“ერთიანი ნაციონალური მოძრაობის” წევრთა ნაწილი შიდაპარტიულ არჩევნებს და თავჯდომარის ხელახლა არჩევას ითხოვს. ამ იდეას ენმ-ს წევრთა ნაწილი დაეთანხმა და თქვა, რომ პარტიას “დამატებითი ლეგიტიმაცია სჭირდება”, ნაწილის აზრით, შიდაპარტიულ თემაზე ბრიფინგის ჩატარება და მოთხოვნის ეს ფორმა “უცნაური და დასანანია”, ენმ-ში კი ახლა “რაღაც თანამდებობაზე” ლაპარაკის დრო არ არის.
ენმ-ს მოქმედმა თავმჯდომარემ, ნიკა მელიამ კი გადაწყვეტილებას “ნაჩქარევი” უწოდა”. თუმცა განაცხადა, რომ არჩევნებში მონაწილეობას მიიღებს. ჯერჯერობით, სხვა კანდიდატების ვინაობა უცნობია.
რამ განაპირობა გუნდში აღნიშნული გადაწყვეტილების მიღება, ხომ არ არის “ნაციონალურ მოძრაობაში” შიდა დაპირისპირება- ამის შესახებ “გურია ნიუსი” ფრაქცია “ერთიანი ნაციონალური მოძრაობის” თავმჯდომარეს ჩოხატაურში, დიმიტრი კორიფაძეს ესაუბრა.
“პარტია უკვე 20 წლის არის. გადახალისება არის სულ საჭირო და რა თქმა უნდა, მხარს ვუჭერ შიდა პარტიული არჩევნების ჩატარებას. არჩევნებში რა თქმა უნდა მონაწილებას მივიღებ, როგორც პარტიის წევრი. ვიმყოფები თბილისში. არანაირი განხეთქილება გუნდში არ არის. ჩვეულებრივი სამუშაო პროცესი მიმდინარეობს. უბრალოდ, უმეტესობა ვფიქრობთ, რომ განახლება არის აუცილებელი და საჭირო”,_ ამბობს კორიფაძე.
ვინ შეიძლება გახდეს პარტიის ახალი თავმჯდომარე?
“ვფიქრობ, ვინც გახდება პარტიის თავმჯდომარე, რა თქმა უნდა, იქნება გუნდის წევრი, კარგად გამოცდილი და საკმაოდ ძლიერი”,_ გვპასუხობს კორიფაძე.
პარტიაში დაგეგმილ შიდა არჩევნებთან დაკავშირებით “ერთიანი ნაციონალური მოძრაობის“ ლანჩხუთის ორგანიზაციის თავმჯდომარეს, კახა ასკურავასაც ვესაუბრეთ.
ასკურავას თქმით, შესაძლოა, პარტიის მოქმედი თავმჯდომარე ნიკა მელია მიიჩნევს, რომ შესაძლოა, არჩევნების შესახებ განაცხადი ნაადრევი იყო, მაგრამ გადაწყვეტილება შექმნილი ვითარებიდან მიიღეს.
“ჩვენი, ლანჩხუთის ორგანიზაცია სრულად უჭერს მხარს და აქტიურად მიიღებს მონაწილეობას ამ არჩევნებში. რაც შეეხება ნიკა მელიას განცხადებას, შეიძლება, პარტიის თავმჯდომარეს მიაჩნია და არის რაღაც არგუმენტები, რომ არჩევნების ჩატარება შეიძლებოდა მარტში, რადგან პოლიტსაბჭოს ისედაც ვადა გასდის მარტში, მაგრამ ვინაიდან პროცესების ფორსირება იქედან გამომდინარე მოხდა, რომ გადარსაჩენია მიხეილ სააკაშვილი და დასახსნელია ნიკა გვარამია, ოლიგარქი ივანიშვილი, რაც შეიძლება მალე არის გასასტუმრებელი ხელისუფლებიდან, რომ ამ ქვეყანამ მიიღოს ევროკავშირის კანდიდატის სტატუსი. ამ პროცესებში ყველაზე დიდმა ოპოზიციურმა პარტიამ, “ნაციონალურმა მოძრაობამ” უნდა მიიღოს გადამწყვეტი მნიშვნელობა, ვინაიდან მე პირადად, მხოლოდ და მხოლოდ იმის გამო არა, რომ ამ პარტიის თავმჯდომარე ვარ, მიმაჩნია, რომ “ნაციონალური მოძრაობის” გარეშე იმ პუნქტების შესრულება რომელიც ჩამოვთვალე, ვერ მოხერხდება.
_ ბატონო კახა, “ნაციონალური მოძრაობა” ხომ დღესაც არსებობს. ხომ არ შეიძლება იმის თქმა, რომ “ნაციონალური მოძრაობა” არ არსებობს და ამის გამო თქვენს მიერ დასახელებული მიზნების მიღწევა ვერ მოხერხდა?
_”ნაციონალური მოძრაობა” არსებობს 2002 წლიდან. ეს არის ერთადერთი ოპოზიციური პარტია, რომელიც არ დაიშალა ხელისუფლებაში ყოფნის შემდგომ, დანარჩენი პარტია დაიშალა და “ქართული ოცნებაც” დაიშლება, როცა ძალაუფლებას დაკარგავს. უბრალოდ, ყოველთვის არის საჭირო თანამედროვე ენაზე რომ ვთქვათ “რესტარტი”. ახლა პარტიას სჭირდება გადატვირთვა, ახალი ძალები, ახალი სახეები, მეტი გახსნილობა. ბევრი სიახლე რომ ეს მიზნები ჩვენ რაც შეიძლება სწრაფად მივაღწიოთ. ეს მარტო პარტიას არა, ეს ქვეყანას სჭირდება. ძლიერი “ნაციონალური მოძრაობა” საჭირო არის ამ ქვეყნის ძლიერი დემოკრატიისთვის.
_ პარტიაში დაგეგმილ შიდა არჩევნებთან დაკავშირებით “გურია ნიუსი” “ერთიანი ნაციონალური მოძრაობის“ ოზურგეთის ორგანიზაციის თავმჯდომარეს, დავით მჟავანაძესაც ესაუბრა.
“პარტიის თავმჯდომარემ გააკეთა განცხადება და მზად არის, რომ მიიღოს არჩვენებში მონაწილეობა. რაც შეეხება, იმას თუ როგორ განვითარდება მოვლენები, ამას ვნახავთ ხვალ და ზეგ, თუ რა და როგორ იქნება. ბუნებრივია, გამოცხადდა არჩევნები, დაანონსდება თარიღი”,_ ამბობს მჟავანაძე.
_ როგორ ფიქრობთ, ვინ შეიძლება გახდეს პარტიის ახალი თავმჯდომარე?
“მე მგონი, რომ ამაზე საუბარი ჩემი მხრიდან, როგორც რაიონული ორგანიზაციის თავმჯდომარის მხრიდან, არასერიოზულია, იმდენად, რამდენადაც არ არის კანდიდატები წარმოდგენილი. მოქმედმა თავმჯდომარემ, ნიკა მელიამ განაცხადა, რომ მზად არის მიიღოს მონაწილეობა. შესაბამისად, ვფიქრობ, სწორი პოზიცია იქნება დაველოდოთ ყველა იმ ადამიანს, ვისაც სურვილი აქვს მონაწილეობის მიღების. მოვუსმინოთ მათ გეგმებს და ამის შემდეგ გავაკეთო მე განცხადება, როგორც რაიონული ორგანიზაციის თავმჯდომარემ. სხვა განცხადება ჩემი მხრიდან ამ შემთხვევაში იქნება ძალიან არასერიოზული”,_ გვითხრა მჟავანაძემ.
ავტორი
