რუსი ოკუპანტების ტყვეობიდან 215 უკრაინელი დამცველი, მათ შორის 10 უცხოელი გათავისუფლდა. სანაცვლოდ რუსეთს დაუბრუნეს ოლიგარქი, ვიქტორ მედვედჩუკი და 55 ოკუპანტი. ამის შესახებ უკრაინის პრეზიდენტის აპარატის უფროსმა, ანდრი იერმაკმა ტელეგრამ არხზე დაწერა.
მისი თქმით, “აზოვსტალის” 5 გმირი მეთაური – 55 რუს ტყვეზე გაცვალეს, მათ უკრაინის მიმართ “არავითარი ინტერესი” არ გააჩნდათ. მისივე თქმით, გათავისუფლებულ უკრაინელებს შორის 124 ოფიცერია, 108 “აზოვის მებრძოლი“.
,,ვლადიმირ ზელენსკიმ მკაფიო ამოცანა დაისახა: ჩვენი გმირების დაბრუნება. შედეგი: ჩვენი გმირები თავისუფლები არიან.
მოხდა პატიმრების დიდი გაცვლა. მან გაიარა რამდენიმე ეტაპი და ძალიან განსხვავებულ ადგილას. რუსული ტყვეობიდან 215 ადამიანი დავიბრუნეთ,“ – წერს იერმარკი.
რუსი ოკუპანტებისგან გათავისუფლდა : სვიატოსლავ პალამარი, აზოვსტალის საზღვაო ქვეითთა ბრიგადის მეთაური სერგეი ვოლინა და აზოვის პოლკის მეთაური დენის პროკოპენკო, ასევე საპატრულო პოლიციის უფროსი მიხაილ ვერშინინი, აზოვსტალის მცველი კატერინა პოლიშუკი ე.წ. “პტაშკა” და აზოვსტალის მცველი მიხაილ დიანოვი, ე.წ. “პიანისტი“.
,,ძალიან მიხარია, რომ თავისუფლებაში ვხედავ ჩვენს ბიჭებსა და გოგოებს. ამისთვის ღირს ცხოვრება. უკრაინელის ყოველი სიცოცხლე ჩვენთვის უმაღლესი ღირებულებაა. ჩვენი თითოეული მოქალაქე გათავისუფლდება.
ეს არის უზარმაზარი წარმატება და მადლობელი ვარ ყველა ამ ოპერაციის მონაწილეს, ყველას, ვინც შეასრულა ეს ტიტანური საქმე. გულწრფელად ვულოცავ ჩვენს გმირებს სახლში დაბრუნებას. ჩვენ მათ ყველა საჭირო დახმარებას გავუწევთ – სამედიცინო, სოციალური და სხვა.
მათი დაბრუნება უკრაინელი ხალხის დამსახურებაა. უკრაინის თითოეული დამცველის დამსახურებაა, თითოეული მათგანის დამსახურებაა, ვინც ზურგს უმაგრებს. წინ კიდევ ბევრი გამოწვევაა. მაგრამ ჩვენ სინათლის მხარეს ვართ და სამყარო ჩვენს მხარესაა,“ – ამბობს უკრაინის პრეზიდენტის აპარატის უფროსი.
პრეზიდენტის აპარატის ხელმძღვანელის თქმით, ეს უკრაინის პრეზიდენტსა და თურქეთის პრეზიდენტ ერდოღანს შორის პირადი შეთანხმებების შედეგია. თურქეთში 5 უკრაინელი მეთაური იმყოფება ერდოღანის დაცვისა და უსაფრთხოების პირადი გარანტიით.
