“ჩოხატაურის მუნიციპალიტეტის სოფელ ბუკნარში, რომელიც არც თუ ისე დიდი ხნის წინ, თითქმის მთელი მსოფლიოს ყურადღების ცენტრში მოექცა, მოსახლეობა მერთან შეხვედრას ითხოვს”, _ ამის შესახებ კომენტარი ბუკნარის ერთ-ერთმა მცხოვრებმა ვანო დოლიძემ მერის facebook გვერდზე გამოქვეყნებულ ერთ-ერთ პოსტზე დატოვა.
“ბუკნარში ხომ ამოავსეთ “იამკები” გზებზე. გამობრძანდით და ნახეთ, რა გაკეთდა ამ ბოლო პროექტით, მარა არ იზამთ მაგას, სანამ ხალხს არ დაგიყენებთ კაბინეტთან! გამობრძანდით ერთ დღეს, ბატონო დათო, ბუკნარში, ოღონდ დააანონსეთ, რა დროს გამობრძანდებით”, _ ეს კომენტარი ვანო დოლიძეს ეკუთვნის.
მას მერი, დავით შარაშიძე პასუხობდა, რომ ვერ გაიგო, რაზე საუბრობდა დოლიძე: “რას გულისხმობთ, დაწერეთ ან მერის წარმომადგენელს დაუკავშირდით”, _ დაწერა პასუხად შარაშიძემ.
ცოტა ხნის წინ მოსული ძლიერი წვიმის დროს ბუკნარში გზა დაიტბორა. მაშინ ადგილობრივებმა “გურია ნიუსს” მოაწოდეს ვიდეო და გვითხრეს, რომ მათთან მისასვლელად “იახტა დაგვჭირდებოდა”.
როგორც აღმოჩნდა, ძლიერი წვიმის დროს იტბორება გზა, რომელიც სოფელში ერთადერთია სკოლაში ან თუნდაც მაღაზიაში მისასვლელად.
მოსახლეობა ამბობს იმასაც, რომ მოსაწესრიგებელია საქუჩო განათებები და სანიაღვრე არხები.
“ცუდი გზაა, მოუწესრიგებელია სანიაღვრეები, საქუჩო განათება და ძლიერი წვიმის დროს კი გზაზე, რომელიც ერთადერთია ცენტრთან, მაღაზიასთან, სკოლასა და ბაღთან მისასვლელად, უზარმაზარი წყალი მიედინება”, _ ამბობენ მცხოვრებლები.
თითქოს ზემოთ ჩამოთვლილ პრობლემებში ახალი არც არაფერია _
მოსაწესრიგებელ გზასა და სანიაღვრე არხებზე არაერთხელ ვწერდით. ბუკნარის მთავარ გზაზე გადაადგილება არა მარტო წვიმის დროს, მშრალ ამინდშიც კი რთულია ორმოების გამო.
ჯერ კიდევ აგვისტოში, ჩოხატაურის მუნიციპალიტეტის მერის წარმომადგენელი აღნიშნულ თემში, პაატა ჩხაიძე გვეუბნებოდა, რომ სოფლის მხარდამჭერი პროგრამის ფარგლებში შიდა გზები უნდა “დახრეშილიყო” და სანიაღვრე არხები გაწმენდილიყო. ის, ასევე, საუბრობდა მთავარი გზის პროექტზე, რომლის გასახორციელებლადაც ფინანსების მოძიება იყო საჭირო. მოხერხდა თუ არა ფინანსების მოძიება და შესრულდა თუ არა წელს სოფლის პროგრამის ფარგლებით დაგეგმილი სამუშაოები, _ ამის შესახებ ისევ პაატა ჩხაიძეს ვესაუბრეთ.
_ ბატონო პაატა, რა გაკეთდა წელს ბუკნარში სოფლის მხარდამჭერი პროგრამით?
_ სოფლის მხარდამჭერი პროგრამის ფარგლებში შიდა გზები მოიხრეშა და სანიაღვრე არხები გაიწმინდა.
_ საქუჩო განათებები როდის მოწესრიგდება?
_ ძირითადად, მოწესრიგებულია. მთავარი ქუჩა განათებულია.
_ იქ, სადაც განათება არ არის, როდის გაკეთდება?
_ სადაც არ არის, ეტაპობრივად გაკეთდება მომავალში სოფლის მხარდამჭერი პროგრამით.
_ ცენტრალურ გზაზე რა მდგომარეობაა?
_ რაც შეეხება ცენტრალურ გზას, მერიაში გაგცემენ პასუხს.
_ ბატონო პაატა, რამდენიმე თვის წინ თქვენ გვითხარით, რომ არსებობს პროექტი და მის გასახორციელებლად თანხების მოძიებაა საჭირო.
_ როგორც გითხარით, ჯერჯერობით, ყველაფერი ისევ ისეა. პროექტი არსებობს და შეგიძლიათ, გაეცნოთ.
მერის წარმომადგენელთან საუბრის შემდეგ მუნიციპალიტეტის მერს, დავით შარაშიძეს დავუკავშირდით.
როგორც შარაშიძე ჩვენთან საუბრისას ამბობს, ბუკნარში ახალი გზის დაგება იგეგმება, თუმცა, პროექტისთვის გამოყოფილი თანხა, როგორც აღმოჩნდა, ახალ სანიაღვრე არხების გაკეთებას არ ითვალისწინებს:
“ჯიკვნარის მიმართულებით პროექტი უკვე არსებობს და მისი ღირებულება 250 000 ლარს შეადგენს. ოღონდ ბუკნარში ახალ გზას ვაკეთებთ, სანიაღვრეების გაკეთებას ვერ ვახერხებთ და ღია სანიაღვრეები იქნება”, _ ამბობს შარაშიძე.
იქამდე კი, სანამ დაპირებული სამუშაოები დაიწყება, წინ ზამთარია, დრო, როცა მოუწესრიგებელ გზაზე გადაადგილება, უსიამოვნოსთან ერთად, სახიფათოც ხდება.
ავტორი
