შაბათს, დილის 4:20 საათზე, შავი ზღვის ფლოტის გემებს თავს დაესხნენ სევასტოპოლში, მათ ბაზებს. ამის შესახებ რუსეთის ფედერაციის თავდაცვის სამინისტრომ Telegram არხზე განაცხადა.
მოსკოვი ირწმუნება, რომ თავდასხმის უკან უკრაინა დგას, რომელმაც ათი უპილოტო საფრენი აპარატი და შვიდი ავტონომიური საზღვაო დრონი გამოიყენა.
რუსეთის ფედერაცია ამტკიცებს, რომ ყველა სამიზნე განადგურდა და რუსული ფლოტი თითქმის უვნებელია. საზღვაო ნაღმმტყორცნელმა „ივან გოლუბეცმა“ მცირე დაზიანება მიიღო.
რუსეთის თავდაცვის სამინისტრომ, ასევე, უკრაინა დაადანაშაულა გემებზე თავდასხმაში, რომლებიც უზრუნველყოფენ “მარცვლეულის დერეფნის” უსაფრთხოებას.
„ამ „ტერორისტული აქტის“ მომზადება და უკრაინის 73-ე საზღვაო ოპერაციების სპეციალური ცენტრის სამხედრო მოსამსახურეების წვრთნა განხორციელდა უკრაინის მიკოლაევის რაიონის ქალაქ ოჩაკოვში მდებარე ბრიტანელი სპეციალისტების ხელმძღვანელობით“, – ნათქვამია საოკუპაციო სამინისტროს განცხადებაში.
ისინი, ასევე, დასძენენ, რომ ეს ბრიტანელი სპეციალისტები, სავარაუდოდ, მონაწილეობდნენ რუსული გაზსადენების დაშლაში.
ავტორი
