ქალაქ ოზურგეთის #1 საჯარო სკოლაში იმ პედაგოგებს უმასპინძლეს, რომლებმაც პედაგოგობა სამი წლის შეწყვიტეს და სახელმწიფო პროგრამით ისარგებლეს. ეს შეხვედრა სკოლის სარეაბილიტაციო სამუშაოების გამო, სამი წლის წინ ვერ მოხერხდა.
სკოლიდან წასულ პედაგოგებს უჩვეულო გარემო დახვდა. საგანგებო ღონისძიებაზე 8 პედაგოგი იმყოფებოდა, რომლებისთვისაც მომზადა კონცერტი.
ჯემალ ჭელიძე (რომელიც ავადმყოფობის გამო ვერ დაესწრო ღონისძიებას), ნათელა სურგულაძე, ნანი სალუქვაძე, მანოლა ვაშალომიძე, ნინო მენაბდე, რუსუდან სარიშვილი, ზისანა კეჭაყმაძე, მანანა კვაჭაძე, თამარ ოსიპოვა, ირინა ცეცხლაძე, ნანა კალანდაძე _ ის პედაგოგები არიან, რომლებიც ამჟამად სკოლაში აღარ ასწავლიან. ამავე ღონისძიებაზე გაიხსნეს ბატონი ომარ თავბერიძე, რომელიც რამდენიმე ხნის წინ გარდაიცვალა და ამავე სკოლის პედაგოგი იყო.
ქალაქ ოზურგეთის #1 საჯარო სკოლის დირექტორმა მაია თავართქილაძემ ღონისძიების დასრულების შემდეგ ჟურნალისტებთან საუბრის დრო თქვა, რომ საშუალება მიეცა, მადლობა გადაეხადა და თბილი სიტყვები ეთქვა თაობების აღმზრდელი პედაგოგებისთვის.
“ძალიან ამაღლებული განწყობაა დღეს #1საჯარო სკოლაში. ამ არაჩვეულებრივმა პედაგოგებმა 3 წლის წინ დატოვეს სკოლა, ახლა კი მოგვეცა საშუალება, რომ გაგვეცილებინა, თბილი სიტყვა გვეთქვა და მათი ამაგი დაგვეფასებინა. მათი სითბო და სიკეთე, მართლაც თაობებს გადაეცემა“.
ნათელა სურგულაძე: _ ერთ ანდაზას გავიხსენებ _ მაშინ შეაქე მეგზური, როცა გზას ბოლომდე გაივლიო. ვხედავ, რომ კარგი მეგზური ვყოფილვარ _ ბევრმა მადლობა გადამიხადა. ამ სკოლას ყოველთვის დიდი სახელი ჰქონდა. 110 წლის იუბილე რომ გადაიხადეს, მეხუთე კლასელი ვიყავი და ახლაც მახსოვს ის დღესასწაული. თქვენ ვერ წარმოიდგენთ, როგორ მიყვარს ეს სკოლა. მე ობლად გავიზარდე და როდესაც მოვედი #1 საშუალო სკოლაში, ის სითბო, რომელიც იმ დღიდან მივიღე, დღემდე მომყვება.
ჩემი ემოცია დიდია. რაც სკოლიდან წავედი, დღეს პირველად მოვედი აქ. ძალიან განვიცდიდი. სკოლა ისე მიყვარს, როგორც საკუთარი ოჯახი, ამიტომ დიდი ემოციები მქონდა დღეს. ყოველთვის მზად ვიქნები, რომ ამ სკოლის სახელი გავაძლიერო.
ნინო მენაბდე: _ თითქმის 48 წელი ვასწავლიდით #1 საჯარო სკოლაში ფრანგულ ენას. დღეს, ჩემი აზრით, შედგა მადლობის და მადლიერების გამოხატვის ზეიმი. 2004 წლიდან ჩვენი სკოლის დიდი მხარდაჭერით მოხდა პროექტ „ცოდნის გაცვლის სახელოსნოს“ დაწყება, რაც გულისხმობდა მოსწავლეების გაცვლით პროგრამას საფრანგეთში. პროექტში 15 ქართველი და 15 ფრანგი მოსწავლე მონაწილეობდა. ზაფხულში ხდებოდა ეს გაცვლითი პროგრამა და ეს იყო ჩემთვის დიდი დასამახსოვრებელი დღეები. რამდენიმე წელი გრძელდებოდა ეს პროექტი.
ამაგდარ პედაგოგებს სიტყვით მიმართეს: სკოლის დირექტორმა მაია თავართქილაძემ; სკოლის კურსდამთავრებულებმა: ოზურგეთის მუნიციპალიტეტის მერმა ავთანდილ თალაკვაძემ, გურიის გუბერნატორის მოადგილე ქეთი მოისწრაფეშვილმა; განათლების მუშაკთა პროფკავშირის ოზურგეთის ორგანიზაციის თავმჯდომარე როზა გოგუაძემ; ოზურგეთის ტექნოპარკის მენეჯერმა ავთანდილ თავდიშვილმა.
საჩუქრები და ყვავილების თაიგული რვა პედაგოგისთვის მოამზადა ოზურგეთის მუნიციპალიტეტის მერიამ, ქალაქ ოზურგეთის #1-მა საჯარო სკოლამ, ოზურგეთის ტექნოპარკმა და განათლების მუშაკთა პროფკავშირის ოზურგეთის ორგანიზაციამ.
შეხვედრების დასასრულს კი, სკოლის პედაგოგებმა ფრენკ სინატრას „My way“ შეასრულეს და ამით კიდევ ერთხელ გამოხატეს პატივისცემა იმ ადამიანების მიმართ, რომელთა წვლილი დიდი იყო სკოლის განვითარებაში.
შეხვედრაზე, ასევე, ითქვა, რომ ქალაქ ოზურგეთის #1 სკოლადამთავრებულები დღეს ცენტრალურ და ადგილობრივ ხელისუფლებაში არიან, რითაც სკოლა ძალიან ამაყობს.
ავტორი
