აზიური ფაროსანას თემა, უკვე რამდენიმე წელია, აქტუალურია საქართველოში. „გურია ნიუსს“ არაერთი ადამიანი მომართავს და ეუბნება, რომ ჰაერის ტემპერატურის კლებასთან ერთად მწერმა სახლებში შემოსვლა დაიწყეს. მათი თქმით, წელს ფაროსანას საწინააღმდეგო ცივი ნისლით შეწამვლა ნაკლებად მოხდა, ზოგის თქმით კი, იმ უბნებში სადაც ისინი ცხოვრობენ, საერთოდ არ შეწამლულა.
„ერთხელ მოვიდა შეტყობინება, რომ კონკრეტულ რიცხვში ფაროსანას საწინააღმდეგო წამლით უნდა შეეწამლათ ჰაერი, მაგრამ უამინდობის შემთხვევაში გადაიდებაო. წვიმდა იმ კონკრეტულ დღე. ამის შემდეგ არც გაფრთხილება მოსულა და არც შეუწამლავთ“, _ ამბობენ „გურია ნიუსთან“ საუბრისას ნინა კალანდაძე, ვასო სიხარულიძე, ჟულიეტა ლაშარიშვილი.
თემასთან დაკავშირებით სურსათის ეროვნული სააგენტოს საზოგადოებასთან ურთიერთობის სამსახურის თანამშრომელს _ დათა რევაზიშვილს ვესაუბრეთ. რევაზიშვილმა „გურია ნიუსთან“ იმ სამუშაოების შესახებ ისაუბრა, რაც, მისი თქმით, ტარდება პრობლემის აღმოსაფხვრელად.
_ ბატონო დათა, რა სამუშაოები ტარდება სურსათის ეროვნული სააგენტოს მხრიდან აზიური ფაროსანას წინააღმდეგ საბრძოლველად?
_ დასავლეთ საქართველოში, აზიური ფაროსანას საწინააღმდეგოდ 83 546 „მოიზიდე და გაანადგურე“ სადგურია დამონტაჟებული. აზიური ფაროსანას საწინააღმდეგო ღონისძიებები დასავლეთ საქართველოში აქტიურად გრძელდება. შემოდგომის დადგომასთან ერთად, მავნებელი გამოსაზამთრებლად ემზადება, რაც ნიშნავს, რომ ის საცხოვრებელი სახლებისა და მიტოვებული შენობებისკენ ინაცვლებს. ასეთ დროს, განსაკუთრებით ეფექტიანია ბრძოლის მექანიკური მეთოდები.
სურსათის ეროვნული სააგენტო მოუწოდებს მოსახლეობას, სახლებსა და საკარმიდამო ნაკვეთებში აზიურ ფაროსანასთან ბრძოლის მექანიკური მეთოდები აქტიურად გამოიყენოს. განადგურებული თითოეული მავნებელი ნიშნავს მომავალი სეზონისთვის შემცირებულ რიცხოვნობას და როგორც თხილის, ასევე, სხვა სასოფლო-სამეურნეო კულტურების გადარჩენილ მოსავალს.
_ არის თუ არა შემცირებული აზიური ფაროსანას რაოდენობა წინა წლებთან შედარებით?
_ დიახ არის შემცირებული, შეგიძლიათ სტატისტიკა იხილოთ ჩვენს ვებგვერდზე.
მიმდინარე წელს, დასავლეთ საქართველოში უკვე განთავსებულია 91 600 ცალი ფერომონიანი დამჭერი, მათ შორის 83 546 „მოიზიდე და გაანადგურე“ სადგური.
_ რამდენად აქვს ქმედითუნარიანობა იმ წამალს, რაც ფაროსანას მოსაკლავად არის შექმნილი?
_ ტემპერატურის კლებასთან ერთად, აზიური ფაროსანა გამოსაზამთრებლად ემზადება. ამ პერიოდში, განსაკუთრებით ეფექტურია სახლის პირობებში მავნებლის მექანიკური მეთოდების გამოყენებით განადგურება, სწორედ ამიტომ უმნიშვნელოვანესია მოსახლეობის ჩართულობა და გააქტიურება.
აზიურ ფაროსანასთან ბრძოლის საკოორდინაციო მართვის ცენტრი აქტიურად აგრძელებს მავნებლის მონიტორინგსა და ბრძოლის სხვა ღონისძიებებს. დასავლეთ საქართველოში ტერიტორიები თერმული ნისლისა და ცივი შესხურების მეთოდების გამოყენებით მუშავდება; არაყვავილოვან მცენარეებზე განთავსებულია „მოიზიდე და გაანადგურე“ სადგურები, მიმდინარეობს წერტილოვანი წამლობები.
პარალელურად, სურსათის ეროვნული სააგენტოს სპეციალისტები მოსახლეობასთან საინფორმაციო/საკონსულტაციო შეხვედრებს მართავენ და მექანიკური ღონისძიებების შესახებ აწვდიან ინფორმაციას.
გამოსაზამთრებლად ადგილის მაძიებელი მავნებლის მიზიდვა და შემდგომ მისი განადგურება შესაძლებელია მუყაოს ან სხვა მასალის ყუთის ფორმის მარტივი კონსტუქციებით, რომლებიც თავსდება საცხოვრებელი სახლების მახლობლად, მშრალ, მზიან ადგილას;
ეფექტურია ე.წ. „მოიზიდე და გაანადგურე“ მეთოდიც _ ინსექტიციდით გაჟღენთილი ბადე ან ქსოვილი თავსდება საცხოვრებლის პერიმეტრზე, სადაც მავნებლის მიზიდვის მიზნით, მაგრდება ნათურა ან ფერომონი.
გურიაში, აზიური ფაროსანას საწინააღმდეგოდ, ტერიტორიები თერმული ნისლით მუშავდება, ოზურგეთის მუნიციპალიტეტის სოფელ შრომაში, რამდენიმე ერთეული სპეცტექნიკითა და უსაფრთხოების ნორმების სრული დაცვით მიმდინარეობს სოფლის გარე პერიმეტრების დამუშავება. უკვე დამუშავებულია 540 ჰა ტერიტორია. მავნებელთან ბრძოლის ღონისძიებები მეფუტკრე ფერმერებთან აქტიური თანამშრომლობითა და კოორდინაციით ტარდება.
სეს-ის საკოორდინაციო მართვის ცენტრი კიდევ ერთხელ მოუწოდებს მოსახლეობას აქტიურად ჩაერთოს ფაროსანას საწინააღმდეგო ღონისძიებებში, დარეგისტრირდეს ვებგვერდზე _Parosana.ge, რათა 24 საათით ადრე მიიღოს ინფორმაცია დაგეგმილი წამლობების შესახებ.
ავტორი: მარიამ ცენტერაძე
