ახლახან ოზურგეთის ნ. დუმბაძის სახელობის მეორე საჯარო სკოლაში, მეოთხე (პირველი ჯგუფი) კლასში, შემოდგომის ზეიმი სრულიად განსხვავებულ ფორმატში ჩატარდა.
კლასის ხელმძღვანელმა, თამარ ქავთარაძემ, 29 მოსწავლემ მშობლებთან ერთად, კარგად აჩვენეს, რომ თანამედროვე განათლებაში, უდიდესი როლი აკისრია მშობელთა აქტიურ ჩართულობას, შვილების სასკოლო ცხოვრებაში. განსაკუთრებით კი ისეთ ღონისძიებებში, სადაც ღიად ჩანს მოსწავლეთა ცოდნის, შემოქმედებითი უნარების და ზოგადად საუკეთესო უნარ–ჩვევების ერთგვარი შეჯამება.
მათ, სლოგანით „ჭრელაჭრულა შემოდგომამ კალთები აიკეცა“, ღონისძიების თუ სხვადასხვა ნუგბარი ტკბილეულის ერთგვარ არაჩვეულებრივ გამოფენად აქციეს ეს ზეიმი. თემატური ჯგუფები: „მანდარინი“, „სიმინდი“, „ლობიო“, „ჩურჩხელა“ ჯერ ინფორმაციული, შემდეგ კი ლიტერატურულ–მუსიკალური კომპოზიციებით წარდგნენ თანატოლების და სტუმრების წინაშე.
შემოდგომის ყვითელი ფოთლებისა და ზოგადად ოქროსფერის ლირიკული შინაარსი ელენე იმნაძემ, ნატალია გოგოტიშვილმა და ანასტასია ცერცვაძემ სიმღერით წარმოადგინეს. კომპოზიციას შემოდგომის „საუბარი“ მოჰყვა:
„მე ვარ ოქროსფერი ფერის გაგიჟება,
მე ვარ აუხსნელი, მე ვარ ამოხსნილი…“
შემდეგ ჯგუფი „სიმინდი“ გააქტიურდა და ზეიმის მონაწილეებს უამბო ამ მარჩენალი კულტურის შესახებ. რომ მისი სამშობლო ჩრდილოეთ ამერიკაა და ჩვენთან მხოლოდ მეჩვიდმეტე საუკუნეში შემოვიდა.
„სიმინდის ტარო, საოცარო ციხესიმაგრე…“. „აბრეშუმის თმა დარჩენია გარეთ დასტურად“ _ შეაქეს პატარებმა სიმინდის ნაყოფი. ასევე ლექსებით გადმოსცეს, თუ როგორ ყვება წისქვილი მოსავლის ამბავს.
დეა ყაზაიშვილმა კი წისქვილის ტრიალის წარმოსახვას, ალეგორიული ხაზით უპასუხა და ცეკვა „მთიულური“ შეასრულა.
კლასის დამრიგებელმა, თამარ ქავთარაძემ ლიტერატურულ და მხატვრულ კომპოზიციებს შორის, შემეცნებითი კითხვები დასვა: „დაასრულე ანდაზები“, ამოხსენი ამოცანები“… „ნაყოფიერი“ ჯგუფები კი, „სიმინდი“, „მანდარინი“ „ვაზი“ თუ „ჩურჩხელა“ პასუხებს არ აგვიანებდნენ და კონკურსით გათვალისწინებული ვარსკვლავებიც ცვიოდა მათივე დედიკოების მიერ, დეკორატიული ფორმით მომზადებულ კალათებში. თითქმის ყველა ბავშვმა სწორად გამოიცნო ანდაზების დასასრული, ამოხსნეს ამოცანები.
ჯგუფების წარმომადგენლებმა სხარტად, ლაკონურად, გადატვირთვის გარეშე გადმოსცეს ინფორმაციული შინაარსი იმ კულტურებისა, რომელთა სახელებიც ერქვა მათ ჯგუფებს და ამავე დრო,ს ჩვენი ხალხის საარსებო ბოსტნეულს მცენარეებს ან ხეხილოვანებს წარმოადგენს.
„ნეტა, რა ხელმა ახარა, ამდენი ხე და ხეხილი“, _ ყველას სათქმელი ერთად წარმოთქვა ანასტასია ვაშნაძემ.
ვაჟების შემადგენლობიდან საუკეთესო ხალხური ცეკვების ვარიანტი ლამაზად წარმოადგინა დათუნა შილაკაძემ. ერთობლივი ძალისხმევით წარმოდგენილ დეკორაციებს შორის, გემოვნებით ადგილმიჩენილ ქართული სამზარეულო კულტურის კერძებსა და ტკბილეულზე ხაჭაპური, მანდარინის ტოსტი, ტკბილეული კვახში, ფელამუში, ღომი, მჭადი კეცზე…
ეს ყველაფერი მშობელთა ჩართულობით, ახლებურად იყო წარმოდგენილი და 29 ბავშვმა შეძლო, შემოდგომის სრული სურათი, ზედმეტი გადატვირთვის გარეშე, შემეცნებითი შინაარსით და ვიზუალით წარმოედგინა.
„ერთობლივი ძალისხმევით, ერთმანეთის სიყვარულით შეძლეს მოსწავლეებმა და მშობლებმა და მათთან ერთად, ჩვენ – მასწავლებლებმა, შემოდგომის ზეიმი ახლებურად, საინტერესოდ და განსხვავებულ ფორმატში წარმოგვედგინა. ინფორმაციულმა ცოდნამ საარსებო კულტურებზე, ბავშვების შემოქმედებითი მონაცემების უნარების შემეცნებითი შინაარსით აღქმამ, შეგვაძლებინა ის, რაც შევძელით. ბავშვებმა, როგორც ნახეთ, კარგად წარმოაჩინეს თავიანთი შესაძლებლობები ქართულ ენასა და მათემატიკაში. და კიდევ სხვადასხვა დეკორაციების ფონზე ასევე წარმოადგინეს საკუთარი დედიკოების მომზადებული კერძები, ტკბილეული. ამ ყველაფერმა, ვფიქრობ, შემოდგომის ისედაც საზეიმო ელფერი, თავისი ელვარებით მოეფინა ჩვენს კლასს, ჩვენს სკოლას! ეს გარემო კი თავდავიწყებით უყვართ ბავშვებს! ღონისძიების მიზანიც ეს იყო”, _ თქვა ზეიმის დასასრულს კლასის დამრიგებელმა თამარ ქავთარაძემ.
ავტორი
