გურიაში აცივდება. 20 ოქტომბრიდან მაღალ მთაში მოსალოდნელია ღამის საათებში ყინვა და თოვა- ამის შესახებ “გურია ნიუსს” გარემოს ეროვნული სააგენტოს მოკლევადიანი ამინდის პროგნოზის ბიუროს ხელმძღვანელმა დოდო გვაზავამ განუცხადა.
“ხვალ ვინარჩუნებთ თბილ და უნალექო ამინდს. მოსალოდნელია +25 გრადუსი.
20 ოქტომბრიდან იწყება ცივი ჰაერის მასების შემოჭრა დასავლეთ საქართველოში და მათ შორის გურიაშიც. ღამის და დღის მაქსიმალური ტემპერატურა ერთნაირი იქნება, დაახლოებით +18 გრადუსი. დღის პირველ ნახევარში ვერ გადავა თოვლში მაღალმთიანეთში, მაგრამ 20 ოქტომბრის საღამოს საათებში უკვე მოსალოდნელია თოვლჭყაპი და 21 ოქტომბერს თოვაში გადავა. ზომიერზე მეტი ნალექია მოსალოდნელი 21 ოქტომბრის დღის პირველ ნახევარში, ხოლო მეორე ნახევარში ნალექის ინტენსივობა შემცირდება. ჰაერის ტემპერატურაც დღისა და ღამის ერთმანეთს გაუსწორდება. დაბლობ რაიონებში დღისით თუ დაფიქსირდება +13 გრადუსი, ღამით მოსალოდნელია +12 გრადუსის დაფიქსირება. შესაბამისად, ჰაერის ტემპერატურა დაიკლებს მთებსა და მაღალ მთებშიც. მაღალ მთაში ჰაერის ტემპერატურა ღამით შესაძლოა იყოს 2 გრადუსი, მაგრამ დღისითაც 2 გრადუსი თოვლის მიმნიშნებელია.
22 ოქტომბრიდან გამოიდარებს, მაგრამ ღამის საათებში ყინვა გაძლიერდება. 23 ოქტომბრიდან ტემპერატურის მნიშვნელოვანი ვარდნა მოსალოდნელი აღარ არის, მოიმატებს +22, +23 გრადუსამდე. ღამის ტემპერატურა +12, +13 გრადუსი იქნება და მაღალ მთიან რაიონებში ალბათ უარყოფით ტემპერატურები დარჩება”,_ ამბობს გვაზავა.
გარემოს ეროვნული სააგენტოს ინფორმაციით, 20-21 ოქტომბერს საქართველოში მოსალოდნელია დროგამოშვებით წვიმა, ზოგან ძლიერი, დასავლეთის მიმართულების ძლიერი ქარი, ზღვაზე შესაძლებელია 3-4 ბალიანი შტორმული ღელვა. 21 ოქტომბერს მაღალმთიან რეგიონებში ზოგან შესაძლებელია თოვლი.
მოსალოდნელმა ძლიერმა ნალექებმა შესაძლებელია საქართველოს მდინარეებზე წყლის დონეების მნიშვნელოვანი მატება, პატარა მდინარეებზე წყალმოვარდნები, ხოლო მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს.
ავტორი
