, მთისპირი, ოქროსქედი, ვანისქედი და უკანავა. საქართველოს გაზის ტრანსპორტირების კომპანიამ გაზიფიცირებისთვის საჭირო ინფრასტრუქტურის სამშენებლო სამუშაოების შესრულებისთვის ტენდერი უკვე გამოაცხადა. ოზურგეთის სახელით მადლობას ვუხდი საქართველოს პრემიერ მინისტრს და მთავრობას მხარდაჭერისთვის, ამ მნიშვნელოვანი პროექტის დაფინანსებისთვის – სამუშაოების დასრულების შემდეგ, ოზურგეთის მუნიციპალიტეტში ყველა დასახლებული პუნქტი გაზიფიცირებული იქნება,“- განაცხადა ავთანდილ თალაკვაძემ.
(R)
